Isayas 6 - Hanunuu

Tinawag si Isayas

¹ Kaybi katpung timpu pagkamatay ni Hari Usyas, nakitan niku ti Panginuun matukawan sa abwat pag turukawan. Kay aba niya rutay magtaklub sa buu Balay Diyus.

² May manga taga langit pag linalang baliwa sa kay uluhan. Ti kada usa sa kanda may tig unum ka pakpak: Ti duwa ka pakpak matakluban sa kanda manga uyahun, kay duwa matakluban sa kanda manga lulud, ag kay duwa waydi imaw kanda paggamitun panlayang.

³ Magsarabihan sida sa usa kag sa usa: “Banal, Banal, Banal ti Panginuun Makamaskihan! Kay kadayawan magsakup sa buu kalibutan.”

⁴ Sa bisug nida busis, natandug ti manga paratukawan Balay Diyus ag napnu anus ti sulud Balay Diyus.

⁵ Magkun aku, “Kaawaawa aku! Pihu gid midamhak aku, dahil makasalanan kang bibig ag mag-ulian aku minsan sa manga tawu makasalanan diman kay bibig. Kainda nakitan niku ti Hari, ti Panginuun Makamaskihan.”

⁶ Bag-u linmayang ti usa sa manga taga langit pag linalang tag sa kangku, may dara siya baga kay bin-ul ginan sa harandugan.

⁷ Ipinad-ut niya ti baga sa kang bibig ag magkun, “Hinikap yi kanmu bibig, udyi kawu may kasalanan dahil pinatawad yi kawu.”

⁸ Bag-u nadnugan niku ti busis Panginuun magkun, “Si unu kang suguun? Si unu ti lumakaw para sa kanmi?” Sinmagut aku, “Inda di duy aku! Aku ti sugua nimu.”

⁹ Magkun siya, “Pagginan yi kawu sabiha nimu sa nasakupan Israil, ‘Una kamu magpakapatingi, unman diman kamu makaintindi. Una kamu magpakabantay, unman diman kamu kumakit!’ ”

¹⁰ Magkun waya siya, “Paganita nimu tunda pag manga tawu kay tagipusuun. Pabay-ani nimu sida magpabungul-bungul ag magpabuta-butaun, dahil barang makadnug sida, makakit, ag makaintindi. Dahil nu makaintindi sida, bumalik sida sa kangku, ag maayadan.”

¹¹ Nagpaingana aku, “Panginuun, kabitay duy kay kadugay?” Sinmagut siya, “Tugka sa mawayak ti manga banwa Israil ag balaw yi may mangulian siyun. Tugka sa udyi may mag-uli sa manga balay ag ti daga bumaliw kapawaan ag udyi makinabangan.

¹² Tugka sa palayasun niku ti manga Israilita ag kanda manga daga mapabay-anan yi.

¹³ Una matayak waya ti ikasampulu pag bahagi manga Israilita sa daga Israil, ipadamhak diman niku sida. Parihu sida sa tuud puun insina pinlud. Dapat may pinili aku masawad sa kanda, ti marinu pag salingsing.”