Isayas 51 - Hanunuu

Ti Paandam sa Pagsarig sa Panginuun

^1-2 Magkun ti Panginuun, “Pagpatingi kamu sa kangku, kamu ti manga magkaibug maribri hanggan ti manhagad awat sa kangku. Alalahana niyu sida ni Abraham ni Sara kanyu manga ginurang. Parihu sida sa batu nagpikahan ngatay nagkalihan sa kanyu. Kaybi tinawagan niku si Abraham, usa-usa siya, dapat pinapaladan niku siya ag pinakan-an mayamu pag linahi.

³ “Kaawaan niku ti Hirusalim nawayak. Ti manga tigangan buwatun niku ga halamanan Idin. Humari sa Hirusalim ti kabayaan, ti pagpasalamat hanggan ti karantahan.

⁴ “Manga nasakupan niku, pagpatingi kamu sa kangku. Patingihi niyu aku, nasyun niku! Ipakaun niku kang kasuguan ag sumirbi inda sulu sa manga nasyun.

⁵ Arani yi niku kamu pakan-an panalu. Udyi dumugay, iribri yi niku kamu. Aku ti mandumara sa manga nasyun. Ti manga sa ararayu pag rugar mag-alagad sa kangku, maghingabut sa kang kamaskihan.

⁶ Bantayi niyu ti langit hanggan ti kalibutan. Madura ti langit ga anus, madaut ti kalibutan ga rutay, mamatay ti manga nasakupan ga manga iyay. Dapat kang iayaw pag karibrihan pumirmaminti hanggan aban. Ti panalu ag katuwiran ginan sa kangku mapasa-kanyu hanggan aban.

⁷ Pagpatingi kamu sa kangku, kamu ti manga may alam nu hintay ti kang-ud ag magsunud sa kang kasuguan! Danga kamu magkadala sa manga magpakay-a ag magpuya pag manga tawu sa kanyu.

⁸ Dahil miparihu sida sa rutay pag arit-itun iyay. Dapat ti panalu ag katuwiran kang iayaw pumirmaminti hanggan aban. Ti karibrihan ginan sa kangku mapasa-kanyu hanggan aban.”

⁹ Panginuun, awati yi duy nimu kami. Gamita yi nimu kanmu kamaskihan sa pagribri sa kanmi. Awati nimu kami parihu sa binwat nimu kaybi. Balaw aw kawu ti nagtuktuk sa daragun si Rahab?

¹⁰ Bukun aw kawu diman duy ti nagpak-at dagat, nagbuwat dalan sa kay karaw-an inda hampay makadipay kanmu nasakupan, ti irinibri nimu sa Ihiptu?

¹¹ Kanmu manga linukat bumalik sa Siun magkarantahan may kabayaan unman may katapusan. Madura yi kanda karukuan, ag manlapwas kanda kabayaan.

¹² Sinmagut ti Panginuun, “Aku ti nagpabisug ag nagpasulung sa kanyu. Nakan hayga kamu madala sa kaparihu niyu tawu mamatay diman ga ilamnun?

¹³ Aku aw magkalimtan yi niyu? Aku ti naglalang sa kanyu? Aku ti nagladlad sa langit hanggan ti nagpauli paratukawan kalibutan. Hayga magkabuhi kamu magkadala sa isug manga mag-api ag magkaibug rumuris sa kanyu? Kanda isug balaw makadaut sa kanyu.

¹⁴ Balaw dumugay palpasan di ti manga nabihag sa kanyu. Balaw sida mamatay sa kanda pirisuhan ag balaw diman sida maduraan karan-unun.

¹⁵ Dahil aku, ti Panginuun niyu Diyus, ti magpatandug sa manga humbak dagat bag-u maghagunung inda. Kang ngaran Yawi, ti Panginuun Makamaskihan sa tanan.

¹⁶ Itinudlu niku sa kanyu kang bagaw, ag pagbaliwahan niku kamu sa panab-anan niku kamaskihan. Aku ti nagpauli langit hanggan paratukawan kalibutan, ag aku ti magkumun sa Israil, ‘Kawu kang nasakupan.’ ”

¹⁷ Hirusalim, pagbangun kawu! Ti pangagalit Panginuun ga intus ininum nimu tanan tugka kawu sa magpasuray-suray sa langu.

¹⁸ Unman una di usa sa kanmu tawuhan ti nanagabay sa kanmu; unman una di usa sa kanda ti nangawat sa kanmu.

¹⁹ Duwa ka kakurian ti nangyari sa kanmu: Nawayak kawu dahil sa girahan, ag nag-agwanta sa lun-us kanmu manga nasakupan. Unman may nasawad sa manga nasakupan nimu ti mangalaga ag mamasulung sa kanmu.

²⁰ Magpanlulubay sida ag mag-iribugtang sa manga baklayan. Parihu sida sa karasyaw nasduk sa lambat. Nakalakaw sida masyadu pag pangagalit Panginuun; sinungyaw sida Diyus.

²¹ Nakan patingihi niyu inda, kamu pag manga mag-agwanta ag nalangu balaw dahil sa intus.

²² Inda ti pagsabihun Panginuun niyu Diyus ti mag-apin sa kanyu: “Pagpatingi kamu! Bin-ul yi niku kang pangagalit ga intus makapalangu sa kanyu. Balaw yi niku kamu painmun utru inda.

²³ Iayaw niku inda sa manga nagpakuri sa kanyu hanggan sa manga nagsugu sa kanyu pagpadapa hampay tat-an nida kamu. Tinat-an nida kanyu manga dayu ga maglakaw sida sa manga baklayan.”