Isayas 50 - Hanunuu

¹ Magkun ti Panginuun sa kay manga nasakupan, “Ipinurya aw lugud niku ti Hirusalim parihu sa usa ka lalaki nanayak sa kay asawa? Puruybahan niyu! Ipinabihag yi aw niku kamu parihu sa usa ka tawu ipinabili kay manga anak sa kay inutangan hampay buwatun suruguun bayad sa kay utang? Unman gid! Ipinabili kamu dahil sa kanyu kasalanan. Dinayu ti Hirusalim dahil sa kanyu paglapastangan.

² Hayga balaw niyu aku binati katpung sa kang pagras-ug? Hayga balaw kamu nagsagut katpung pagtawagan niku kamu? Balaw aw lugud niku kamu kaya iribri? Kaya ngani niku pak-atun ti dagat sa usa lang ka bagaw. Kaya diman niku buwatun tigangan ti sapa hampay mamatay ti manga isda.

³ Kaya diman niku padulumun ti langit parihu sa rutay panruku kay ka biru.”

Ti Masurundun pag Manugsirbi Diyus

⁴ Tinudluan aku Panginuun Diyus nu hintay ti sabihun niku hampay maparig-un ti manga maglumuy. Pagpulawun niya aku kada surip hampay patingihan ti manga pag-itudlu niya sa kangku.

⁵ Nagbagaw sa kangku ti Panginuun Diyus ag namatingi aku. Balaw aku naglabag ngatay naglayas sa kanya.

⁶ Isinarangu niku kang dayu sa manga nagbakul sa kangku ag isinarangu diman niku kang uyahun sa manga nag-ayit kang bungut. Pinabay-anan niku sida pakay-ahun aku hanggan bug-anan kang uyahun.

⁷ Dapat balaw aku nakaramdam kay-a, dahil inawatan aku Panginuun Diyus. Nakan napaganit aku ga tanang batu, dahil alam niku balaw aku mangay-a.

⁸ Arani sa kangku ti Diyus magpatutuu kuntay unman aku may kasalanan. Malu, si unu ti pumanghas manhabla sa kangku? Pagluwang siya, saranguha aku!

⁹ Pagpatingi kamu! Ti Panginuun Diyus imaw ti mag-awat sa kangku. Si unu ti makasabi nagkasala aku? Miparihu sida sa rutay magkarunut, uta-utahun manga iyay.

¹⁰ Si unu sa kanyu ti may dala sa Panginuun ag magsunud sa pag-itudlu niya manugsirbi? Kailangan pagpaniwala siya sa Panginuun Diyus una sa dalan madulum unman may rayaw.

¹¹ Dapat pag-aman kamu, kamu pag magpamakut, danga kamu magsarig sa sadili hiyaput! Panginuun gid ngapu ti pumarusa sa kanyu; magkaramatay kamu sa masyadu pag parusa.