Isayas 46 - Hanunuu

Ti manga Diyus-diyusan Babilunya

¹ Ti manga diyus-diyusan Babilunya sida ni Bil ni Nibu mahuwayan nu pag-ikarga sa kalisa pagguyudun manga asnu. Mabuyat sida, makargahan sa manga budlay yi pag hayup.

² Maigyaan sida, balaw nida kaya iribri ti may dara sa kanda, nakan hanggan sida nabihag.

³ Pagpatingi kamu sa kangku, manga linahi ni Hakub, kamu ti manga nasawad pag nasakupan Israil. Pag-alagaan niku kamu ginan sa pagkalusad.

⁴ Alagaan niku kamu tugka sa maggurangun ag manlagti kanyu buhuk. Linalang niku kamu nakan kamu alagaan niku. Awatan niku kamu ag iribri.

⁵ Sa kantapu niyu aku pag ipaparihu? May imaw aw aku kaparihu?

⁶ Ti iba pag manga tawu magbulwat kay manga gintu ngatay pilak pagbayadan nida ti panday-pilak hampay buwatun tunda tawu-tawu bag-u kanda luhudan ag sambahun.

⁷ Pagpas-anun nida inda pag-ipauli sa kay palaulian ag ati lang dahil balaw waydi inda makakimut. Nu may mandarangin sa kanya, balaw diman siya makasagut hanggan makaawat sa udas kakurian.

⁸ Kamu pag manga manuglaban, tandai niyu inda ag tanuman sa kanyu isip.

⁹ Alalahana niyu kang manga binuwat kaybi sa un-an pag udas. Aku lang ti Diyus, udyi may iba pumarihu sa kangku.

¹⁰ Sa umpisa di waya, sinabi yi niku ti manga mangyari sa aratubangun. Kang manga ibinurayhaw pihu gid matupad, buwatun niku ti tanan niku gustu buwatun.

¹¹ Manawag aku usa ka tawu ginan sa butlakan sa arayu pag rugar, siya ti bumuwat kang manga gayak. Maipaparihu niku siya sa usa ka manuk manugdagit. Buwatun niku kang manga pagsabihun hanggan kang ginayak.

¹² Pagpatingi kamu sa kangku, kamu pag manga lapastangan. Balaw gid niyu malakawan ti kapanaluhan may katuwiran.

¹³ Balaw yi dumugay, ipakaun niku ti panalu hanggan ti katadlungan sa Hirusalim. Arani yi niku inda iribri; kilalan-un niku ti Israil.