Isayas 44 - Hanunuu

Ti Panginuun lang ti Diyus

¹ “Dapat taynguna, pagpatingi kawu, Israil kang manugsirbi, ti ipinasaman niku pag nasakupan, kan Hakub manga linahi.

² Aku, ti Panginuun, ti naglalang hanggan ti mag-awat sa kanmu. Danga kawu magkadala, Hakub, kawu kang manugsirbi, Israil, hanggan kang pinili.

³ Dahil pakan-an niku kawu danum pamaraw uwaw hanggan humaug sa kanmu tigangan daga. Ipakaun niku kang Ispiritu sa kanmu linahi ag papaladan niku sida.

⁴ Lumangba sida parihu sa tanum abunda sa danum ngatay parihu sa manga kayu sa saruy sapa.

⁵ May manga sumabi, ‘Aku sa Panginuun,’ may sumabi diman, ‘Aku linahi ni Hakub.’ May imaw diman mamauli marka sa kanda manga kamang pangaran Panginuun, ag ipaparihu kay sadili minsan sa nasakupan Israil.”

Unman may Pulus ti manga Diyus-diyusan

⁶ Inda ti pagsabihun Panginuun, ti Hari ag Manugribri Israil, ti Panginuun Makamaskihan, “Aku ti umpisa ag ti katapusan tanan. Purya sa kangku udyi may iba waya Diyus.

⁷ Si unu ti makaparihu sa kangku? Tultulan niya sa kang atubangan nu hintay ti nangyari ginan sa ipinatindug niku usa ka nasyun kang nasakupan sa kabag-u pag panahun. Tultulan diman niya sa kangku nu hintay ti mangyari sa aratubangun.

⁸ Danga kamu magkadala ngatay kulbaan. Unman aw ipinaalam niku sa kanyu kaybi waya kang turunu? Kamu kang manga kastigus. May imaw waya aw iba Diyus purya sa kangku? Unman gid! Unman yi aku may alam kuntay may iba waya batu palalan-iban purya lang sa kangku.”

⁹ Unman may pulus ti tanan magbuwat diyus-diyusan. Tunda pag manga diyus-diyusan kanda pagpahalgaan unman may pulus. Sida diman ti makapagsabi tunda unman may pulus. Dahil tunda unman maghiling, unman diman may alam. Nakan ngani mangay-a ti manga magsamba siyun.

¹⁰ Unman may namuangan ti magbuwat diyus-diyusan unman diman waydi mapakinabangan.

¹¹ Tandai niyu! Ti tanan magsamba sa diyus-diyusan mangay-a gid, dahil ti nagbuwat tunda manga tawu lang diman waydi. Una manmirinsanan sida umatubang sa kangku, madala diman sida ag mangay-a.

¹² Ti manugpanday magbuul pulud baul bag-u pag-isawug sa baragahan. Siyun gin pagpilpigun niya inda masu agud humistuda tawu-tawu. Magpanlumuy siya sa lun-us, harus mabul-an malay sa uwaw.

¹³ Ti manugpanday magsukat usa ka pulud kayu. Pagrirukan niya inda histuda tawu. Bag-u paglahaban niya marinu pag histuda tawu sa panab-anan niya manga kagamitan hampay ipauli sa balay diyus-diyusan.

¹⁴ Hampay may magamit siya kayu, magpukan siya sidru, insina, ngatay sipris kay itinanum sa katalunan. Nantanum diman siya puun abitu, dahil pagpakauranun tinmubu diman inda.

¹⁵ Ti iba ka pulud kayu paggamitun niya pamagba, agud makapanarang siya ag makagatung karan-unun. Ti iba ka pulud kayu pagbuwatun niya tawu-tawu, pagluhudan niya ag pagsambahun.

¹⁶ Ti iba ka pulud kayu pag-ipagba niya bag-u siyun sa kay baga magsugba siya taguban. Bag-u pagkan-un niya kay sinugba ag magkabsug. Magpanarang diman siya sa apuy ag magkun, “Mayad gid magkaimbungan aku.”

¹⁷ Kay iba ka pulud kayu pagbuwatun niya diyus-diyusan. Magluhud siya ag magsamba sa tunda pag diyus-diyusan, bag-u magdarangin siya magkun, “Iribri nimu aku, dahil kawu kang diyus.”

¹⁸ Inda pag manga tawu unman may alam ngatay unman makaintindi sa kay pagbuwatun. Tinakluban nida kanda manga mata nakan unman sida makakit. Tinakluban diman nida kanda manga isip, nakan unman sida makaintindi.

¹⁹ Unman may makabaya magsabi, “Ipinagba niku ti iba ka manga kayu, bag-u nantama aku karan-unun hanggan nansugba taguban siyun sa kay baga, bag-u kang kinaun. Taynguna buwatun aw niku mayagting pag bagay ti nasawad pag kayu? Sambahun aw niku ti usa ka pulud kayu?”

²⁰ Ti manga magbuwat inda ga nangaun dapug. Ipinatalang siya niya daut pag kaisipan, balaw niya mairibri kay sadili. Balaw siya pumasnu kuntay ti tawu-tawu asan sa kanya balaw diyus.

²¹ Magkun waya ti Panginuun, “Israil, dahil kawu kang manugsirbi, isipa nimu inda: Linalang niku kawu agud sumirbi sa kangku. Balaw gid niku kawu kalimtan.

²² Kanmu manga kasalanan kang yi dinura ga rurum ngatay anitay. Pagbalik kawu sa kangku, hampay mairibri niku kawu.”

²³ Langit, pagkanta kawu sa kabayaan! Kalibutan, pagringgit kawu kamatnug! Manga bantud hanggan manga kayu sa katalunan, pagkanta kamu. Dahil iribri Panginuun ti linahi ni Hakub; ipakakit niya kay kadayawan sa Israil.

²⁴ Inda ti pagsabihun Panginuun kanyu Manugribri ti naglalang sa kanyu: Aku ti Panginuun ti naglalang tanan bagay. Aku lang usa ti nagladlad sa langit ag aku diman ti naglalang sa kalibutan.

²⁵ Ipinabuyu niku ti hula manga magpabalhingu purupita. Binwat niku busal ti manga manughula. Pagbaliskadun niku ti pagsabihun manga madunung, pagbuwatun niku ud may pulus kanda magkaalaman.

²⁶ Dapat pagtupadun niku ti hula niku manugsirbi hanggan manga manugbarita. Pagsabihun niku ti Hirusalim ulianan uman, hanggan ti iba waya pag banwa Huda nagkaradaut utru maan ipatindug.

²⁷ Nu sabihun niku mak-at ti sapa, mak-at gid inda.

²⁸ Magkun aku kan Sayrus, “Kawu ti manugbantay niku manga nasakupan ag buwatun nimu ti tanan niku gustu. Pagsugu kawu kuntay patindugan maan ti Hirusalim hanggan ti Balay Diyus.”