Isayas 42 - Hanunuu

Ti Manugsirbi Panginuun

¹ Magkun ti Panginuun, “Inda kang pag pabisugun pag manugsirbi. Pinili niku siya ag magbaya aku sa kanya. Asan sa kanya kang Ispiritu, ilantag niya ti katadlungan sa manga nasyun.

² Balaw siya manringgit ngatay mamagaw mabisug sa manga baklayan.

³ Balaw niya pabay-anan ti manga malumuy kay pagsarig ag balaw niya patlikudan ti manga naduraan pag-asa. Ilantag niya ti katadlungan.

⁴ Balaw gid siya manlumuy ngatay maduraan pag-asa hanggan sa unman niya lubus naipalantap ti katadlungan sa buu kalibutan. Una ti manga tawu sa ararayu pag rugar manpatigagad sa kay manga tudlu.”

⁵ Inda ti pagsabihun Diyus, ti Panginuun naglalang langit ga kay linadlad inda ga rutay. Linalang niya ti kalibutan hanggan ti tanan asan. Siya diman ti magpakaun buhi sa manga tawu ag sa tanan linalang magkabuhi sa kalibutan.

⁶ Magkun siya sa kay manugsirbi, “Aku ti Panginuun magtawag sa kanmu hampay ipakakit kang katadlungan. Awatan ag alagaan niku kawu, sa panab-anan nimu mamuwat aku kasunduan sa manga tawu. Buwatun niku kawu parihu sa sulu magpakaun rayaw sa manga nasyun,

⁷ hampay pamuklatun ti manga buta, palpasan ti manga bihag, hanggan ti ipinaslud sa madlum pag pirisuhan.

⁸ Aku si Yawi, ti Panginuun! Tunda kang ngaran! Balaw niku iayaw una sa kantapu ngatay sa manga diyus-diyusan kang kagalangan hanggan ti manga pagdayaw para sa kangku.

⁹ Ti manga ihinula niku natupad gid, taynguna sabihun niku ti manga bag-u pag kabagayan bag-u inda matupad.”

Kanta Pagdayaw sa Panginuun

¹⁰ Pagkanta kamu manga bag-u pag kanta sa Panginuun! Pagkanta kamu manga pagdayaw sa kanya, una kamu ti asan sa pinakaarayu pag bahagi kalibutan. Dayawun niyu siya, kamu pag manga magpanakayan hanggan kamu tanan pag manga linalang sa dagat, ag kamu pag manga mag-uli sa ararayu pag rugar.

¹¹ Dayawun niyu siya, kamu pag manga asan sa pangawakawaan hanggan manga taga Kidar. Pagkanta kamu sa kabayaan, kamu manga taga Sila. Pamagrit kamu may pagdayaw sa katayung-tungan manga bantud.

¹² Galangun niyu ag dayawun ti Panginuun kamu manga sa ararayu pag rugar.

¹³ Gumira ti Panginuun ga usa ka sundalu alistu yi gid lumaban. Manringgit siya bilang pasandam girahan yi, ag manalu siya sa kay manga kalaban.

¹⁴ Magkun ti Panginuun, “Dugay yi pag panahun balaw aku nag-ingay ag pinigil niku kang sadili. Dapat taynguna, ipaagum niku kang pangagalit. Mamagrit aku ga babayi magpanganak.

¹⁵ Tumpagun niku ti manga bantud hanggan ti manga tagudtud, ag marubay ti manga tanum. Pamarahun niku ti manga sapa hanggan ti manga lasaan.

¹⁶ Abatun niku kang manga nasakupan buta sa katutuuhanan, tabug sa dalan udwaya nida nalakawan. Rayawan niku ti paglakawan nida madlum ag tadlungun niku ti manga nangunha-kunha pag dalan kanda paglakawan. Buwatun niku inda ag balaw niku sida pabay-anan.

¹⁷ Dapat ti manga magsarig sa diyus-diyusan, hanggan ti manga magpaniwala diyus kanda manga tinawu-tawu, malagiw gid dahil sa kakay-ahan.”

Ti Israil Ga Bungul ag Buta

¹⁸ Magkun ti Panginuun sa kay manga nasakupan, “Kamu pag manga bungul hanggan buta, pagpatingi kamu ag pagbantay!

¹⁹ Kamu kang manga manugsirbi hanggan pinili. Pagsuguun niku kamu kang manga manugbarita, dapat ud may makatupung sa kanyu magpabungul-bungulun ag magpabuta-butaun.

²⁰ Mayamu yi kanyu mag-akitan dapat balaw niyu pagpansinun. Magdungug kamu dapat unman kamu magpatingi!”

²¹ Gustu gid Panginuun galangun kay kasuguan agud maipakakit niya kay katadlungan.

²² Dapat taynguna kay manga nasakupan tinakawan, inagawan kasiyunan, ilinagpak sa kali ngatay ipinaslud sa pirisuhan, ag ud may nanribri sa kanda.

²³ May imaw aw sa kanyu magkaibug magpatingi aw ngatay magpakaun halaga sa kay nadnugan?

²⁴ Si unu ti nagpakaun pahintulut takawan ag agawan kasiyunan ti Israil? Unman aw ti Panginuun, siya ti pinagkasaraan nita? Dahil balaw nita sinunud kay manga palakaw hanggan kasuguan.

²⁵ Nakan ngani, ipinasamit Panginuun ti masyadu niya pag pangagalit sa kanta sa panab-anan pagpakuri sa kanta sa girahan. Kay pangagalit parihu sa apuy nagsangput, mag-irub sa kanta, dapat balaw nita inda pinansin aw ngatay inisip.