Isayas 47 - Hanunuu

Ti Pagkadamhak Babilunya

¹ Magkun ti Panginuun, “Babilunya, manukawan kawu sa daga. Manukawan kawu unman may tukawan hari. Kawu parihu sa tugnaw pag babayi, balaw yi tawagun mabuut ag maalumanay.

² Usa kawu ka suruguun taynguna, nakan pagbuul kawu batu galingan ag paggaling kawu tirigu. Bul-a yi nimu kanmu tumung, lilisa kanmu rutay hampay makitan kanmu balangbang sa magdipay sa sapa.

³ Makitan kawu uba-uba ag mangay-a kawu. Bumalus aku sa kanmu, balaw niku kawu kaawaan.”

⁴ Kanta Manugribri, kay ngaran Panginuun Makamaskihan, ti Banal pag Diyus Israil.

⁵ Magkun waya ti Panginuun “Babilunya, pagtukaw kawu mahim-ung ati sa basad dulum. Balaw yi kawu ingarnan rayna manga kaharian.

⁶ Nangisug aku sa kang nasakupan ag ipinurya niku sida. Nakan ipinakaun niku sida sa kanmu manga kamang, balaw nimu sida kinaawaan. Una ti manga gurangun kanmu hinigpitan.

⁷ Magkun waya kawu kanmu pagka rayna unman may katapusan. Dapat balaw nimu inisip kanmu manga binwat, nu hintay ti patabgan nimu aban sa uryan.

⁸ Nakan patingihi nimu inda, kawu mairibgun sa kasulungan ag mag-isip ribri yi. Pagsabihun nimu sa kanmu sadili kuntay kawu yi ti diyus udyi may iba waya. Pag-isipun nimu balaw kawu maburanday ngatay maduraan manga anak.

⁹ Dapat kadaka inda mangyari sa kanmu: Maburanday kawu ag maduraan manga anak. Matupad gid inda sa kanmu una mayamu waya kanmu alam salumangka ngatay pangiwaan.

¹⁰ Magpaniwala kawu balaw midamhak sa kanmu magbuwat kadautan, dahil pag-isipun nimu balaw may maghiling sa kanmu. Pag-ipatalang kawu nimu kadunungan hanggan kaalaman, tunda diman kay dahilan nu hayga pagsabihun nimu kawu ti diyus udyi may iba waya.

¹¹ Nakan ngani rumas-ug sa kanmu ti kadamhakan, unman nimu alam nu kabitay tunda mipakarayu sa panab-anan nimu manga salumangka. Rumas-ug diman sa kanmu ti sarut balaw nimu mabayadan hampay umapas. Kadaka rumas-ug sa kanmu ti kadamhakan balaw nimu pag-isipun mangyari.

¹² Gamita kanmu manga salumangka hanggan manga pangiwaan, imaw kanmu pagbuwatun ginan waya sa kanmu pagkaanak. Barang manalu kawu, ngatay barang madala sa kanmu ti manga kalaban nimu.

¹³ Pagbudlayun yi kawu sa mayamu nimu paraan. Pagpaawat kawu sa kanmu manga tawuhan mag-adal tungkul sa manga pamgasan hanggan manughula kada bulan tungkul sa magpangyari sa kanmu.

¹⁴ Kay tutuu, parihu sida sa manga dayami madali magkairub. Unman nida mairibri kanda sadili sa apuy. Inda pag apuy unman may baga nakan madali magkapsa. Nakan unman mapanarangan.

¹⁵ Malu, hintay ti mabuwat manga tawu kanmu paghagadan paanyu ginan sa anak waya kawu? Ti kada usa sa kanda nagtalang sa dalan ag unman rumibri sa kanmu.