Isayas 3 - Hanunuu

Ti Parusa sa Hirusalim ag Huda

¹ Pagpatingi kamu! Bul-un Panginuun Diyus Makamaskihan ti tanan pagsarigan manga taga Hirusalim hanggan taga Huda: ti karan-unun ag ti danum nida,

² ti bantug nida pag manga tawu, manga sundalu, manga manughusay, manga purupita, manga manughula, manga paggurangunun,

³ ti kapitan manga sundalu, ti garalangun pag manga tawu, ti manga manugpaanyu, ag ti manga may kangaranan pag manugsalumangka nida hanggan ti manga manuggayuma.

⁴ Ti ipadumara Panginuun sa kanda ti manga kalay-awan.

⁵ Apihun kada usa kay kaparihu. Labanan manga anak ti manga gurangun, ag labanan manga makuri ti garalangun pag manga tawu.

^6-7 Sa ati pag manga sirang, atagun usa ka tawu kay katawuhan ag sabihan, “Maangay waya waydi kanmu rutay, kawu yi lang ti pagdumara sa kanmi taynguna, daut yi kanta rugar.” Dapat sumagut siya, “Balaw niku kamu maawatan. Unman diman may karan-unun ngatay rutay kang magtal-anakan, nakan danga niyu aku pagpilia takinan.”

⁸ Pihu yi mawayak ti Hirusalim ag Huda, dahil paglabagun nida ti Panginuun sa kanda manga bagaw ag buwat. Paglabagun nida ti kadayawan Panginuun.

⁹ Magkahalata sa manga uyahun nida kanda magsalan. Lantadan sida magbuwat kasalanan parihu sa Suduma. Balaw nida inda pag-itagu. Kaawaawa sida! Sida ngapu ti magpadamhak sa sadili nida.

¹⁰ Sabihun niyu sa manga matadlung mapalad sida, dahil anihun nida ti burak manga mayad buwat nida.

¹¹ Dapat kaawaawa ti manga daut dahil rumas-ug sa kanda ti kadamhakan. Balusan sida angay sa kanda binuwat.

¹² Magkun ti Panginuun, “Pag-ihidun manga kalay-awan kang manga nasakupan. Manga babayi ti magdumara. “Manga nasakupan niku, pagdayaun kamu niyu manga takinan. Pag-abatun nida kamu sa salan pag dalan.”

¹³ Nakaalistu yi ti Panginuun hampay pihuun kay manga nasakupan.

¹⁴ Pihuun niya ti manga paggurangunun hanggan ti manga takinan niya nasakupan. Inda kay bangdan niya sa kanda, “Dinaut niyu kang ubasan imaw kang manga nasakupan. Kanyu manga balay punu manga bagay bin-ul niyu sa manga makuri.

¹⁵ Hayga kanyu pag-ihidun kang manga nasakupan ag paggipitun ti manga makuri?” Tunda ngani ti pagsabihun Panginuun Diyus Makamaskihan.

¹⁶ Magkun waya ti Panginuun, “Palabi-labihun ti manga babayi sa Hirusalim. Hantup nimu nu si unu yi gid sida nu maglakaw. Pagpakaransingun waya nida kanda manga pamarinu sa manga lulud, nu magbantay sida may kaibahan waya kindat.

¹⁷ Nakan patubuan niku sida manga garis sa kanda manga ulu tugka sa malug-is sida.”

¹⁸ Sa ati pag sirang bul-un Panginuun ti manga pamarinu sa kanda lulud ag ulu, hanggan liug.

¹⁹ Bul-un diman kanda manga aritus, ugsung, pahamung,

²⁰ pantaung, pamarinu sa takyay, panhuragkus, pamanglu ag manga hapin-hapin.

²¹ Bul-un hanggan kanda manga singsing sa ituturu ag sa irung,

²² kanda kulimpay, pansulud pag rutay, rutay sadsad, sukadan kuwarta,

²³ manga salamin, manga rutay pisahan linu, manga pantaung hanggan manga pahamung.

²⁴ Nu sitay sida mabanglu, mamawu ngap sida. Lubid wadi kanda ihuragkus, ag lug-isun ti mararinu nida pag buhuk. Ti manga marinu nida rutay ilisan saku, ag ilisan yi kanda karinuan makakaray-a.

²⁵ Mamatay sa girahan ti manga lalaki Hirusalim una ti manga maisug nida pag manga sundalu.

²⁶ May manga maglulumian ag maghimanglaw sa manga puwirtahan banwa. Ag ti banwa miparihu sa babayi malubnangan sa daga, naduraan manga kasiyunan.