Isayas 54 - Hanunuu

Ti Pagmahal Diyus sa Hirusalim

¹ Magkun ti Panginuun, “Pagkanta kawu Hirusalim, kawu ga babayi baug. Pagkanta kawu ag pagringgit sa kabayaan, kawu unman nakalakaw kakurian sa magpanganak. Dahil una yi tinayakan kawu nimu asawa, mas yumamu kanmu manga anak kaysa babayi kaibahan kay asawa.

² Pagbuwat kawu ka daka ag mapag-un pag ulian. Danga nimu pagpadiita.

³ Dahil dumaka kanyu katugkaan, sakupun nimu manga nasakupan ti iba manga nasyun, ag kanda ulianan ati ti manga banwa tinayakan.

⁴ Danga kawu magkadala dahil balaw kawu mangay-a. Malimtan yi nimu ti kakay-ahan nimu kalay-awan katunda diman kanmu pagkaburanday.

⁵ Dahil aku kanmu manuglalang ga kanmu asawa. Kang ngaran Yawi Makamaskihan sa tanan. Aku ti Banal pag Diyus Israil, kanmu Manugribri. Pag-ingarnan aku ‘Diyus buu kalibutan.’

⁶ “Hirusalim, parihu kawu sa usa ka kalay-awan babayi nangasawa ag magkaruku dahil tinayakan siya niya asawa. Dapat taynguna, pagtawagan kawu niku hampay utru makaibahan.

⁷ Tinayakan kawu niku ngalay, dapat dahil sa daka pag-awa niku sa kanmu utru kawu niku alagaan.

⁸ Dahil sa kadaka aku nagalit sa kanmu, tinayakan niku kawu ngalay, dapat dahil sa kang unman may katapusan pag pagmahal sa kanmu, kaawaan di niku kawu. Aku ti Panginuun kanyu Manugribri ti magsabi inda.

⁹ “Para sa kangku, parihu inda sa kaybi sa udas ni Nuwi pagka nanaratu aku balaw yi niku gunawun ti kalibutan. Taynguna waydi, nanaratu aku balaw yi aku magalit ngatay mamarusa sa kanyu.

¹⁰ Una magkarapugdak ti tagudtud ag bantud, ti pagmahal niku sa kanmu balaw madura, una kang kasunduan sa kanmu ipauli niku kawu sa marinu pag kahamtangan. Aku, ti Panginuun magkaawa sa kanmu, ti magsabi inda.

¹¹ “Hirusalim, kawu ga binagyu. Nangagwanta kawu unman may namasulung ag namabisug sa kanmu. Dapat utru kawu niku ipatindug sa paratukawan binwat sa batu sapiru, ag gamitun niku ti mahalaga pag manga batu hampay buwatun manga lingub balay nimu.

¹² Gamitun diman niku ti manga batu rubi sa kanmu manga bantayaw, ag gamitun diman niku ti manga mararinu pag manga batu sa pagbuwat manga sabian nimu hanggan manga alad batu.

¹³ Aku ti manudlu sa kanmu manga nasakupan, ag bumaliw mayad kanda kahamtangan.

¹⁴ Bumaliw marig-un kawu dahil mamuhi matadlung kanmu manga nasakupan. Malagiw kanmu manga kalaban, nakan unman kawu may kadalaan. Udyi makapakarani sa kanmu ti manga kalaban nimu hampay padalaun kawu.

¹⁵ Nu may man-gira sa kanmu, balaw niku tunda kagustuhan. Mibuyu sida sa kanmu.

¹⁶ Pagpatingi kawu! Aku ti naglalang manga panday magpamakut apuy ag magbuwat armas. Aku diman ti naglalang manga sundalu maggamit tunda pag manga armas hampay manruris.

¹⁷ Unman may una hintay pag armas ti binuwat hampay manalu laban sa kanmu, ag masagut nimu una hintay ti ibangdan laban sa kanmu. Inda ti ipamana niku sa kang manga manugsirbi. Pakan-an niku sida panalu. Aku, ti Panginuun, ti magsabi inda.”