Isayas 52 - Hanunuu

Iribri Diyus ti Hirusalim

¹ Pagbangun kawu, Siun, ag pagpakarig-un. Ipakakit nimu kanmu kapangyarihan, Banal pag banwa Hirusalim. Isulung maan nimu kanmu marinu pag rutay, dahil kanmu manga kalaban balaw Israilita, binaliw nimu mauring udyi utru makaslud sa kanmu sabian.

² Danga yi kawu maruku parihu sa manga tawu magpanrukuan matukawan sa daga. Pagbangun yi kawu ag utru pagdumara. Ag kamu pag manga nasakupan Hirusalim, palpasi yi niyu kanyu sadili ginan sa pagkabihag.

^3-4 Dahil inda ti pagsabihun Panginuun Diyus, “Binihag kamu ga manga tawu ipinabili bilang suruguun unman may bayad, nakan lukatun niku kamu unman diman may bayad. Nag-atag kamu kaybi sa Ihiptu hampay ati pag mangulianan ag inihid kamu ati. Ag kaybi sa uryan binihag diman kamu taga Asirya unman may bayad.

⁵ Taynguna, hintay yi maan ti nangyari sa kanyu? Binihag kamu manga taga Babilunya ga balaw diman may bayad. Inaway nida kamu ag pinuyaan. Una aku hanggan pirmi diman nida paglabagun.

⁶ Dapat rumas-ug ti sirang maalaman niyu nu si unu aku, dahil aku gid ngap tigbagaw sa kanyu. Hu aku ngani.”

⁷ Marinu bantayan ti manga manugbarita maglakaw sa kabantudan magdara mayad pag barita kahusayan hanggan kaayadan sa Hirusalim, dahil iribri yi inda Diyus. Sabihun nida sa manga taga Hirusalim, “Maghari yi kanyu Diyus!”

⁸ Manringgit sa kabayaan ti manga manugbantay banwa dahil makitan nida ti pagbalik Panginuun sa Hirusalim.

⁹ Manringgit sa kabayaan, ti guba Hirusalim, dahil pasulungun ag pabisugun yi Panginuun kay nasakupan. Iribri niya ti Hirusalim!

¹⁰ Ipakakit Panginuun ti bukud tangi niya pag kamaskihan sa tanan nasyun, ag makitan buu kalibutan ti pagribri nita Diyus.

¹¹ Kamu pag manga tagadara garamitun Balay Diyus Panginuun, pag-ighit yi kamu sa Babilunya. Danga kamu mag-igpil manga bagay mauring. Pag-ighit yi kamu sa Babilunya, ag pagpakabanal.

¹² Dapat taynguna, balaw yi niyu kailangan mag-apura sa pag-ighit, ga maglayas. Dahil Panginuun ti mag-una sa kanyu. Ti Diyus Israil ti bumaliwa sa kanyu.

Ti Mag-agwanta pag Manugsirbi Panginuun

¹³ Magkun ti Panginuun, “Kang manugsirbi manalu. Bumaliw bantug siya ag paggalangun.

¹⁴ Mayamu ti madiklahan sa kanya, dahil harus mawayak yi kay uyahun ga balaw yi uyahun tawu.

¹⁵ Hanggan ti manga nasyun madulaw sa kanya. Ti manga hari dayu makabagaw dahil sa kanya, dahil makitan nida ti manga bagay udwaya nasabi sa kanda. Ag masalman nida ti manga udwaya nasaydan nida pag bagay.”