Isayas 35 - Hanunuu

Ti Kabayaan manga Irinibri

¹ Ti tigangan makabaya ga tawu. Mamurusang ti manga halaman sa pangawakawaan.

² Manganta ag manringgit sa kabayaan ti pangawakawaan ga tawu, ag mamuklad ti mayamu pag busang. Bumaliw marinu inda parihu sa Bantud Libanun, ag mamurak inda abunda parihu sa karatagan Karmilu ag Sarun. Ag miburayhaw sitay ti kamaskihan ag kadayawan Panginuun nita Diyus.

³ Nakan pabisuga niyu ti manga magpanlumuy.

⁴ Sabihun niyu sa manga magkadala, “Danga kamu magkadala. Pabisuga niyu kanyu nalub-anan. Rumas-ug kanyu Diyus hampay manmalus sa kanyu manga kalaban, ag iribri niya kamu.”

⁵ Bag-u nu mangyari tunda, kumakit ti manga buta ag makadnug ti manga bungul.

⁶ Mangutbaw ga karasyaw ti manga pilay, ag manringgit sa kabayaan ti buyun. Mamulus ti danum sa tigangan ag bumulus ti danum sa manga sapa sa pangawakawaan.

⁷ Ti mainit pag baras bumaliw danuman. Ag sa tigangan daga mamulbugan ti danum. Manubu ti tuhay-tuhay pag ilamnun sa rugar pag-ulian kaybi manga simarun idu.

⁸ Magkaimaw laun pag baklayan sa pangawakawaan ag tida ingarnan, “Banal pag Baklayan.” Unman may makasalanan ngatay unman may namuangan ti makalakaw siti. Nu ud ti manga magsunud lang sa Panginuun.

⁹ Unman may liyun una hintay pag maraisug hayup ti makalawuy ati nu ud ti linukat lang Panginuun.

¹⁰ Tunda pag manga irinibri Panginuun bumalik magkarantahan sa Siun. Madura yi kanda karukuan hanggan maghimanglaw, matulsan yi tunda unman may katapusan pag kasulungan.