Isayas 37 - Hanunuu

Namaingana si Hari Isikyas sa kan Isayas

¹ Pagka nasaydan ni Hari Isikyas ti barita, ginitas niya kay rutay, nanrutay siya saku hampay ipakakit kay karukuan, ag nag-ati siya sa Balay Diyus Panginuun hampay mandarangin.

² Pinaatag niya sa kan Isayas kay anak ni Amus si Ilyakim ti manug-asikasu sa balay hari, si Sibna ti manugsurat hanggan ti manga pangulu manughandug may manga sulung rutay saku.

³ Pagka rinmas-ug sida sa kan Isayas, magkun sida sa kanya, “Inda ti pagsabihun ni Isikyas: Inda ti udas kakurian, pagtadlung ag kakay-ahan. Parihu kita sa usa ka babayi arani yi manganak unman may kusug hampay ilusad kay lapsag.

⁴ Ipinadara hari Asirya kay kumandir manga sundalu hampay puyaan ti Diyus buhi. Barang abi nadnugan Panginuun nimu Diyus ti sinabi kumandir ag parusahan siya sa kay sinabi. Nakan idarangin nimu ti manga nasawad sa kanta.”

⁵ Pagka rinmas-ug ti ipinadara pag manga may katungkulan ni Hari Isikyas sa kan Isayas,

⁶ magkun si Isayas sa kanda, “Sabihun niyu sa kanyu amu inda ti pagsabihun Panginuun: Danga kawu magkadala sa nadnugan nimu pagpuya sa kang manga tawuhan hari Asirya.

⁷ Pagpatingi! Padarahan niku ispiritu ti hari Asirya. Makadnug siya barita imaw ti makapabalik sa kanya sa kay sadili nasyun. Ipamatay niku siya ati sa panab-anan baladaw.”

Kas-a maan Tinimaan Asirya ti Huda

⁸ Pagka nadnugan kumandir kuntay nighit yi sa Lakis ti hari Asirya sa katpung maggira sa Libna, nag-atag siya ati.

⁹ Pagka nakatanggap barita si Hari Sinikarib taga Asirya kuntay lusubun sida ni Hari Tirhaka taga Itiyupya, nagpasugu siya manga manugbarita tag kan Isikyas hampay sabihun inda:

¹⁰ “Danga kawu magpaluku sa kanmu pagsarigan pag Diyus nu sumabi siya, ‘Balaw ipahintulut niku ti Hirusalim sa kamang hari Asirya.

¹¹ Pagpatingi kawu! Nadnugan nimu nu hintay ti binwat manga hari Asirya sa harus tanan nasyun. Rinuris nida sida lubus. Sa hantup aw nimu makaribri kawu?

¹² Rinuris niku manga ginurang ti manga banwa Gusan, Haran, Risip hanggan ti manga nasakupan Idin ati sa Tilasar. Nairibri aw sida nida manga diyus?

¹³ May nabwat aw ti hari Hamat, Arpad, Siparbaim, Hina ag Iba?’ ”

Ti Darangin ni Isikyas

¹⁴ Pagka nab-ul ni Isikyas ti surat ginan sa manugbarita, binasa niya inda. Nag-atag siya sa Balay Diyus Panginuun ag ibinugtang ti surat sa atubangan Panginuun.

¹⁵ Bag-u nandarangin siya,

¹⁶ “Panginuun, Diyus Israil matukawan sa turukawan sa tab-anan manga kirubin, kawu lang duy ti Diyus magdumara sa tanan kaharian sitay sa kalibutan. Linalang nimu ti kalangitan ag ti kalibutan.

¹⁷ Panginuun, patingihi duy nimu aku, ag bantayi ti manga nangyari. Buhi pag Diyus, patingihi nimu ti manga binagaw ni Sinikarib maglabag sa kanmu.

¹⁸ Panginuun, tutuu duy rinuris manga hari Asirya ti mayamu pag manga nasyun,

¹⁹ ag pinan-sunug ti manga diyus-diyusan nida. Dahil balaw duy tutuu tunda pag manga diyus nu unman manga batu ag kayu lang binwat tawu.

²⁰ Nakan Panginuun nimi Diyus, iribri nimu kami sa kamang Asirya, hampay maalaman tanan kaharian sitay sa kalibutan kawu lang, Panginuun ti Diyus.”

Ti Pagkadamhak ni Hari Sinakirib

²¹ Bag-u nagpadara si Isayas anak ni Amus kaindaay pag tultulanun tabug sa kan Isikyas: Inda ti pagsabihun Panginuun, ti Diyus Israil: Dahil nandarangin kawu tungkul sa kan Hari Sinikarib taga Asirya,

²² inda ti pagsabihun Panginuun laban sa kanya: “Pagkadat-an ag pagsurugun kawu manga nasakupan Siun, ti banwa Hirusalim. Magkarasarin-an sida sa pagpuya sa kanmu magpalagiw.

²³ Si unu lugud kanmu pagpuyaan ag paglabagun? Si unu lugud kanmu pag paabwatan busis ag pagpayabangan? Unman aw aku, ti Banal pag Diyus Israil?

²⁴ Sinurug nimu aku sa panab-anan nimu manga suruguun. Pagsabihun waya nimu, ‘Sa panab-anan niku mayamu pag manga kalisa nadayik niku ti arabwat pag manga bantud hanggan ti katayungtungan manga bantud Libanun. Pinukan niku ti arabwat pag manga puun sidru hanggan kay pinaka marinu pag kalasi sipris. Nakaras-ug aku sa katayungtungan sa may madamul pag kapuruan.

²⁵ Nangutkut aku bubun sa iba manga rugar ag nanginum danum siyun ginan. Sa paglawuy niku, nak-at ti manga sapa sa Ihiptu.’

²⁶ “Tutuu ngani winayak nimu ti manga naaladan batu pag banwa. Dapat unman aw nimu alam dugay yi niku pag itinagka tida? Ginan waya kaybi, ginayak yi niku inda ag taynguna tinupad niku inda.

²⁷ Ti winayak nimu pag manga nasakupan manga banwa naduraan kabisugan. Nadala sida ag nangay-a. Bilang sida manga ilamnun sa kapadangan madali magkarubay, ngatay manga ilamnun magtubu sa atup balay igu tinmubu narubay diman rargu.

²⁸ “Dapat alam di niku ti tungkul sa kanmu, nu naan kawu pag mag-uli, ngatay nu naan kawu ginan, ag nu naan tag kawu, ag nu kabitay kasyadu kanmu galit sa kangku.

²⁹ Dahil nadnugan niku kanmu pangagalit sa kangku hanggan kanmu pagpayabang sa kangku, paulian niku barung kanmu irung ag pungtun niku kanmu bibig, bag-u guyudun kawu pabalik sa kanmu nag-uryanan, sa kanmu linakawan pag dalan.”

³⁰ Magkun waya si Isayas sa kan Isikyas, “Inda ti tanda alagaan Panginuun ti Hirusalim ginan sa manga taga Asirya: Taynguna pag timpu, ti manga burak halaman buluntad tinmubu imaw lang ti kan-un niyu. Ag sa dasun pag timpu, ti manga burak maan tanum tinmubu ginan sa daan tanum ti kan-un niyu. Dapat sa ikatlu pag timpu, makatanum yi kamu tirigu ag makaani. Makatanum diman kamu manga ubas ag makakaun kay burak inda.

³¹ Ag ti manga nasawad buhi sa Huda utru umalwan parihu sa tanum nan-gamut abasad ag magbururak.

³² Dahil may manga masawad buhi mangalat ginan sa Hirusalim, sa Bantud Siun. Pihuun gid Panginuun Makamaskihan matupad inda.

³³ “Inda ti pagsabihun Panginuun tungkul sa hari Asirya: Balaw siya makasulud sa banwa Hirusalim ngatay makapana una lang usa ka ugyung siyun tag. Balaw siya makapakarani may panangga ngatay masangputan ti banwa hampay lusubun inda.

³⁴ Bumalik siya sa kay nag-uryanan, sa kay linakawan pag dalan. Aku, ti Panginuun, ti magsabi balaw siya makasulud sa inda pag banwa.

³⁵ Alagaan ag iribri niku inda pag banwa para sa kadayawan niku ag dahil sa taratu niku sa kan Dabid sa kang manugsirbi.”

³⁶ Bag-u nag-atag ti anghil Panginuun sa kampu taga Asirya ag minatay niya ti 185,000 sundalu. Igu surip, pagka nimata ti manga nasawad buhi, nakitan nida ti mayamu pag manga bangkay.

³⁷ Dahil siyun, nuli si Sinikarib tag sa Ninibi ag ati yi pag nangulian.

³⁸ Pagka sa usa ka sirang, habang magsamba si Sinikarib sa balay niya diyus si Nisruk, minatay siya niya duwa ka anak lalaki sida ni Adramilik ni Sarisir sa panab-anan baladaw bag-u linmayas sida atag sa Ararat. Kay usa niya ka anak si Isarhadun imaw ti nag-ublus kay pagka hari.