Isayas 30 - Hanunuu

Unman may Pulus ti Pagkasundu Huda sa Ihiptu

¹ Magkun ti Panginuun, “Kaawaawa kang manga anak supakil. Magbuwat sida manga gayak balaw angay sa kang nalub-anan. Magtaratu sida balaw niku pagpasnuan. Nakan lalu di magkadugangan kanda kasalanan.

² Nag-atag sida sa Ihiptu hampay manhagad panagang sa hari, unman yi nagpaingana sa kangku.

³ Dapat mabuyu lang sida sa kanda paghagadun panagang sa hari Ihiptu.

⁴ Dahil una magpamunu ti hari Ihiptu tugka sa Suan ag Hanis,

⁵ mangay-a lang ti Huda dahil unman diman may miawat ti manga taga Ihiptu sa kanda nu ud pagkabuyu ag kakay-ahan lang.”

⁶ Inda ti ipinaburayhaw Diyus tungkul sa manga hayup sa Nigib: Binaklay manga taga Huda ti pangawakawaan makuri baklayun nu naan may manga liyun, ag may manga madalit pag ulay ag ti iba ga maglayang. Pag-ikarga nida kanda manga kayamanan sa asnu ag sa manga kamilyu hampay ikaluub sa nasyun unman diman waydi makaawat sa kanda.

⁷ Tida pag nasyun ti Ihiptu yi ngani, kay awat ud may pulus. Nakan pag-ingarnan niku inda “Rahab, ti Daragun Unman may pag Buwatun.”

⁸ Magkun sa kangku ti Panginuun, “Abala, isurat nimu sa ribru ti bangdan niku laban sa manga taga Israil hampay pirmi inda magsirbi puruyba sa kanda kadautan sa uryan panahun.

⁹ Dahil manga manuglaban sida, pudilun, ag dayu mamatingi sa manga adal niku.

¹⁰ Magkun sida sa manga purupita, ‘Danga yi niyu sabihun sa kanmi ti tungkul sa manga ipinaburayhaw Diyus sa kanyu. Danga yi niyu sabihun sa kanmi ti matadlung. Sabihun niyu sa kanmi ti manga bagay makapasulung sa kanmi ag ti manga balaw matupad pag pangakakitun.

¹¹ Pag-ighit kamu sa kanmi lakawan, danga niyu kami pagharangi. Danga yi niyu sabihun sa kanmi ti tungkul sa Banal pag Diyus Israil.’ ”

¹² Nakan magkun ti Banal pag Diyus sa Israil, “Dahil sa ipinurya niyu kang pagsabihun ag nagpaniwala kamu sa magpangihid ag magpandaya,

¹³ kadaka kamu maruris. Kanyu kasalanan parihu sa gini kadaka lang manwayak sa abwat pag alad batu.

¹⁴ Magkararunut kamu ga anglit, dahil sa mabisug pag nidugsak ud may nasawad una lang bugtangan baga aw ngatay misaruk sa danum.”

¹⁵ Magkun waya ti Panginuun Diyus, ti Banal pag Diyus Israil, “Pagbalik nalub-anan kamu sa kangku pag may kahusayan, dahil iribri niku kamu. Danga kamu magkataranta nu unman pagsarig sa kangku, dahil pabisugun niku kamu. Dapat nagbugya kamu

¹⁶ ag magkun kamu, ‘Makapalagiw kami sa kanmi manga kalaban dahil marabisug kanmi manga kabayu.’ Hu ngani, makapalagiw kamu dapat marabisug man ti manga lumagas sa kanyu.

¹⁷ Ti usa lang sa kanda makapalayas sa 1,000 niyu manga sundalu. Ti lima sa kanda makapalayas sa kanyu tanan. Miparihu kamu sa tugnan bandira matindugan usa-usa sa katayungtungan bantud.”

¹⁸ Dapat mag-alagad ti Panginuun kamu pumakarani sa kanya hampay kaawaan niya. Alistu di siya iparanas sa kanyu kay pasunaid. Dahil ti Panginuun imaw ti Diyus matadlung, mapalad ti magsarig sa kanya.

¹⁹ Kamu manga taga Siun, manga nasakupan Hirusalim, balaw yi kamu utru manlumi! Kaawaan kamu Panginuun nu manhagad kamu awat sa kanya. Nu madnugan niya kanyu darangin, sagtun niya kamu.

²⁰ Ga pinakaun ag pinainum kamu Panginuun karukuan ag kakurian. Dapat una binwat niya inda sa kanyu, siya maisturu niyu balaw patagu sa kanyu. Makitan niyu siya,

²¹ ag masaydan kay busis magtudlu sa kanyu, “Inda ti hustu pag dalan, paglakaw kamu sitay.”

²² Baliwun yi niyu mauring kanyu diyus-diyusan binwat sa pilak ag gintu. Iyamut niyu ga mauring pag paris ag sumabi, “Balaw yi niku pagkaibgan makitan kamu!”

²³ Pakan-an kamu Panginuun uran sa panahun tig-taranum, ag bumaliw abunda kanyu tubas. Kanyu manga hayup manharab sa maluang pag pasturan.

²⁴ Kanyu manga baka hanggan manga asnu pangaradu manharab sa pinakamayad pag hararabun hayup.

²⁵ Sa ati pag manga sirang matyun kanyu manga kalaban ag wayakun kanda manga bantayaw, bumulus ti danum ginan sa kada arabwat pag bantud.

²⁶ Rumayaw ti bulan ga init. Ti init waydi rumayaw pitu ka dubli, parihu sa rayaw pitu ka init mininsan sa usa lang ka init. Mangyari inda sa sirang bulungun ag paayadun Panginuun ti biyag manga nasakupan niya.

²⁷ Pagpatingi kamu! Magras-ug ti Panginuun ginan sa arayu. Mag-apuy siya sa isug ati sa karaw-an maanus. Kay manga bibig pagtakigan sa isug ga maglabdab yi apuy.

²⁸ Kay arup ga sa mabisug pag bulus mag-aput di tugka sa liug. Rurisun niya ti manga nasyun ga pagsaraun tirigu. Ga manga hayup sida pinaulian rinda pagguyudun.

²⁹ Dapat kamu pag manga nasakupan Diyus manganta, parihu sa pagbuwatun niyu sa yabi sa pista pagdayaw sa Panginuun. Makabaya kamu parihu sa tawu magpatakda sa tunug plawta habang maglakaw atabug sa Bantud Panginuun hampay sambahun siya, ti palalan-iban pag batu Israil.

³⁰ Ipadnug Panginuun ti madala niya pag busis. Ipakakit niya kay kamang alistu yi pumarusa sa masyadu niya pag isug. Dunganan niya inda maglabdab pag apuy, kadaka bumuhus ti uran, ti linti, ti kilat, hanggan uran yilu ga manga batu.

³¹ Pihu gid dalaun ti manga taga Asirya nu masaydan nida ti busis Panginuun hampakun sa kanda.

³² Girahun niya sida. Ag sa kada hampak Panginuun sa kanda, dumungan inda sa tunug pamakaransing hanggan alpa.

³³ Dugay yi nakaalistu ti rugar sunugan sa hari Asirya. Daka inda ag abasad, alistu yi ti mayamu pag pamagba. Ti arup Panginuun ga maglabdab asupri imaw ti pumalabdab sa pamagba.