Isayas 56 - Hanunuu

Ti Papalad sa Tanan Nasyun

¹ Inda ti pagsabihun Panginuun: “Ugalia niyu ti katadlungan ag ti katuwiran dahil arani yi niku iribri kamu.

² Mapalad ti manga tawu kainda kay pagbuwatun ag magsunud sa kang manga pag-isugu sa Sirang Pamahari. Mapalad diman ti manga tawu balaw magbuwat daut.”

³ Danga pag-isipa manga day-uhan naghandug kanda sadili sa Panginuun kuntay balaw sida ipaamut Panginuun sa kay manga nasakupan. Danga diman pag-isipa manga tawu napalusa dahil udyi sida manganak, balaw yi sida mahimu ipaamut sa nasakupan Diyus.

⁴ Dahil inda ti pagsabihun Panginuun, “Papaladan niku ti manga tawu napalusa masurundun sa kang manga pag-isugu sa Sirang Pamahari ag marabuwat manga bagay kang pag-ikabaya, hanggan matinupadun sa kang kasunduan.

⁵ Pahintulutan niku sida makasaka sa kang Balay ag kilalan-un niku sida subra man sa pagkilala kang ipakaun nu sida nanhinganak. Ag balaw sida malimtan manga tawu hanggan aban.

⁶ “Papaladan diman waydi niku ti manga day-uhan naghandug kanda sadili sa kangku hampay sirbihan aku, mahalun, sambahun, ag sundun kang pag-isugu sa Sirang Pamahari ag matinupadun sa kang kasunduan.

⁷ Darahun niku sida sa kang banal pag bantud ag ati pag pasulungun sa kang balay dararanginan. Tanggapun niku sa kang harandugan kanda manga handug pagsunugun hanggan ti tuhay waya pag handug, dahil kang Balay Diyus ingarnan balay dararanginan manga tawu ginan sa tanan nasyun.”

⁸ Magkun waya ti Panginuun Diyus ti nagtipun sa manga Israilita nabihag, “Tipunun waya niku ti iba, purya sa manga natipun yi.”

⁹ Pagpakarani kamu, kamu tanan pag manga nasyun ga manga maraisug hayup, rurisa niyu ti nasakupan Israil.

¹⁰ Dahil ti manga takinan Israil manga manugbantay mana sa inda pag nasyun nagbaliw ngap ga manga buta ag unman may alam. Ga manga idu sida magbantay ud magsubang. Kanda gustu pahuway, maturug, ag managin-up.

¹¹ Ga manga idu sida daluk ud magkabsug. Ti manga manugbantay Israil unman may intindi. Ti kada usa sa kanda magbuwat una lang hintay kanda gustu buwatun. Sadili lang ikaayad ti kanda pagpabalagan.

¹² Magkun waya sida, “Abala kamu, mam-ul kita irinmun ag manlanguhan! Higit waya aldaw kaysa taynguna.”