Isayas 32 - Hanunuu

Ti Matadlung pag Hari

¹ May usa ka hari humari may katadlungan, kay manga takinan mandumara may kahusayan.

² Ti kada usa sa kanda parihu sa palalan-iban sa mabisug pag durus ag bagyu. Parihu diman sida sa sapa magbulus sa tigangan pag daga, hanggan sa hamuy daka pag batu sa mainit ag sa mamara pag daga.

³ Manhanap ag mamatingi ti manga tawu sa Diyus.

⁴ Ti tawu harus-harus pag-isip dapu kaayad hampay maalaman nu unu kay buwatun. Ti tawu balaw alam nu hintay kay sabihun, makabagaw yi mayad ag magkaintindihan.

⁵ Ti manga unman may namuangan balaw yi dayawun, ag ti manga magdaya balaw yi galangun.

⁶ Dahil kayabangan ti pagbagawun manga luku-luku, ag ti daut niya naisipan maggayak bumuwat kadautan. Magtultul siya kapudilan tungkul sa Panginuun, ag pag-irangan niya ti manga magkalun-us hanggan magkauwaw.

⁷ Daut kay manga paraan manugdaya. Pag-ipadamhak niya ti manga pugri sa panab-anan niya kapudilan, una sa udas nida maghagad katadlungan.

⁸ Dapat ti tawu galalangun may paghingabtun pirmi bumuwat mayad, ag inda kay pagtupadun.

^9-10 Kamu pag manga babayi masalimpayaan lang ud may pag-isipun, patingihi niyu kang sabihun sa kanyu! Bag-u matapus ti timpu, mataranta kamu dahil unman yi mamurak ti ubas ag udyi kamu may putihun.

¹¹ Dugay yi kamu masalimpayaan, unman may pag-isipun. Taynguna takigan yi kamu sa dala. Lukasa niyu kanyu manga rutay ag paghawud kamu saku sa kanyu awak.

¹² Taptapun niyu kanyu dubdub sa karukuan dahil sa mangyari sa kanyu manga abunda pag tanman ag maraburak pag ubas.

¹³ Ti daga niku manga nasakupan tubuan manga ilamnun ag dugihan pag halaman. Magkaradura ti masulung pag ulian hanggan banwa.

¹⁴ Ti mayamu tawu pag banwa hanggan ti marig-un pag bahagi inda balaw yi maulianan. Ti tagudtud hanggan ti barantayan pag bantayaw bumaliw ga pangawakawaan tugka aban. Inda bumaliw ulian manga talun asnu ag pasturan manga karanidu.

¹⁵ Mangyari inda tugka sa ipadara sa kanta ti Ispiritu ginan sa langit. Nu katida, ti pangawakawaan bumaliw maabunu pag daga ag ti maabunu pag daga bumaliw kapuruan.

¹⁶ Lumantap ti katadlungan ag katuwiran sa pangawakawaan hanggan sa maabunu pag daga.

¹⁷ Ti burak katuwiran imaw ti mayad pag kahamtangan ag kahusayan, hanggan mayad pag kahamtangan hanggan aban.

¹⁸ Kamu pag manga nasakupan Diyus mangulian sa may kahusayan pag manga ulian, ribri sa kadamhakan. Ag udyi may bumalag sa kanyu.

¹⁹ Una madaut ti kapuruan hanggan ti manga banwa dahil sa mag-uran yilu ga manga batu,

²⁰ papaladan di kamu Diyus. Bumaliw abunda ti danum sa manga pananum, ag kanyu manga hayup abunda sa hararabun una naan tag.