Isayas 36 - Hanunuu

Ginira Asirya ti Hirusalim

¹ Katpung ika-14 yi pag timpu kay maghari ni Isikyas sa Huda, ginira ni hari Sinakirib taga Asirya ti harus tanan naaladan batu pag banwa sa Huda ag sinakup niya inda.

² Katpung ati sa Lakis, si Sinikarib, sinugu niya kay kumandir kaibahan ti mayamu pag manga sundalu kuntay pag-ati sa Hirusalim pagtagasampaki sa kan Hari Isikyas. Pagka ati yi sa luwas banwa Hirusalim ti kumandir, nagpat-ung dapu siya hanggan ti manga sundalu sa may arani bululusan danum baliwa sa tungud pag rugar pagtipunan danum. Arani inda sa dalan atag sa piripian.

³ Nagpasampak sa kanya ati si Ilyakim kay anak ni Hilkiyas, magdumara sa balay hari, ag si Sibna imaw ti manugsurat hanggan si Huwa kay anak ni Asap, imaw ti magdumara sa manga kasuratan sa kaharian.

⁴ Magkun sa kanda ti kumandir manga sundalu, “Sabihun niyu sa kan Isikyas inda ti pagsabihun makapangyarihan pag hari Asirya: “Hintay lugud kanmu pag ipadayaw?

⁵ Pagsabihun nimu may kakayahan ag mabisug kanmu manga sundalu, dapat unman may kabuluhan ti manga pagsabihun nimu. Si unu lugud kanmu pag-ipadayaw nakan maglaban kawu sa kangku?

⁶ Ti Ihiptu aw? Tunda aw ngani pag nasyun hanggan kay hari parihu lang sa nabari pag sugkud nu paggamitun pansugkud magbiyag sa kamang.

⁷ Dapat barang sumabi kawu sa kangku magsarig kamu sa Panginuun niyu Diyus. Dapat ay unman aw lugud ipinadaut nimu kay manga simbahan sa abwat pag rugar hanggan kay manga harandugan. Ag sinabihan nimu ti manga taga Huda hanggan taga Hirusalim kailangan sida magsamba sa usa lang ka harandugan?”

⁸ Magkun waya ti kumandir, “Taynguna, pagsabihan kawu niku amu imaw ti hari Asirya. Pakan-an nimi kawu 2,000 kabayu nu may 2,000 diman waydi kawu ka manugkabayu.

⁹ Unman gid ungud kawu manalu una di sa pinakaababa pag may katungkulan niku amu. Hayga magsarig aw waya lugud kawu pakan-an taga Ihiptu manga kalisa hanggan manugkabayu?

¹⁰ Ag usa waya, pag-isipun aw nimu labag sa Panginuun kang pag-ataytag? Ti Panginuun ngapu ti nagsugu sa kangku kuntay giraha ag rurisa inda pag nasyun.”

¹¹ Magkun sida ni Ilyakim, ni Sibna ag ni Huwa sa kumandir manga sundalu, “Paghampang duy kawu sa kanmi sa pamagaw Aramiku, dahil magkasalman di nimi tunda pag pamagaw. Danga kawu magbagaw pamagaw Hibriyu dahil madnugan kawu manga tawu sa may alad batu banwa.”

¹² Dapat sinmagut ti kumandir, “Sinugu aku niku amu kuntay ipaalam inda pag manga bagay balaw lang sa kanyu ag sa kanyu hari nu unman sa tanan magpangulian sa Hirusalim. Kamu tanan lun-usun ag uwawun sa udas girahun nimi kamu. Nakan kan-un niyu kanyu manga ugat ag inmun niyu kanyu manga ihi.”

¹³ Bag-u tinmindug ti kumandir ag nanringgit sa bagaw Hibriyu, “Patingihi niyu ti pagsabihun makapangyarihan pag hari Asirya!

¹⁴ Danga kamu magpaluku sa kan Isikyas. Balaw siya makaribri sa kanyu!

¹⁵ Danga kamu magpaniwala sa kanya kuntay manarig sa Panginuun nu sabihun niya, ‘Pihu gid iribri kita Panginuun; inda pag banwa balaw ipabahala sa kamang hari Asirya.’

¹⁶ “Danga kamu magpatingi kan Isikyas! Inda ti pag ipasabi hari taga Asirya: Danga yi kamu maglaban sa kangku; pagsuku yi lang kamu! Bag-u pasnuan niku kamu makakaun manga burak niyu ubas ag igus, ag makainum sa kanyu manga tipunan danum,

¹⁷ tugka sa rumas-ug aku ag darahun niku kamu sa daga parihu diman sa kanyu daga — ti daga may manga tanum ubas makapakaun sa kanyu irinmun ubas ag may manga tirigu mabwat niyu tinapay.

¹⁸ Danga kamu magpatingi sa kan Isikyas, pag-ipatalang niya kamu nu pagsabihun niya, ‘Iribri kita Panginuun!’ May manga diyus aw lugud una naan pag nasyun ti makaribri sa kanda banwa ginan sa kamang hari Asirya?

¹⁹ May nabwat aw ti manga diyus Hamat, Arpad, ag Siparbaim? Nairibri aw nida ti Samarya ginan sa manga kamang niku?

²⁰ Naan pag manga diyus inda pag manga nasyun ti nakaparibri sa kanda nasyun laban sa kangku? Nakan kabitay mairibri Panginuun ti Hirusalim sa kang manga kamang?”

²¹ Dapat unman sinmagut ti manga tawu, dahil nagsugu si Hari Isikyas danga sida magsagut.

²² Bag-u ginisi nida ni Ilyakim, ni Sibna, ag ni Huwa kanda rutay sa masyadu pagkarukuan. Nagbalik sida sa kan Isikyas ag ipinaalam ti tanan binagaw kumandir manga sundalu.