Isayas 45 - Hanunuu

Pinili Diyus si Sayrus

¹ Pinili si Sayrus Panginuun hampay pabisugun kay kapangyarihan, ag hampay sakupun ti manga nasyun, taluhun ti manga hari. Bukasan niku ti manga sabian nida banwa bag-u agawun, danga yi tunda pagtalakpi. Inda ti pagsabihun Panginuun sa kan Sayrus:

² “Aku ti mangalistu kanmu lakawan, ratagun niku ti manga bantud. Dautun niku ti manga sabian galang hanggan ti manga puwirtahan baul.

³ Ipakaun niku sa kanmu ti manga mataguan pag kayamanan, hampay maalaman nimu aku ti Panginuun, ti Diyus Israil imaw ti nagtawag sa kanmu.

⁴ Tinawag niku kawu hampay awatan nimu ti Israil kang manugsirbi, ti pinili niku pag nasakupan. Kinilala niku kawu una unman waya nimu aku kilala.

⁵ Aku ti Panginuun, udyi may iba waya; purya sa kangku udyi may iba Diyus. Pabisugun niku kawu una unman nimu aku kilala,

⁶ hampay maalaman nasakupan sa buu kalibutan unman may iba Diyus purya sa kangku. Aku ti Panginuun, udyi may iba waya.

⁷ Aku ti naglalang rayaw hanggan dulum. Aku tig padara kaayadan ag kadamhakan. Aku, ti Panginuun, ti nagbuwat sa tanan.

⁸ Pumakaun aku panalu, ga uran magkaragdag gin tungud. Matanggap inda manga tawu sa kalibutan. Lumantap ti karibrihan hanggan ti kapanaluhan may katadlungan ga tanum magtubu. Aku, ti Panginuun, ti nagbuwat inda.

⁹ Kaawaawa ti tawu maglaban sa Diyus sa kay Manuglalang. Parihu siya sa anglit. Makariklamu aw ti lutuk sa manugbuwat anglit kuntay hintay kanmu buwatun? Makariklamu aw siya kuntay unman may kaya ti manugpanday anglit?

¹⁰ Kaawaawa ti anak magkumun sa kay gurang, ‘Hayga kainda kanyu nagbuwat sa kangku?’ ”

¹¹ Inda waya ti pagsabihun Panginuun, ti Banal pag Diyus Israil, ti naglalang sa kanya, “Magriklamu aw kamu sa kang manga pagbuwatun? Pagsuguun aw niyu aku sa manga dapat niku buwatun?

¹² Aku ti nagbuwat kalibutan hanggan ti tanan magpangulian siyun. Kang manga kamang ti nagbuklad sa langit, aku ti nagsugu sa init, sa bulan hanggan sa manga pamgasan kuntay pagluwang.

¹³ Aku ti nagtawag kan Sayrus hampay buwatun kang manga turunu. Buwatun niku kang-ud ti tanan palakaw niya. Ipatindug niya uman kang banwa ag palpasan niya kang manga nasakupan binihag. Buwatun niya inda balaw dahil sa pinakan-an siya upa aw ngatay pinirimyuhan. Aku, ti Panginuun Makamaskihan, ti magsabi inda.”

¹⁴ Magkun ti Panginuun sa Israil, “Masakup nimu ti Ihiptu, ti manga taga Itiyupya hanggan ti manga taga Siba kanda kalalakihan arabwat. Ataytag sida sa kanmu dara kanda kayamanan hanggan manga inani. Sida bumaliw bihag nimu. Manluhud sida sa kanmu ag sumabi, ‘Tutuu ungud ti Diyus kaibahan nimu, siya lang ti Diyus!’ ”

¹⁵ Diyus ag Manugribri Israil, balaw nimu pag-ipakakit kanmu sadili.

¹⁶ Mangay-a gid ti tanan magbuwat diyus-diyusan.

¹⁷ Dapat ti Israil iribri di nimu, Panginuun, kanda karibrihan unman may katapusan. Balaw yi gid sida mangay-a una kapira.

¹⁸ Kawu, Panginuun, ti Diyus. Kawu ti naglalang langit hanggan kalibutan. Balaw nimu binuwat ti kalibutan ud may magkabuhi. Binuwat nimu inda hampay ulianan. Magkun kawu, “Aku ti Panginuun, udyi may iba waya.

¹⁹ Balaw aku nagbagaw sa lipudan, sa unman may nakaalam. Balaw niku sinabi sa manga linahi ni Hakub kuntay pagpakarani sida sa kangku, unman diman waydi sida may matanggap sa kangku. Aku, ti Panginuun, magbagaw tutuuhanan. Pagsabihun niku nu hintay ti tama.”

²⁰ Magkun waya ti Panginuun, “Pagtipun kamu tanan pagpakarani sa kangku, kamu ti manga naglayas ginan sa manga nasyun. Unman gid may alam ti manga magdara manga diyus-diyusan kayu. Magdarangin sida sa tunda pag manga diyus-diyusan, balaw diman waydi makaribri sa kanda.

²¹ Pagparaingan-an kamu sa usa kag sa usa, bag-u padnugan niyu kanyu katuwiran. Si unu lugud ti naghula kaybi tungkul sa manga bagay mangyari? Unman aw aku, ti Panginuun? Unman may iba Diyus nu unman aku lang — ti matadlung pag Diyus ag Manugribri.

²² “Pagpakarani kamu sa kangku hampay maribri, kamu tanan sa buu kalibutan. Dahil aku ti Diyus, purya sa kangku udyi may iba waya.

²³ Nagsumpa aku sa kang sadili, ti manga pagsabihun niku balaw yi mauman: Manluhud ti tanan tawu sa kangku ag mansumpa sida sumunud sa kangku.

²⁴ Sumabi sida, ‘Sa panab-anan lang Panginuun ti tawu magkaimaw kabisugan hanggan panalu may katuwiran.’ ” Ti tanan magkagalit sa Panginuun pumakarani sa kanya ag mangay-a.

²⁵ Sa awat Panginuun ti tanan linahi ni Israil makalakaw panalu may katuwiran ag dumayaw sida sa kanya.