Isayas 40 - Hanunuu

Pinabisug ti Nalub-anan manga Nasakupan Diyus

¹ Magkun ti Diyus, “Pasulunga ag pabisuga niyu ti nalub-anan niku manga nasakupan.

² Pagbagaw kamu maalumanay sa nasakupan Hirusalim. Sabihun niyu sa kanda kuntay natapus yi ti kakurian nida, pinatawad yi kanda manga kasalanan. Pinarusahan yi niku sida hustu sa tanan nida kasalanan.”

³ May manugbarita maghuyaw magtudlu sa manga tawu, “Ialistu niyu ti dalan sa pangawakawaan para sa Panginuun. Tadlunga ti dalan lakawan nita Diyus.

⁴ Tap-ukan niyu ti manga arababa pag rugar, ratagun ti manga bantud hanggan tagudtud, ag tadlungun ti manga maliku pag dalan.

⁵ Miburayhaw ti kadayawan Panginuun, ag makitan inda tanan nasakupan. Mangyari gid inda dahil sinabi Panginuun.”

⁶ May nagsabi sa kangku, “Pagtudlu kawu!” Nagsagut aku, “Hintay kang itudlu?” Magkun siya, “Itudlu nimu ti tanan tawu parihu lang sa ilamnun, kanda rinu parihu sa busang ilamnun.

⁷ Ti ilamnun magkarubay ag kay busang magkarugnas nu pag-uypun durus gin sa Panginuun. Ti tawu parihu sa ilamnun.

⁸ Ti ilamnun magkarubay ag kay busang inda magkarugnas, dapat ti bagaw nita Diyus pumirmaminti hanggan aban.”

⁹ Kamu pag manga manugpadakit mayad pag barita sa Siun, ti banwa Hirusalim, pagdayik kamu sa abwat pag bantud, ag iringgit niyu ti mayad pag barita. Danga kamu magkadala, sabihun niyu sa manga banwa Huda kuntay asan yi kanda Diyus.

¹⁰ Magras-ug ti Panginuun Diyus makamaskihan ag humari siya may kamaskihan. Magras-ug siya dara ti pirimyu, ti irinibri niya pag nasakupan.

¹¹ Alagaan niya kay manga nasakupan ga pastur mag-alaga sa kay manga karanidu. Pagsalilihun niya ti dariit pag karanidu madahan niya pag giyahan ti manga inaan karanidu.

¹² Si unu ti tumakal sa danum dagat sa panab-anan niya manga dalukap, ngatay sumukat sa langit sa panab-anan niya dangaw? Si unu ti makapauli tanan daga sa usa ka sukadan, ngatay ti makatimbang manga bantud hanggan manga tagudtud?

¹³ Si unu ti makasabi sa pag-isipun Panginuun, ngatay makatudlu sa kanya nu hintay kay dapat buwatun?

¹⁴ Sa kantapu siya pag namaingana hampay makasalum, ag si unu ti nagtudlu sa kanya sa hustu pag dalan? Si unu ti nagtudlu sa kanya kadunungan, ngatay ti naggiya sa kanya hampay makasalum? Unman!

¹⁵ Para sa Panginuun, ti manga nasyun parihu lang sa usa ka tiktik danum sa timba ngatay taypuk sa kiluhan. Sa Diyus, ti manga puru ga taypuk lang kay kagaan.

¹⁶ Ti manga hayup sa Libanun balaw kang-ud ihandug sa kanya ag ti manga kayu ati kurang waya pamagba sa manga handug.

¹⁷ Ti tanan manga nasyun unman may halaga nu ipaparihu sa kanya. Para sa kanya unman may halaga ti manga nasyun.

¹⁸ Nakan sa kantapu niyu pag ipaparihu ti Diyus? Ngatay naan niyu siya pag ipatulad?

¹⁹ Maipatulad aw niyu siya sa manga diyus-diyusan binwat lang manugpanday, bag-u pinahaklupan gintu ag pinaulian pamarinu kulintas pilak?

²⁰ Ngatay sa maraganit pag tinawu-tawu kayu balaw magkagabuk, ipinabwat tawu pugri bilang handug? Ipinabwat niya inda sa madunung magkurti hampay balaw magpu.

²¹ Unman aw niyu alam ngatay unman aw niyu napatingihan? Unman aw may nagbarita sa kanyu nu kabitay linalang ti kalibutan?

²² Linalang inda Diyus matukawan siya sa kay tukawan hari sa tungud kalibutan. Sa pamantay niya, ti manga tawu sa sirung ga manga liyung lang. Ilinadlad niya ti langit ga limbun rutay, ngatay ga usa ka turda hampay ulianan.

²³ Pagpaighitun niya sa kapangyarihan ti manga takinan kalibutan ag pagbuwatun unman may pulus.

²⁴ Parihu sida sa manga tanum bag-u di waya magtubu harus unman waya nakagamut. Inyup sida Panginuun ag kadaka lang narubay ag ipinayag buhawi ga upa.

²⁵ Magkun ti Banal pag Diyus, “Sa kantapu niyu aku pag ipatulad? May kaparihu aw aku?”

²⁶ Pagbantay kamu sa langit! Si unu nguna ti naglalang sa tunda pag manga pamgasan? Ti Diyus ti naglalang tunda. Ipinalwang niya tigus-a tigus-a tunda mintaras pagtawagun kanda manga ngaran. Dahil sa kay kamaskihan, una di usa unman may nadura.

²⁷ Kamu pag nasakupan Israil, linahi ni Hakub, hayga kamu magriklamu kanyu manga gayak ag karampatan binul-an halaga Diyus?

²⁸ Unman aw niyu alam ngatay unman aw niyu nadnugan ti Panginuun imaw ti unman may katapusan pag Diyus ti naglalang buu kalibutan? Balaw siya magkagasa ngatay magpanlumuy, ag unman may makasalum sa kay isip.

²⁹ Pagpabisugun niya ti manga magpanlumuy hanggan ti manga magkagasa.

³⁰ Una ti manga kalay-awan magkagasa, ngatay magpanlubay ag magkagpu,

³¹ dapat ti manga magpaniwala sa Panginuun magkaimaw di kabisugan. Lumayang sida parihu sa agila. Una malagiw sida balaw gasaun. Manlakaw sida dapat balaw manlumuy.