Isayas 53 - Hanunuu

¹ Si unu ti nagpaniwala sa kanmi ibinarita? Ag sa kantapu pag ipinaburayhaw Panginuun kay kamaskihan?

² Kagustuhan Panginuun kay manugsirbi lumangba parihu sa manga tanum, maggamut sa mamara pag daga. Unman siya may rinu ngatay ikadulaw hampay kita ibugun sa kanya hampay siya pakaranyan.

³ Pinuyaan siya ag ipinurya manga tawu. Nakalakaw siya sakit ag kakurian. Pinatlikudan nita siya, pinuyaan, ag balaw pinahalgaan.

⁴ Ti tutuu, inagwanta niya ti manga sakit ag manga karukuan mana kita ti lumakaw. Kanta isip pinarusahan siya Diyus dahil sa kay manga kasalanan.

⁵ Ti tutuu, biniyagan siya dahil sa kanta manga paglabag; hinampak siya dahil sa kanta kadautan. Ti inagwanta niya pag parusa imaw ti nagpauli sa kanta sa mayad pag kahamtangan. Dahil sa kay manga biyag naayadan kita.

⁶ Kita tanan ga manga karanidu tinmalang. Kada usa sa kanta nagbuwat kanta pagkaibgan buwatun. Dapat siya ti pinarusahan Panginuun parusa para mana sa kanta tanan.

⁷ Inihid siya ag pinakurianan, dapat balaw siya nagdangup. Ga karanidu siya daran-un sa iriyawan hampay matyun, ngatay karanidu pag-uguyan ud mag-ingay.

⁸ Dinakup siya, sinintinsiyahan, ag minatay. Unman may nakaimatuun, una di usa sa manga sinulput niya, kuntay minatay siya dahil sa kanda manga kasalanan, inagwanta niya ti parusa para mana sa kanda.

⁹ Una unman siya may binwat kasalanan una hintay pagdaya, ilinbung siya ga usa ka manugmatay; ilinbung siya kaibahan manga mayaman.

¹⁰ Dapat nalub-anan Panginuun masaktan siya ag pakurianan. Una waya binuwat siya handug sa Panginuun hampay mabayadan ti kasalanan manga tawu, makitan niya kay manga linahi ag makatanggap siya malawig pag buhi. Ag sa panab-anan niya matupad ti nalub-anan Panginuun.

¹¹ Nu makitan niya kay burak niya kakurian, makabaya siya. Magkun ti Panginuun, “Sa panab-anan kadunungan niku matadlung pag manugsirbi, mayamu ti kilalan-un niya matadlung, mangagwanta siya para sa kanda manga kasalanan.

¹² Dahil siyun, dayawun niku siya parihu sa bantug pag tawu ag makapangyarihan dahil ipinakaun niya kay buhi. Imininsan siya usa sa manga makasalanan ag hinagad waya niya sa Diyus kuntay sida patawadun.”