Isayas 39 - Hanunuu

Ti Sugu ginan sa Babilunya

¹ Ati katpung, nabaritaan hari Babilunya ni Mirudak Baladan, anak ni Baladan, kuntay naayadan yi si Isikyas sa kay sakit. Nakan nagpadara siya manga surat ag pamakaun sa panab-anan niya manga sugu.

² May kabayaan kay nagtanggap ni Isikyas sa manga sugu, ag ipinakakit waya niya sa kanda ti tanan manga kabagayan sa kay haramnuan kayamanan — ti manga pilak, gintu, pamanglu, manga marinu pag kalasi lana ulibu, manga armas ag iba waya niya manga kayamanan. Unman gid una di usa ka bagay sa balay hari ngatay kaharian ti balaw niya ipinakakit sa kanda.

³ Taynguna, nag-atag si Purupita Isayas sa kan hari Isikyas ag nagpaingana, “Naan ginan tunda pag manga tawu ag hintay kanda kailangan?” Sinmagut si Isikyas, “Nag-ataytag sida ginan waya sa Babilunya.”

⁴ Namaingana waya ti purupita, “Hintay kanda nakitan sa kanmu balay?” Sinmagut si Isikyas, “Nakitan nida ti tanan kabagayan sa kang balay. Unman gid una di usa sa manga kayamanan niku ti unman niku ipinakakit sa kanda.”

⁵ Bag-u magkun si Isayas kan Isikyas, “Patingihi nimu inda ti pagsabihun Panginuun Makamaskihan:

⁶ Rumas-ug gid ti panahun darahun sa Babilunya ti tanan kayamanan sa balay hari nimu, hanggan ti tanan asan waya pag manga tinipun nimu manga ginurang. Unman gid may masawad, magkun ti Panginuun.

⁷ Ti iba sa kanmu sunud pag manga linahi, bihagun ag buwatun manga suruguun sa balay hari Babilunya.”

⁸ Kay isip ni Isikyas balaw tida matupad sa kapanahunan niya nu unman bumaliw may kahusayan ag balaw may pagkadalaan kay buhi. Nakan magkun siya kan Isayas, “Mayad ti pagsabihun Panginuun kanmu sinabi sa kangku.”