Isayas 49 - Hanunuu

Ti Buruwatun Manugsirbi sa Diyus

¹ Pagpatingi kamu sa kangku, kamu ti manga mag-uli sa ararayu pag rugar: Udwaya aku ilinusad, pinili yi aku Panginuun hampay manirbi sa kanya.

² Binuwat niya ga baladaw kay katarum ti manga bagaw niku. Pag-alagaan niya aku sa panab-anan niya kamaskihan. Binuwat niya aku ga magkislap pag ugyung alistu yi gamitun.

³ Magkun siya sa kangku, “Israil, kawu kang manugsirbi. Sa panab-anan nimu, galangun aku manga tawu.”

⁴ Dapat magkun aku, “Kang kakurian unman may pulus; inuyang niku kang kabisugan sa ud may pulus.” Dapat iinintirga niku inda sa Panginuun niku Diyus. Siya ti mamakaun pirimyu sa kang manga binwat.

⁵ Ti Panginuun ti nagpili sa kangku hampay manugsirbi niya, hampay pabalikun sa kanya ag tipunun ti manga Israilita. Kinilala aku Panginuun niku Diyus ag pinakan-an kabisugan.

⁶ Magkun siya, “Kawu kang manugsirbi, mayamu waya pag manga buruwatun ti ipabuwat niku sa kanmu, purya sa pagpabalik nimu sa kang pag-alagaan pag manga Israilita. Buwatun waya niku kawu sulu manga nasyun, hampay maribri ti buu kalibutan.”

⁷ Ti Panginuun, ti Manugribri ag Banal pag Diyus Israil, magkun sa tawu pagpuyaan ag pagkayagtingan manga nasyun hanggan manugsirbi manga takinan, “Makitan manga hari nu si unu gid ungud kawu ag tumindug sida hampay galangun kawu. Ti manga takinan yumuk-ub sa kanmu. Mangyari inda dahil sa kangku, ti Panginuun matinupadun, ti Banal pag Diyus Israil. Aku ti nagpili sa kanmu.”

Ipatindug Uman ti Hirusalim

⁸ Inda ti pagsabihun Panginuun, “Sa kang-ud pag kaudasan iribri niku kawu, dungugun ag awatan. Alagaan niku kawu, sa panab-anan nimu, bumuwat aku kasunduan sa manga tawu. Utru nimu ipatindug ti daga Israil nawayak, bag-u ipakaun nimu inda sa kang manga nasakupan.

⁹ Sabihun nimu sa manga Israilita nabihag hanggan sa napirisu sa kadudulman, ‘Pagluwas kamu! Ribri yi kamu!’ “Miparihu sida sa manga karanidu magharab sa saruy manga dalan ngatay sa manga padang.

¹⁰ Balaw sida lun-usun ngatay uwawun. Balaw sida masinggitan masyadu pag singgit init ngatay mainit pag durus sa pangawakawaan. Dahil aku ti magpahalaga sa kanda imaw ti gumiya sa kanda tabug sa manga bulbugan.

¹¹ Buwatun niku lakawan nida kang manga bantud. Ti manga rugar arabwat bumaliw baklayan.

¹² Rumas-ug kang manga nasakupan ginan sa arayu — ti iba ginan sa kanaway, ti iba waydi sa isalpan, ag ti iba ginan waya sa Sinim.”

¹³ Kalangitan, pagkanta kawu sa kabayaan. Pagmasulung kawu, Kalibutan! Pagkanta kamu, kamu pag manga bantud. Dahil kaawaan ag pasulungun Panginuun kay manga nasakupan magkakurian.

¹⁴ Dapat magkun ti manga nasakupan Hirusalim, “Pinabay-anan yi kami Panginuun; kinalimtan yi niya kami.”

¹⁵ Dapat sinmagut ti Panginuun, “Malimtan aw usa ka ina kay anak? Unman aw niya kaawaan kay ilinusad pag lapsag? Mahimu malimut ti usa ka ina, dapat aku, balaw magkalimut sa kanyu!

¹⁶ “Hirusalim, balaw gid kawu malimtan. Isinurat niku kanmu ngaran sa kang manga dalukap. Pirmi niku pag-isipun maipatindug maan kanmu manga alad batu.

¹⁷ Arani yi rumas-ug ti kanmu manga anak, ti utru mamatindug sa kanmu, ag ti manga nagwayak sa kanmu paighitun yi.

¹⁸ Bantayi nimu kanmu sangput; magtiripnan yi kanmu manga nasakupan hampay muli yi sa kanmu. Aku, ti Panginuun buhi, magsumpa ipadayaw nimu sida parihu sa babayi kalaslun magpadayaw kay sulung pamarinu bulawan.

¹⁹ Nidamhak kawu ag nagbaliw mapanglaw, dapat taynguna ulianan yi kawu nimu nasakupan. Unman yi sida harus mag-itabu sa kanmu. Ti manga nagwayak sa kanmu pumakarayu yi.

²⁰ Kanmu manga nasakupan nilusad sa udas nimu magpanruku sumabi sa kanmu, ‘Diit inda pag rugar para sa kanmi. Kailangan nimi ti mas daka waya pag rugar.’

²¹ Sumabi kawu sa kanmu sadili, ‘Si unu ti naglusad sa kanda para sa kangku? Nagkaramatay ti kayamuan niku manga nasakupan, nakan ngani nanhimanglaw aku. Ti iba sa kanda dinara bihag tag sa iba nasyun, usa-usa wadi aku. Nakan naan ginan tunda sida? Si unu ti nag-alaga sa kanda?’ ”

²² Inda ti pagsabihun Panginuun Diyus: “Pagpatingi! Paamanan niku ti manga nasyun, ibalik nida sa kanmu ti manga nasakupan nimu ga manga anak pagsalilihun.

²³ Sumirbi sa kanmu ti manga hari hanggan ti manga rayna; sida ti mangalaga sa kanmu manga anak. Manluhud sida sa kanmu bilang paggalang, ag pumasakup gid sida sa kanmu. Bag-u maalaman nimu aku ti Panginuun, ti manga magsarig sa kangku balaw mibuyu.”

²⁴ Mab-ul aw waya nguna nimu ti manga inagaw mahigpit pag manga sundalu? Mairibri aw waya nimu kanda manga binihag?

²⁵ Dapat inda kay sagut Panginuun, “Hu, mairibri nimu ti manga binihag manga sundalu mahigpit ag mab-ul waya nimu kanda manga inagaw. Dahil labanan niku ti manga maglaban sa kanmu ag iribri niku kanmu manga anak.

²⁶ Ipakaun niku sa manga mag-api sa kanmu kanda sadili bilug, bumaliw ga langu sida sa sadili nida dugu. Bag-u maalaman tanan tawu aku, ti Panginuun, kanmu Manugribri hanggan Manugpalpas, ti Makamaskihan pag Diyus ni Hakub.”