Isayas 34 - Hanunuu

Parusahan Diyus Kay manga Kalaban

¹ Kamu pag manga nasyun, pagpakarani kamu ag pagpatingi kaayad. Pagpatingi ti buu kalibutan hanggan ti tanan asan sa kanya.

² Dahil magkagalit ti Panginuun sa tanan nasyun; magkagalit siya sa kanda manga sundalu. Nakan rurisun niya sida lubus. Matyun gid niya sida tanan.

³ Balaw ilbung kanda manga bangkay, nakan mangalamyu tunda, ag ti manga bantud manragang dahil sa kanda manga dugu.

⁴ Matunaw ti tanan bagay sa langit, ag ti langit madura, ga kasuratan linuhut. Magkaralagpak ti manga pamgasan ga manga labung ubas ngatay igus magkarubay ag magkarubas.

⁵ Pagka natapus gamitun Panginuun kay baladaw sa langit, mitama maan inda sa Idum hampay parusahan ag rurisun.

⁶ Ti baladaw Panginuun mapnu dugu ag taba, ga ginamit pan-iyaw manga handug kambing hanggan karanidu. Dahil matyun Panginuun ti manga taga Busra bilang handug. Mayamu kay matyun sa iba pag manga banwa Idum.

⁷ Matyun diman ga manga tudu baka kanda manga makapangyarihan pag nasakupan. Kanda manga daga mapnu dugu ag taba.

⁸ Dahil ti Panginuun may itinagka sirang mamalus sa kay manga kalaban hampay awatan ti Siun.

⁹ Ti manga sapa hanggan daga sa Idum madaut. Ti buu nasyun mairub balaw yi makinabangan.

¹⁰ Ag balaw inda mapsa sirang yabi. Kay anus manalimbuuk hanggan aban. Udyi may mangulian ngatay manlawuy lang sa Idum una kapira.

¹¹ Bumaliw ulian inda manga bukaw ag manga uwak. Ginayak yi inda Panginuun ipalakaw sa inda pag daga ti kaguluhan ag kadamhakan.

¹² Ag ingarnan inda, “Unman may Pulus pag Kaharian.” Madura ti tanan niya manga takinan.

¹³ Manubu ti tanan manga madugi ilamnun sa manga naaladan batu pag banwa hanggan sa manga mararig-un pag bahagi inda. Mangulian ati ti manga bukaw ag manga simarun idu.

¹⁴ Manmirinsanan ati ti manga talun idu kaibahan waya ti iba pag manga hayup sa talun. Tawagun manga maila kambing kanda manga kaibahan ati. Ag ti manga lumalakaw magluwang nu yabi mag-atag hampay magpahari.

¹⁵ Ti manga bukaw mamugad ati, mangitlug, mamutu, ag alagaan nida kanda manga pispis sa sirung nida manga pakpak. Ti manga uwak paris-paris magkarabanan ati.

¹⁶ Bantayi niyu ti ribru Panginuun ag basaha. Unman una di usa sa binagaw niku ti unman matupad. Unman may madura una di usa sa manga hayup ati, unman una di usa inda ti unman may kaparis, dahil tunda ti ginayak Panginuun, ag siya ngapu ti manipun sa kanda.

¹⁷ Siya ti mamakaun daga sa manga hayup imaw kanda ulianan. Mapasa-kanda inda, ag ati sida pag muli hanggan aban.