Isayas 59 - Hanunuu

¹ Pagpatingi kamu! Ti Panginuun balaw malumuy hampay balaw rumibri. Balaw diman bungul siya hampay ud makadnug nu magtawag kamu sa kanya.

² Kanyu manga kasalanan imaw ti nagpakarayu sa kanyu ginan sa Diyus ag imaw kay dahilan nakan kamu kay pinatlikudan ag dayi mamatingi sa kanyu manga darangin.

³ Dahil magmatay kamu, magbuwat waya manga tuhay pag kadautan. Magbagaw kamu manga kapudilan.

⁴ Balaw niyu pag-isipun ti katadlungan; ti manga bangdan niyu sa kanyu manga kaparihu pudu kapudilan. Daut kanyu manga pag-isipun, bag-u imaw tida kanyu pagbuwatun.

^5-6 Kanyu daut manga gayak parihu sa itlug ulay madalit ulay, ti makakaun inda mamatay. Parihu diman inda sa balay lawa balaw mahimu buwatun rutay nakan balaw gid may kinabang kanyu manga daut gayak. Daut kanyu pagbuwatun ag mamadamhak kamu.

⁷ Magdaldali kamu bumwat kadautan ag maliksi kanyu kamang sa pagmatay manga unman may kasalanan. Pirmi daut kanyu pag-isipun, una naan tag kamu unman may pagbuwatun nu ud kadamhakan ag kadautan.

⁸ Unman kamu may alam tungkul sa may kahusayan pagpangabuhi. Pag-ipasipala niyu ti katadlungan ag kanyu waya inda pagpasalanun. Una si unu ti sumunud sa kanyu manga pagbuwatun, balaw diman makalakaw may kahusayan pagpangabuhi.

⁹ Nakan ngani udwaya pagparusahan Diyus kanta manga kalaban, ag udwaya nita magkatanggap ti panalu hanggan ti katadlungan. Nag-alagad kita rayaw, dapat dulum ti rinmas-ug. Nakan ngani sa madlum kita pag maglakaw.

¹⁰ Magpanggarapgap kita ga buta. Mag-idayaan kita una udtu karaw-an sirang, ga maglakaw sa madlum. Parihu kita sa tigbak nu ipaparihu sa manga tawu mabisug.

¹¹ Man-ngurub kita sa kakurian ga usu ag mandaghum ga manga kalapati. Pag-alagdun nita parusahan yi Diyus kanta manga kalaban ag iribri kita, dapat udwaya gid magkatupad.

¹² Dahil masyadu yi mayamu kanta manga kasalanan sa Diyus imaw ti puruyba kuntay kailangan maparusahan kita. Pihu alam diman waydi nita magbuwat kita kadautan.

¹³ Naglaban kita ag naglabag sa Panginuun. Binugyahan nita kanta Diyus. Pag-apihun nita ag paglugihun kanta kaparihu. Pagpinsaran nita mayad nu kabitay kita makabagaw kapudilan.

¹⁴ Imaw ti singyanan nakan udwaya pagsintinsiyahan Diyus kanta manga kalaban ag udwaya kita pagpakan-an panalu may katadlungan. Dahil udyi mag-akitan ti katutuuhanan una naan, ag ti manga tawu balaw yi masarigan.

¹⁵ Ungud, nadura yi ti katutuuhanan, ag ti manga mag-aman sa kadautan pag-unuunuhun. Nakitan tunda Panginuun ag nanruku siya dahil sa unman may katadlungan.

¹⁶ Maglingut siya sa kay nakitan dahil unman may una di usa ti mag-awat sa manga pag-apihun. Nakan ngani sa panab-anan niya kamaskihan irinibri niya sida. Dahil matadlung siya, maawatan niya sida.

¹⁷ Ti katadlungan imaw kay panangga sa kay dubdub ag kalu baul ti karibrihan. Isulung niya ga rutay ti manhimalus ag masyadu gid niya pag-isug.

¹⁸ Balusan niya kay manga kalaban angay sa kanda binwat, hanggan yi ti manga ati sa ararayu pag daga. Malakawan gid nida kay pangaisug.

¹⁹ Galangun siya ag dayawun una naan, dahil rumas-ug siya ga magragasras danum paghuypun mabaskug pag durus.

²⁰ Magkun ti Panginuun, “Rumas-ug sa Siun ti rumibri sa kanyu manga linahi ni Hakub, ag iribri niya ti manga mag-ampu kanda manga kasalanan.

²¹ Inda kang kasunduan sa kanyu: Dayu madura kang Ispiritu asan sa kanyu hanggan kang manga itinultul pag bagaw sa kanyu. Tultulan niyu inda sa kanyu manga anak, ag kailangan itultul maan nida inda sa kanda manga anak tugka sa dumasun pag manga sinulput. Aku, ti Panginuun, ti magsabi inda.”