Isayas 48 - Hanunuu

Maganit ti Ulu manga Israilita

¹ “Pagpatingi kamu, manga linahi ni Hakub, pag-ingarnan Israil, ginan sa sinulput ni Huda. Magsumpa kamu sa ngaran Yawi, ti Panginuun, bag-u magtawag sa Diyus Israil. Dapat magpabalhinguun lang maaw, dahil balaw diman matadlung kanyu pangabuhi.

² Pagsabihun waya niyu kamu manga nasakupan banal pag banwa, ag magpaniwala kamu sa Diyus Israil, kay ngaran Panginuun Makamaskihan.”

³ Magkun siya sa kanyu, “Itinagka yi niku sa kabag-u di waya nu hintay ti manga mangyari sa aratubangun. Tunda kang pag isabuwat.

⁴ Alam niku nu kabitay ka ganit kanyu ulu. Kanyu liug parihu kay ka ganit sa baul, kanyu bangas parihu kay kaganit sa galang.

⁵ Nakan ngani pagsabihun yi niku daan sa kanyu kang buwatun. Udwaya inda magpangyari ipinaalam yi niku sa kanyu hampay balaw kamu sumabi kanyu manga diyus-diyusan buwat sa kayu hanggan baul imaw ti nagtagka ag nagbuwat inda.

⁶ Nadnugan niyu kang manga ihinula, nakitan niyu kay katupadan inda, dapat dayu niyu tanggapun aku ti nagbuwat inda. Ginan taynguna, tultulan niku kamu bag-u pag manga bagay balaw waya niku ipinaburayhaw sa kanyu; unman waya niyu magkaalaman.

⁷ Taynguna di waya inda pag buwatun, hampay balaw kamu sumabi alam yi niyu inda.

⁸ Balaw niyu napatingihan ngatay naintindihan inda pag manga bagay dahil ginan waya kaybi magpabungul-bungul yi kamu. Alam niku kanyu kapudilan, dahil ginan di waya sa kanyu pagkalusad maglaban yi kamu.

⁹ Para sa kang kadayawan, amparahun niku kang pangagalit sa kanyu, hampay balaw kamu maruris.

¹⁰ Lumpiyuhun niku kamu, dapat balaw parihu sa paglunsay sa pilak, dahil lumpiyuhun niku kamu sa panab-anan kakurian.

¹¹ Buwatun niku inda para sa kang kadayawan. Balaw gid aku pumasnu mangay-a aku ag madayaw ti iba pag diyus.

¹² “Pagpatingi kamu sa kangku, kamu pag manga taga Israil kang ipinasaman. Aku ti Diyus; aku ti gimpuunan ag ti katapusan tanan.

¹³ Aku ti nagpauli paratukawan kalibutan hanggan aku diman ti nagbuklad kalangitan. Nu magsugu aku sa kanda, pagsundun nida.

¹⁴ “Pagtipun kamu tanan pagpatingi: Si unu sa manga diyus-diyusan ti naghula kuntay mangyari? Unman gid! Pinili niku kang ampud hampay girahun ti Babilunya hampay sundun kang pag-ipabuwat laban sa tunda pag nasyun.

¹⁵ Aku gid ngap ti nagsabi sa kanya, aku diman hanggan ti nagtawag sa kanya. Sinugu niku siya ag nanalu siya sa kay manga binwat.

¹⁶ Pagpakarani kamu sa kangku ag patingihi inda: Ginan di waya sa umpisa unman aku nagbagaw sa lihim, sa udas nangyari ti pagsabihun niku, asan di aku.” Ag taynguna ti Panginuun Diyus hanggan kay Ispiritu nagpadara sa kangku hampay itultul kay bagaw:

¹⁷ “Magkun ti Panginuun kanyu Manugribri, ti Banal pag Diyus Israil: Aku ti Panginuun niyu Diyus ti nagtudlu sa kanyu nu hintay ti mayad para sa kanyu, aku diman ti naggiya sa kanyu tabug sa hustu pag dalan.

¹⁸ Nu nagsunud lang kamu sa kang manga sugu, binmulus mana ga sapa ti manga papalad sa kanyu, dasun-dasun mana kanyu panalu ga humbak maghampak sa baybay.

¹⁹ Kanyu mana manga linahi nagbaliw ga baras kay kayamu dayu mabilang, balaw gid sida midamhak sa kang atubangan.”

²⁰ Pag-ighit kamu sa Babilunya! Ipaburayhaw niyu may kabayaan sa buu kalibutan kuntay irinibri Panginuun kay manugsirbi, ti nasakupan Israil.

²¹ Balaw sida inuwaw igu giniyahan Diyus sa manga pangawakawaan, dahil pinabulus niya ti danum ginan sa batu para sa kanda. Binuswang niya ti batu ag binmulus ti danum.

²² Dapat ti daut unman magkaimaw kahusayan, magkun ti Panginuun.