Isayas 38 - Hanunuu

Nasakit si Isikyas

¹ Ati katpung pag sirang, nasakit si Isikyas harus ikamatay yi niya. Nag-atag sa kanya si Purupita Isayas anak ni Amus ag magkun, “Magkun ti Panginuun pagbilin yi kawu sa kanmu magtal-anakan dahil udyi kawu maayadan, mamatay yi kawu.”

² Pagka nasaydan inda ni Isikyas, napasrangu siya sa lingub ag nandarangin sa Panginuun.

³ Magkun siya, “Panginuun, alalahana duy nimu nu kabitay aku namuhi matinupadun ag buu tagipusuun nagsirbi sa kanmu ag nu kabitay aku nagbuwat mayad sa magbantay nimu.” Ag namurus siya sa lumi.

⁴ Magkun ti Panginuun sa kan Isayas

⁵ pagbalik siya tag kan Isikyas ag sabiha inda: “Inda ti pagsabihun Panginuun, ti Diyus nimu ginurang si Dabid: Nasaydan niku kanmu darangin ag nakitan niku kanmu manga luwa. Dugangan waya niku 15 ka timpu kanmu buhi.

⁶ Iribri niku kawu hanggan inda pag banwa sa kamang hari Asirya. Apinan niku inda pag banwa.

⁷ Inda ti tanda kuntay kang ipakaun hampay patutuuhanan buwatun niku ti itinaratu inda.

⁸ Pabalikun niku sampulu ka pag-ulit ti aninu init sa urasan ipinabwat ni Akas.” Ag natupad ngani inda.

⁹ Inda ti isinurat ni hari Isikyas sa Huda pagka naayadan siya sa kay sakit:

¹⁰ Kang isip mamatay yi aku udas niku kasupangan, ag pumirmaminti sa rugar manga namatay.

¹¹ Kang isip udyi makitan niku ti Panginuun sitay sa kalibutan manga buhi ngatay udyi niku makitan ti manga tawu sitay sa kalibutan.

¹² Diit wadi nadura kang buhi ga turda manga pastur karanidu ibintang. Kang isip maplud yi kang buhi ga pisahan puldun yi gin sa halablan. Ginan sa surip tugka sa yabi kang isip tapusun yi nimu kang buhi.

¹³ Buu magpakumbaba aku nag-alagad tugka surip sa mag-isip mamatay yi aku. Ga pagpalpaun yi liyun kang manga but-ul, nakan kang-isip tapusun yi nimu kang buhi.

¹⁴ Nanhagad aku awat hanggan tugka kang busis ga mag-uni wadi alipasang ngatay tagwak. Mag-arunghung aku ga mag-uni kalapati. Ti manga mata niku magkagasa yi sa pakatuturun atag sa tungud. Panginuun, awati nimu duy aku sa inda pagkakurian.

¹⁵ Dapat hintay waya ti masabi niku? Dahil sinagut niya aku ag pinaayad. Mabuhi aku mapinakumbabaun dahil sa mabuyat niku pagnalakawan.

¹⁶ Panginuun, sa binuwat nimu duy inda, mapabisug nimu ti nalub-anan tawu, ag aku ngapu napabisug nimu. Pinaayad nimu aku ag pinahintulutan waya mabuhi.

¹⁷ Tutuu ti manga kakurian kang inagwanta para diman sa kang kaayadan. Dahil sa pagmahal nimu, irinibri nimu aku sa kadamhakan ag pinatawad nimu kang manga kasalanan.

¹⁸ Dahil kabitay waya aku makapagdayaw sa kanmu nu namatay yi aku? Ti manga namatay udyi makapagdayaw sa kanmu ngatay makasarig sa kanmu matinupadun.

¹⁹ Ti buhi lang ti makapagdayaw sa kanmu parihu sa pagbuwatun niku taynguna. Ti kada sinulput mamaburayhaw sa dumasun pag sinulput sa kanmu matinupadun.

²⁰ Panginuun, irinibri nimu duy aku, nakan dungan sa tunug manganta kami sa kanmu Balay tugka kami magkabuhi.

²¹ Kaybi udwaya magkaayadan si Isikyas, magkun sa kanya si Isayas patapalan niya sa kay manga kaawat rinunut burak igus kay baga niya hampay umayad.

²² Namaingana si Isikyas, “Hintay kay puruyba pag tanda kuntay aku ngani umayad ag makaatag sa Balay Diyus Panginuun?”