Isayas 41 - Hanunuu

Awatan Diyus ti Israil

¹ Magkun ti Panginuun, “Kamu pag manga nasakupan sa arayu pag rugar, danga kamu mag-ingay pagpatingi sa kangku. Kamu pag manga nasyun, pagpakarig-un kamu ag pagpakarani sa kangku, bag-u sabihun niyu sa kangku kanyu manga riklamu. Mantiripnan kita ag paghampangan nita inda.

² Si unu ti nagpadara usa ka tawu ginan sa butlakan ag nagpakaun sa kanya panalu sa labanan, una naan siya pag umatag? Si unu ti nagpasakup sa kanya sa manga hari ag manga nasyun? Winayak niya ti manga nasyun ag pinanmatay ti manga hari sa panab-anan baladaw ag ugyung. Ag inda nagbaliw ga taypuk pag ipayag durus.

³ Linagas niya sida ag unman may nag-ampara sa kanya una sa balaw waya niya naatagan pag manga rugar.

⁴ Si unu ti nagbuwat inda tanan? Si unu ti nag-isip sa tanan pag manga mangyari ginan waya kaybi sa un-an pag sinulput? Unman aw aku? Aku ti Panginuun asan yi sa pag-umpisa kalibutan, ag asan diman aku tugka sa katapusan.

⁵ Nakitan manga tawu sa arayu pag rugar kang manga binwat, ag tinakigan sida sa dala. Nantiripun sida,

⁶ ti kada usa sa kanda mag-arawatan ag magparabisugan.

⁷ Ti manga manugpanday hanggan ti panday-pilak, ag ti iba waya pag manga manugtarabahu magbuwat manga diyus-diyusan magparabisugan sa usa kag sa usa magkumun, ‘Marinu gid kanta buwat.’ Bag-u ipinaku nida kanda binwat tawu-tawu sa kay palaulian hampay balaw magpu.

⁸ “Dapat kawu, Israil, kang manugsirbi ag pinili ginan sa linahi ni Hakub, ag ginan sa linahi ni Abraham kang ampud,

⁹ tinawagan niku kawu ag bin-ul ginan sa pinakaarayu baliwa pag rugar sa kalibutan. Sinabi niku sa kanmu kawu kang manugsirbi. Pinili niku kawu ag balaw dinayu.

¹⁰ Danga kawu magkaarimputu dahil aku kanmu Diyus. Pabisugun niku kawu ag awatan. Alagaan niku kawu sa panab-anan niku kamaskihan imaw ti rumibri sa kanmu.

¹¹ Ti tanan magkagalit sa kanmu pihu mangay-a ag mibuyu. Ti manga maglaban sa kanmu pihu gid midamhak.

¹² Una ligawun nimu kanmu manga kalaban balaw yi nimu sida makitan. Sida ti manga maglaban sa kanmu bumaliw unman may pulus.

¹³ Dahil aku, ti Panginuun kanmu Diyus, imaw ti magpabisug sa kanmu ag ti magsabi danga kawu magkadala dahil awatan niku kawu.

¹⁴ Una diit lang kawu ag malumuy, danga kawu magkadala dahil aku gid ngap ti mangawat sa kanmu. Aku, ti Panginuun, ti magsabi inda. Aku kanmu Manugribri, ti Banal pag Diyus Israil.

¹⁵ Pagpatingi kawu! Buwatun niku kawu ga bag-u pag panggiuk, matarum ag mayamu kay ngipun. Giukun ag runutun nimu ti manga bantud hanggan tagudtud ag buwatun nimu ga upa.

¹⁶ Tahupun nimu sida ag ipayag sida durus; wayakun sida mabisug pag durus. Dapat kawu makabaya sa Panginuun; dumayaw kawu sa Banal pag Diyus Israil.

¹⁷ “Nu manhanap danum kang manga nasakupan pugri, bag-u unman sida may masampakan, ag nu mamara kanda manga tululnan sa uwaw, aku ti Panginuun ti mangawat sa kanda. Aku ti Diyus Israil balaw pumabaya sa kanda.

¹⁸ Pabulusun niku ti danum sa sapa, bumulus inda sa manga mamara tagudtud ag magkaimaw manga bulbugan sa manga karatagan. Buwatun niku lasaan ti pangawakawaan hanggan ti manga tigangan daga magkaimaw manga bulbugan.

¹⁹ Patubuun niku sa pangawakawaan ti manga puun kayu sidru, akasya, mirtu, ulibu, pinu, inibru, ag sipris,

²⁰ hampay makitan, maalaman, ag masalman manga tawu ti nagbuwat inda aku, ti Panginuun, ti Banal pag Diyus Israil.”

Unman may Pulus ti manga Diyus-diyusan

²¹ Magkun ti Panginuun, ti Hari Israil, sa manga diyus-diyusan, “Malu, pag riklamu kamu ag pagkatuwiran!

^22-23 Pagpakarani kamu ag sabiha sa kanmi nu hintay ti manga mangyari sa aratubangun. Sabiha niyu sa kanmi ti manga pagsabihun niyu kaybi mangyari hampay maalaman nimi nu nangyari ngani inda. Sabiha niyu sa kanmi nu hintay ti mangyari sa aratubangun hampay maalaman nimi kamu manga diyus ngani. Pagbuwat kamu mayad ngatay daut hampay kami madulaw ag madala sa kanyu.

²⁴ Dapat kay tutuu, unman kamu may pulus ag unman kamu may mabuwat. Mayagting pag manga tawu ti nagpili sa kanyu hampay kamu sambahun.

²⁵ Pinili niku pinunu ti usa ka tawu ginan sa kanaway. Mandangup siya sa kangku, taynguna siya pag rumas-ug ginan sa butlakan. Rurisun niya ti manga takinan ga magtata manugpanday anglit sa lutuk.

²⁶ Si unu sa kanyu ti nakahula kaybi sa kabag-u di waya kuntay mangyari inda hampay maalaman nimi agud sumabi kami ungud gid kay pagsabihun? Una di usa sa kanyu unman gid may nagsabi, unman diman may nakadnug kuntay may sinabi kamu.

²⁷ Aku, ti Panginuun ti maysabi inda kaybi sa Siun, ti banwa Hirusalim. Namadara aku usa ka manugtultul hampay ibarita ti mayad pag barita kuntay asan yi ti manug-awat sa kanda.

²⁸ Binantayan niku ngatay may diyus-diyusan makapaanyu, dapat unman gid aku may nakitan. Una di usa sa kanda unman gid may nakasagut sa kang manga paingana.

²⁹ Tanan manga diyus-diyusan unman may pulus, ag unman gid may mabwat una hintay. Parihu sida sa sukadan pasay durus kay sukad.”