Isayas 58 - Hanunuu

Ti Tutuu pag Balaw Maghandum Karan-unun

¹ Magkun ti Panginuun, “Paghuyaw kamu ka daka parihu sa budyung! Danga niyu pag-apasi! Sabiha niyu sa kang manga nasakupan manga linahi ni Hakub kanda manga kasalanan hanggan paglabag.

² Magpakarani sida sa kangku sirang-sirang, gustu nida maalaman kang manga palakaw. Nu pagbantayan, bilang sida usa ka nasyun matadlung unman maglabag sa sugu niku. Pag-ipakakit nida ga magkaibug sida pumakarani sa kangku ag manhagad matadlung pag pasya.

³ Magkun waya sida sa kangku, ‘Balaw kami maghandum karan-unun, dapat unman diman waydi nimu pinansin. Pagpakurianan nimi kanmi sadili, dapat unman nimu pinahalgaan.’ “Kay tutuu, sa udas niyu unman maghandum karan-unun, kanyu sadili kagustuhan ti kanyu pag-isipun. Paglugihun niyu kanyu manugtarabahu.

⁴ Balaw ngani kamu maghandum karan-unun, dapat mag-arawayan diman kamu, magtalaluhan, ag magsuruntukan waya. Danga niyu isipun kanyu unman maghandum karan-unun taynguna makaawat hampay dungugun niku kanyu darangin.

⁵ Sa kanyu balaw maghandum karan-unun, pagsaktan niyu kanyu sadili. Mayungduan kamu bilang labung kugun. Magsulung kamu rutay saku ag magpaigya sa dapug. Tida aw ti pag-ingarnan niyu balaw maghandum karan-unun? Kanyu isip makapasulung tunda sa kangku?

⁶ Ti makapasulung sa kangku pag unman maghandum karan-unun tunda may kaibahan mayad pag ugali. Apasi niyu ti pagbuwat kadautan, ugalia niyu ti katadlungan, pakan-i kaariwayahan ti manga pag-api-apihun ag awati ti manga paglugihun.

⁷ Pakan-i niyu karan-unun ti manga magkalun-us, ipatahan niyu sa kanyu ulian ti unman may ulian, ayawi niyu rutay ti unman may rutay, ag awati niyu kanyu manga katawuhan.

⁸ Nu buwatun niyu tunda, rumas-ug sa kanyu ti karibrihan ga rayaw maghanag-hanag sa surip, ag paayadun niku kamu. Aku kanyu Panginuun matadlung ti mangunahan sa kanyu ag apinan niku kamu sa panab-anan niku kadayawan.

⁹ Nu manpakarani kamu sa kangku hampay manhagad awat, sagutun niku kamu. “Nu apasan niyu kanyu mag-api, ti magbangdan kapudilan, ti magbagaw daut,

¹⁰ ag nu buwatun niyu ti magpakaun sa manga magkalun-us, ti mag-ayaw pangailangan manga makuri, rumas-ug sa kanyu ti karibrihan magpakaun rayaw sa madulum niyu pag kahamtangan bilang ga karaw-an sirang.

¹¹ Pirmi niku kamu giyahan ag busugun, una makuri kanyu kahamtangan. Pabisugun niku kamu. Miparihu kamu sa tanum abunda sa danum ga bulbugan balaw magkak-at kay danum.

¹² Ipatindug maan niyu manga sinulput ti manga banwa dugay yi nawayak ag hiwatun nida kay manga patakinan. Makilala kamu ti manughiwat kanda manga daut pag alad batu hanggan manga balay.

¹³ Alalahana niyu ti Sirang Pamahari. Danga kanyu lang sadili kahamtangan ti kanyu pag-isipun sa tunda pag pinakamahalaga pag sirang. Pahalgai niyu inda sa panab-anan pagpigil sa kanyu sadili manga kagustuhan hanggan ikabaya, ag pag-apas magbagaw baragawun ud may kabuluhan.

¹⁴ Nu buwatun niyu inda, masulung kamu sa kanyu pagsirbi sa kangku. Kilalan-un niku kamu sa buu kalibutan. Paabundahun niku ti tubas sa kanyu minana pag daga sa kanyu ginurang sa kan Hakub.” Matupad gid inda dahil binagaw Panginuun.