Isayas 5 - Hanunuu

Kanta tungkul sa Ubasan

¹ Manganta aku tungkul sa ubasan niku mahal: May ubasan kang mahal ati sa tagudtud sa maabunu pag daga.

² Inaradu niya inda, ipinasaruy di ti manga batu, ag tinanuman pinakamayad gid pag ubas. Namatindug siya usa ka barantayan pag bantayaw sa inda pag ubasan, ag namabuwat pirigsan ubas sa batu. Siyun gin, mag-alagad siya mamurak inda matagsing, pat-ay namurak inda maaslum.

³ Nakan inda ti pagsabihun may apu ubasan: “Kamu manga nasakupan Hirusalim ag Huda, pihua niyu aku hanggan kang ubasan.

⁴ Hintay waya kang nalimtan buwatun para sa kang ubasan? Matagsing pag burak ti pagsarigan niku, dapat pagka pinuti niku maaslum inda.

⁵ “Sabihun niku sa kanyu ti buwatun niku sa kang ubasan. Bul-un niku ti manga halaman sa kay sangput magsirbi alad sa ubasan ag dautun niku kay alad batu hampay kan-un ag tatatataan manga hayup ti manga tanum ubas.

⁶ Pabay-anan yi lang niku inda ag balaw yi asikasuhun. Balaw yi niku inda puldan kay manga sanga ngatay balubuan kay puun. Pabay-anan yi lang niku mibusul sa manga ilamnun ag manga halaman madugi. Bag-u suguun niku ti manga rurum tubay yi inda padna uran.”

⁷ Ti ubasan Panginuun Makamaskihan kay pag-alagaan ag makapakaun mana kabayaan sa kanya imaw yi ngani ti Israil ag Huda. Magsarig siya mangugali sida sa katadlungan dapat nadnugan ngap niya ti maglulumian manga pag-unuunuhun.

Ti Binuwat manga Tawu pag Kadautan

⁸ Kaawaawa kamu manga magpayamu manga balay ag magpalaun kanyu manga daga hanggan di sa magkaapiki yi ti iba ag kamu wadi ti mag-uli sa tunda pag daga.

⁹ Magkun sa kangku ti Panginuun Makamaskihan, “Tunda pag daraka ag mararinu pag manga balay balaw yi maulian.

¹⁰ Ti duwa ka iktarya ubasan tumubas lang unum ka galun intus. Ag ti sampulu ka takal binhi tumubas lang usa ka takal.”

¹¹ Kaawaawa kamu ti manga surip waya magbangun hampay man-umpisa man-inuman ag manlanguhan tugka sa yabi.

¹² May manga patunug waya kamu hanggan manga intus sa kanyu manga karan-an. Dapat balaw niyu pag-intindihun ti pagbuwatun Panginuun.

¹³ Nakan kamu pag manga nasakupan niku bihagun dahil unman niyu magkasalman kang pagbuwatun. Kamu hanggan kanyu manga takinan magkaramatay sa lun-us ag uwaw.

¹⁴ Magkabukas yi maluang ti kalubngan. Pag-alagdun maipaslud sa kanya ti manga kilala ag makapangyarihan pag nasakupan Hirusalim, hanggan ti manga nasakupan mag-iringayan ag magbarayaan.

¹⁵ Nakan ipakababa ti tanan tawu, lalu yi ti manga marapadayaw.

¹⁶ Dapat ti Panginuun Makamaskihan dayawun sa kay magpihu. Sa panab-anan matadlung niya pagpihu, pag-ipakakit niya siya Banal pag Diyus.

¹⁷ Ti nawayak pag banwa imaw ti pag-ulian manga mayaman, binuwat lang pasturan manga karanidu.

¹⁸ Kaawaawa kamu manga manugbuwat kadautan nakahigut sa panab-anan kapudilan.

¹⁹ Pagsabihun waya niyu, “Daldaliun mana Banal pag Diyus Israil buwatun ti pagsabihun niya pag parusa hampay makitan yi nimi. Pagtutuu mana kay gayak, hampay maalaman nimi inda.”

²⁰ Kaawaawa kamu ti magsabi kuntay ti daut mayad ti mayad daut. Ti kadudulman pagsabihun niyu rayaw ag ti rayaw pagsabihun niyu kadudulman. Ti mapait pagsabihun niyu matagsing ag ti matagsing pagsabihun niyu mapait.

²¹ Kaawaawa kamu, kamu pag manga mag-isip madunung ag matinudukun.

²² Kaawaawa kamu, kamu pag manga mabisug mag-inum intus ag anad sa magsimbug.

²³ Pagpalpasan niyu ti manga may kasalanan dahil may pabagsak, dapat unman niyu pagpakan-an katadlungan ti ud may kasalanan.

²⁴ Nakan miparihu kamu sa dayami ngatay sa layung ilamnun mairub apuy. Miparihu diman kamu sa tanum kay manga gamut magkaluu ngatay busang pag-ipayag durus ga taypuk, dahil ipinurya niyu ti Kasuguan Panginuun Makamaskihan, ti Banal pag Diyus Israil.

²⁵ Nakan dahil sa masyadu pag galit Panginuun sa kanyu sa kay nasakupan, parusahan niya kamu. Matandug ti manga bantud ag magkarawayak sa manga baklayan kanyu manga bangkay ga manga paruk. Dapat udwaya gid maparaw kay pangagalit Panginuun. Nakaalistu di siya pumarusa sa kanyu.

²⁶ Paamanan niya ti manga nasyun sa arayu; palwitan niya ti manga mag-uli sa pinakaarayu pag bahagi kalibutan, ag kadaka sida rumas-ug hampay girahun kawu.

²⁷ Una di usa sa kanda unman paggasaun ngatay mitalakpa, ag unman diman pagtungkaun ngatay magkaturug. Unman magkalapsu kanda huragkus ngatay mabugtas kanda higut lapak.

²⁸ Maratarum kanda manga ugyung, alistu kanda manga bayi. Ti kuku nida manga kabayu parihu sa maganit pag batu, ag ti buyung nida gulung kalisa ga buhawi.

²⁹ Sa kanda maggira manringgit sida ga liyun mag-ngurub. Kanda mablay daran-un nida atag sa arayu pag rugar ag unman may makaribri inda sa kanda.

³⁰ Sa udas gumira sida sa Israil, manringgit sida ga hagunung dagat. Ag nu bantayan manga tawu ti daga Israil, kanda makitan kadudulman ag kakurian. Ti karayawan matakluban madamul pag rurum.