Isayas 57 - Hanunuu

¹ Nu namatay ti usa ka tawu matadlung, unman may magpaingana nu hayga. Unman mayamu ti may alam kuntay ti manga tawu matadlung pagbul-un Diyus hampay ipakarayu sa daut.

² Dahil nu namatay ti tawu matadlung, may kahusayan yi siya.

³ Dapat kamu pag manga linahi panhirian, ag manug-uragin, hanggan manga babayi baraydan, pagpakarani kamu hampay kamu sintinsiyahan.

⁴ Si unu kanyu pagpuyaan? Si unu kanyu pagtamirian ag pagdilaan? Ti Panginuun ngap! Manga linahi kamu manga malaban hanggan manga pudilun.

⁵ Pagsambahun niyu kanyu diyus-diyusan sa panab-anan pag-ululidan niyu sa sirung manga maraybung pag puun kayu kanyu isip banal. Pag-ihandug niyu kanyu manga anak sa manga bululusan danum sa sagasadan manga bantud.

⁶ Ti manga malitis pag batu sa sapa pagbuwatun yi niyu diyus ag pagsambahun sa panab-anan pagsagda karan-unun hanggan irinmun. Balaw aku magbaya sa kanyu pagbuwatun.

⁷ Magdayik kamu sa manga arabwat bantud maghandug kanyu manga handug ag ati pag mag-ululidan.

⁸ Pag-ipauli waya niyu kanyu manga diyus-diyusan sa may arani sabian niyu manga balay. Pagbugyahan niyu aku. Parihu kamu sa babayi magpanguragin napaigya sa daka pag paraigyaan niya magpasnu paulid sa kay kataratu. Magkaibug gid siya magpaulid sa kay kataratu. Pagpasugtan niya kay kaibugan.

⁹ Nag-ati kamu sa kanyu diyus-diyusan sa kan Muluk. Mayamu kanyu dara lana ulibu hanggan manga pamanglu. Nansugu waya kamu manga tawu tabug sa arayu pag rugar hampay manhanap waya manga diyus-diyusan sarambahun niyu. Una hanggan ti ulian manga namatay ga atagan waya niyu.

¹⁰ Una budlay yi kamu sa kahanap diyus-diyusan, balaw gid kamu magkaduraan pag-asa. Pilit gid niyu pagpabisugun kanyu sadili nakan balaw kamu magpanlumuy.

¹¹ Magkun ti Panginuun, “Si unu tunda pag diyus-diyusan ti pagkadalaan niyu ag namudil kamu sa kangku? Linimtan niyu aku ag udyi pinansin. Hintay lugud kay dahilan hayga balaw yi niyu aku pag-igalang? Dahil aw sa ud nangingay aku sa dugay pag udas?

¹² Kanyu hantup matadlung kanyu pagbuwatun, dapat ipakakit niku nu hintay pag kalasi tawu kamu.

¹³ Dayu gid ungud makaawat sa kanyu ti manga diyus-diyusan niyu nu manhagad kamu awat sa kanda. Sida tanan pulidun durus; mipayag sida sa usa lang ka huyup. Dapat ti manga magsarig sa kangku mangulian sa daga ag mansamba sa kang banal pag bantud.

¹⁴ Sumabi aku, hiwata niyu ti dalan lakawan niku manga nasakupan.”

¹⁵ Inda waya ti pagsabihun Kaabwat-abwatan pag Diyus, ti Banal pag Diyus buhi hanggan aban: “Mag-uli aku sa abwat ag banal pag rugar, dapat mag-uli diman aku kaibahan manga tawu mapinakumbabaun ag mapinatawadun, hampay sida kang pabisugun.

¹⁶ Sa tutuu, balaw niku kamu kalabanun ngatay unu-unuhun sa tanan udas, dahil nu buwatun niku inda magkaramatay ti linalang niku pag manga tawu.

¹⁷ Nangisug aku dahil sa kasalanan ag pagkamakasadili Israil, nakan pinarig-anan niku sida ag binugyahan. Dapat parargu di sida sa kanda kadautan.

¹⁸ Nakitan niku kanda manga pag-ugaliun, dapat paayadun di niku sida. Giyahan niku sida ag pasulungun ti manga magkapanglaw sa kanda.

¹⁹ Nakan dumayaw sida sa kangku. Ipauli niku sida sa mayad pag kahamtangan, sa arayu man ngatay sa arani. Paayadun niku sida. Aku ti Panginuun, ti magsabi inda.

²⁰ Dapat ti daut ud may kahusayan. Parihu sida sa humbak dagat magdara lutuk hanggan manga uring tag sa baybay.

²¹ Ti daut pag tawu ud may kahusayan kay buhi.” Tunda ti binagaw niku Diyus.