Isayas 29 - Hanunuu

Ti Pagsabihun tungkul sa Hirusalim

¹ Magkun ti Panginuun, “Kaawaawa ti Hirusalim, ti banwa ulian ni Dabid! Sigi, pagdaus tunda pag banwa kay manga pista kada timpu.

² Dapat lusubun niku tunda, ag manlulumian ag manhirinangbitun kay manga nasakupan. Para sa kangku, ti buu banwa bumaliw ga harandugan punu dugu.

³ Sangputun niku ti Daka banwa Hirusalim. Sangputun niku inda manga bantayaw pan-gira ag tumpukan daga sa habig alad batu hampay madayik.

⁴ Mawayak inda ag bumaliw ga mamaw magtawag ginan sa sirung daga kay busis madala.

⁵ Dapat rumas-ug ti sirang ti mayamu niya pagkalaban bumaliw ga galbuk ngatay upa palidun durus. Kadaka inda mangyari sa kanda.

⁶ Ti Hirusalim alalahanun niku, ag aku, ti Panginuun Makamaskihan, rumas-ug may linti, may linug, may ingay, may buhawi, may bagyu, ag maglabdaban pag apuy.

^7-8 Madura ga tagin-up ti mayamu pag nasyun maggira sa Hirusalim ag magpan-guba manga alad batu. Sida ga tawu magtagin-up magkaun, dapat ay pagka nipulaw magkalun-us diman, ngatay parihu sa tawu magtagin-up mag-inum, dapat ay pagka nipulaw magkauwaw diman.”

⁹ Kamu manga taga Huda, magpatalang-talang kamu ag magpabutaun. Paglangu kamu ag pagpasuruy-suruy, dapat balaw dahil sa intus.

¹⁰ Dahil pinaturug kamu Panginuun mahamuuk. Pinatakipan niya kanyu manga ulu hanggan manga mata balaw may iba nu unman kanyu manga purupita.

¹¹ Para sa kanyu, ti tanan itinultul sa kanyu ga ribru nakasiradu. Nu pag-ipabasa sa tawu madunung magbasa, sabihun niya, “Unman niku tunda mabasa dahil nakasiradu.”

¹² Nu ipabasa nimu sa balaw madunung magbasa, sabihun niya, “Unman aku madunung magbasa.”

¹³ Magkun ti Panginuun, “Inda pag manga tawu magdayaw ag nagdayaw sa kangku sa panab-anan lang nida manga bibig, dapat kanda tagipusuun arayu sa kangku. Ag kanda manga pagsamba sa kangku angay lang sa surundanun tawu.

¹⁴ Nakan utru aku bumuwat dasun-dasun pag makadululaw sa inda pag manga tawu. Ag madura ti kadunungan manga madunung hanggan ti pan-intindi manga may intindi.”

¹⁵ Kaawaawa kamu pag manga magtagu kanyu manga gayak sa Panginuun. Pagbuwatun niyu kanyu manga buruwatun sa madlum ag pagsabihun niyu, “Unman may kumakit ngatay may umalam sa kanta pagbuwatun.”

¹⁶ Maliku kanyu naisipan. Pagbaliwun niyu ga anglit ti manugbuwat anglit. Sumabi aw nguna ti anglit sa nagbuwat sa kanya, “Balaw waydi kawu ti nagbuwat sa kangku?” Makasabi aw ti anglit sa manugbuwat sa kanya kuntay, “Unman kawu may alam?”

¹⁷ Balaw dumugay, ti katalunan Libanun bumaliw abunda pag daga, ag ti abunda pag daga bumaliw kapuruan.

¹⁸ Sa ati pag sirang, ti bungul makadnug sa pagbasahun pag ribru. Ag ti buta, kumakit yi, madi unman may mag-akitan nu unman ti kaduluman lang.

¹⁹ Masulung maan ti manga mapinakumbabaun hanggan ti manga pugri dahil sa Panginuun, ti Banal pag Diyus Israil.

²⁰ Dahil madura ti manga marahigpit ag ti manga marapuya. Ag magkaramatay ti tanan maraibgun sa kadautan,

²¹ hanggan ti tanan manga magbangdan balaw may tutuu sa kaparihu, ti manga marapudil hampay lang papaniwalaun nida ti manga manughusay, hanggan ti pudilun pag kastigus hampay balaw mapakan-an katadlungan ti manga unman may kasalanan.

²² Nakan ti Panginuun, ti Diyus nagribri sa kan Abraham may sinabi tungkul sa kay linahi ni Hakub, “Ginan taynguna, udyi sida may ikay-a ngatay may ikadala.

²³ Dahil nu nakitan nida ti manga binwat niku, galangun nida aku, ti Banal pag Diyus ni Hakub. Ag magkaimaw sida dala sa kangku, sa Diyus Israil.

²⁴ Ti manga balaw nakasalum sa katutuuhanan makasalum yi, ag ti manga magriklamu nu pagtudluan makabaya yi.”