Isayas 43 - Hanunuu

Nanaratu ti Diyus kay Iribri ti Israil

¹ Dapat taynguna inda ti pagsabihun Panginuun ti naglalang sa kanmu, Ungud Israil: “Danga kawu magkadala dahil iribri niku kawu. Tinawag niku kawu sa kanmu ngaran, dahil kangku kawu.

² Nu lumakaw kawu sa danum, kaibahan nimu aku. Nu dumipay kawu sa manga sapa, balaw kawu malimus. Nu lumakaw kawu sa apuy, balaw kawu mairub; kay labdab balaw umunu sa kanmu.

³ Dahil aku ti Panginuun nimu Diyus, ti Banal pag Diyus Israil, kanmu Manugribri. Ipakaun niku sa iba ka nasyun ti Ihiptu, ti Itiyupya, hanggan ti Siba bilang ka ilis nimu.

⁴ Ipakaun niku ti iba ka manga tawu bilang ka ilis nimu, dahil kawu garalangun ag mahalaga sa kang magbantay, dahil pagmahalun niku kawu.

⁵ Danga kawu magkadala dahil kaibahan nimu aku. Tipunun niku kanmu manga linahi ginan sa butlakan tugka sa isalpan.

⁶ Sabihun niku sa manga nasyun sa kanaway hanggan sa salatan kuntay pabay-ani bumalik sa kanda daga kanmu manga linahi, ag pabay-ani muli una naan pag suuk kalibutan.

⁷ Sida pag manga tawu kang tinawag. Linalang niku sida para sa kang kadayawan.”

⁸ Magkun waya ti Panginuun, “Tawaga nimu kang manga nasakupan may manga mata, dapat unman makakit; may manga tuli dapat unman magdungug.

⁹ Tawaga nimu ti tanan nasakupan nasyun. Si unu sa kanda manga diyus-diyusan ti makahula sa aratubangun? Si unu sa kanda ti makasabi tungkul sa magpangyari taynguna? Ibahun nida kanda manga kastigus imaw ti puruyba sa kanda manga pagsabihun, hampay ti manga makadnug sumabi, ‘Tutuu gid ngani.’

¹⁰ Manga nasakupan Israil, kamu kang manga kastigus. Ipinasaman niku kamu kang manugsirbi, agud makilala niyu aku ag sumarig kamu sa kangku, bag-u masalman niyu aku lang ti Diyus. Ud may iba diyus inmuna sa kangku, unman diman may Diyus dumasun waya sa kangku.

¹¹ Aku lang gid ti Panginuun, purya sa kangku udyi may iba waya Manugribri.

¹² Ipinaburayhaw niku kamu kang iribri, tinupad ngani niku inda. Unman may iba diyus nagbuwat inda sa kanyu, kamu kang manga kastigus.” Magkun waya ti Panginuun, “Aku ti Diyus.

¹³ Ginan waya kaybi aku yi ti Diyus. Unman may makapalagiw ginan sa kang manga kamang. Unman may makauman sa kang manga pagbuwatun.”

Nanaratu ti Diyus Awatan Niya Kay manga Nasakupan

¹⁴ Inda ti pagsabihun Panginuun kanyu Manugribri, ti Banal pag Diyus Israil, “Hampay maribri kamu, ipagira niku ti Babilunya sa manga sundalu usa ka nasyun, mamalalagiwan ti manga taga Babilunya tabug sa kanda pag-ipadayaw pag manga barku.

¹⁵ Aku ti Panginuun, kanyu Banal pag Diyus, ti naglalang sa Israil, kanyu Hari.

¹⁶ Aku ti Panginuun, ti nagbuwat dalan sa karaw-an dagat.

¹⁷ Mininsan niku ti manga kalisa, manga kabayu, hanggan ti manga sundalu Ihiptu, bag-u winayak sa karaw-an dagat udyi sida nakabangun waya. Ga napsa sida pag sulu.

¹⁸ Dapat danga yi niyu pag-isipa ti manga nakalawuy,

¹⁹ dahil tuhay yi maan pag bagay kang buwatun. Magpangyari yi ngani inda. Unman aw lugud niyu mag-akitan? Mamuwat aku dalan hanggan manga bulbugan sa tigangan.

²⁰ Una ti talun hayup gumalang sa kangku hanggan ti talun idu ag manga bukaw, dahil pakan-an niku manga bulbugan ti tigangan, agud may mainum kang ipinasaman pag nasakupan.

²¹ Sida pag manga nasakupan kang linalang para sa kangku, agud dumayaw sa kangku.

²² “Dapat unman kawu naghagad awat sa kangku, Israil, nagbugya yi ngap kawu sa kangku.

²³ Udyi kawu maghandug karanidu sa kangku bilang handug pagsunugun. Balaw yi nimu aku pagkilalan-un sa panab-anan manga handug una balaw niku kawu pinakurianan ngatay pinabudlay sa paghagad manga handug pasalamat hanggan manga kamangyan.

²⁴ Unman nimu aku binilyan kamangyan ngatay pinasawaan manga taba hayup kanmu ihinandug. Bagkus ngap, pinakurianan nimu aku ag binudlay sa kanmu manga kasalanan.

²⁵ “Aku gid ngap ti maglumpiyu kanmu manga kasalanan para sa kang kadayawan, balaw yi niku tunda alalahanun waya.

²⁶ Isipun nita ti manga nakalawuy; mangaratubangan kita. Patutuuhanan nimu unman kawu may kasalanan.

²⁷ Nagkasala sa kangku kanmu un-an pag manga ginurang, naglaban sa kangku kanmu manga takinan.

²⁸ Nakan ipinauli niku sa kakay-ahan kanmu manga manughandug, ag kawu Israil ipinabahala niku sa kadamhakan hanggan sa kakay-ahan.”