Isayas 31 - Hanunuu

Kaawaawa ti manga Magsarig sa Ihiptu

¹ Kaawaawa kamu pag manga maghagad awat sa Ihiptu. Magsarig kamu sa kanda manga marabisug pag kabayu, sa mayamu nida kalisa, ag sa manga marabisug pag sundalu manugkabayu. Dapat unman kamu magpaniwala sa Panginuun, sa Banal pag Diyus Israil, balaw kamu maghagad awat sa kanya.

² Sa kadunungan Diyus, mamadara siya sarut, ungud buwatun niya kay manga pagsabihun. Parusahan niya ti manga magtal-anakan daut hanggan ti manga mag-awat sa kanda.

³ Ti manga taga Ihiptu tawu diman waydi, bukun Diyus. Kanda manga kabayu bukun manga ispiritu, nu unman parihu diman sa iba manga kabayu. Nu pumarusa yi ti Panginuun, mawayak ti Ihiptu hanggan ti pag-awatan niya pag nasyun. Dapat pararihu sida mawayak.

⁴ Inda ti pagsabihun sa kangku Panginuun, “Unman may makaampara sa liyun maggus-ab sa kay tinkub una mamaragritan waya ti manga manug-alaga hayup. Parihu diman sa kangku, unman may makaampara sa kangku hampay maalagaan ti Bantud Siun.

⁵ Aku, ti Panginuun Makamaskihan, tanudan niku ti Hirusalim ga manuk magtanud sa kay pugad. Dahanan niku inda, iribri, ag balaw pabay-anan.”

⁶ Manga Israilita, pagbalik-nalub-anan kamu sa Panginuun, masyadu yi gid niyu siya linabag.

⁷ Dahil rumas-ug ti sirang dayiun yi niyu kanyu manga diyus-diyusan pilak ag gintu kamu diman waydi ti nagbuwat dahil sa kanyu pagkamakasalanan.

⁸ Magkaramatay ti manga taga Asirya, dapat balaw sa panab-anan baladaw tawu. Lumayas sida ginan sa girahan, ag bumaliw suruguun kanda manga kalay-awan.

⁹ Malagiw kanda manga sundalu dahil sa kadalaan ag kanda manga takinan udyi alam kanda buwatun nu makitan nida ti bandira nida manga kalaban. Tunda ti pagsabihun Panginuun, kay apuy maglabdaban sa Siun, ti banwa Hirusalim.