Isayas 4 - Hanunuu

¹ Sa ati pag sirang, pitu ka babayi ti mangaragawan sa usa ka lalaki ag sabihun nida, “Kami yi ti bahala sa karan-unun ag rutay nimi, asawan-a lang nimu kami hampay balaw kami makakaray-a dahil sa unman kami may asawa.”

Papaladan Uman ti Hirusalim

² Rumas-ug ti sirang paabundahun ag parinuun Panginuun ti manga pananum sa Israil, ti manga patubas sa daga bumaliw kadayawan ag kabayaan manga nasawad tawu sa Hirusalim.

³ Ingarnan banal ti manga nasawad buhi sa Siun, ti nailista sa banwa Hirusalim.

⁴ Sa panab-anan kamaskihan ag maglabdab pag parusa Panginuun, pihuun niya ag lumpiyuhun ti kadautan manga babayi sa Hirusalim hanggan ti manga maratyan ati.

⁵ Bag-u manlalang ti Panginuun rurum imaw ti humamuy sa tungud Hirusalim hanggan sa manga magtiripun ati. Manlalang diman siya maglabdaban apuy magpakaun rayaw sa yabi. Kay kadayawan tumakip sa Hirusalim ga usa ka malapad pag turda,

⁶ ag ga payag maghamuy sa singgit init nu sirang ag parasirngan sa udas may bagyu hanggan uran.