Isayas 55 - Hanunuu

Ti Pangaawa Diyus

¹ Magkun ti Panginuun, “Pagpakarani kamu, kamu tanan ti magkauwaw, indaay ti danum! Una unman kamu may kuwarta, pagpakarani kamu, pag-inum hanggan pagkaun! Abala kamu, pagbuul kamu intus ag gatas hanggan butiran karan-unun balaw may bayad!

² Hayga niyu paggastusun kanyu kuwarta sa manga bagay bukun magkakaun? Hayga niyu pagtabuhun kanyu upa sa manga bagay bukun makapabusug sa kanyu? Pagpatingi kamu sa kangku ag makakaun kamu manga masarap pag karan-unun, ungud mabsug kamu.

³ Pagpakarani kamu sa kangku, pagpatingi hampay mabuhi kamu. Mamuwat aku unman may katapusan pag kasunduan sa kanyu. Ipadamdam niku sa kanyu kang pagmahal hanggan pangaawa ti itinaratu niku sa kan Dabid.

⁴ Pinili niku siya takinan manga nasyun, sa panab-anan niya ipinakakit niku kang kamaskihan sa kanda.

⁵ Tawagan niyu ti balaw kaibahan niyu pag manga nasyun, ag mandaldali sida pumakarani sa kanyu, dahil aku, ti Panginuun niyu Diyus, ti Banal pag Diyus Israil, ti nagpakaun kagalangan sa kanyu.”

⁶ Pagpakarani yi kamu sa Panginuun ag pagtawag sa kanya habang asan di waya siya hampay awatan kamu.

⁷ Patlikudi yi manga tawu daut kanda daut pag manga ugali, bag-uha yi kanda daut pag naisipan. Pagbalik yi sida sa Panginuun nita Diyus, dahil kaawaan ag patawadun niya sida.

⁸ Magkun ti Panginuun, “Kang naisipan balaw parihu sa naisipan niyu ag ti pamaraan niku balaw parihu sa pamaraan niyu.

⁹ Nu kabitay kay kaarayu ti langit sa daga, katida diman kaarayu kang pamaraan hanggan naisipan kaysa kanyu.

¹⁰ Ti uran hanggan ti snow ginan sa tungud, balaw yi magbalik atitag tugka sa unman makapakaun danum sa daga ag makapalangba sa manga halaman hampay makapakaun binhi hanggan karan-unun sa nagtanum hanggan sa manga tawu.

¹¹ Katunda diman kang manga bagaw, balaw inda maduraan halaga, bagkus ngap matupad inda kang manga pagkaibgan, ag isabuwat kang turunu nu hayga niku inda ipinadara.

¹² “Manga Israilita, guminan kamu may kabayaan sa Babilunya ag giyahan kamu Diyus. Ti manga bantud hanggan manga tagudtud ga manga tawu manganta sa kabayaan. Ag ti tanan manga puun kayu ga manga tawu mamalalakpakan.

¹³ Manubu yi ti manga puun sipris hanggan mirtu sa daan turubuan kaybi manga halaman madugi. Tunda pag manga nangyari makapakaun kadayawan sa kangku. Bumaliw puruyba inda niku kamaskihan hanggan aban.”