Isayas 28 - Hanunuu

Ti Pagsabihun tungkul sa Samarya

¹ Kaawaawa ti Samarya, parihu sa sangbaw busang kayu kadayawan manga manuglangu pag takinan manga taga Israil. Ti banwa Samarya sa maabunda pag karatagan, dapat kay karinuan madura parihu sa busang magkarubay.

² Pagpatingi kamu! Ti Panginuun may inalistu mabaskug ag makapangyarihan pag nasyun imaw ti manwayak sa Samarya. Parihu inda sa magpandaut pag bagyu ag sa magpaywas pag baha.

³ Tinatatataan niya ti Samarya, imaw ti sangbaw busang kayu kadayawan manga manuglangu pag takinan taga Israil.

⁴ Inda pag banwa asan sa maabunda pag karatagan, pat-ay kay karinuan inda madura ga busang magkarubay. Kadaka maragdag tunda parihu sa un-an burak igus pagbul-un ag kadaka pagkan-un kada makakit.

⁵ Sa ati pag sirang, ti Panginuun Makamaskihan bumaliw parihu sa marinu pag sangbaw busang kayu para sa kay manga nasawad niya pag manga nasakupan.

⁶ Giyahan niya ti manga manughusay hampay ipaburayhaw ti katadlungan sa kanda maghusay. Pakan-an niya isug ti manga manugbantay sa banwa laban sa manga kalaban.

⁷ Dapat kainda, pasuray-suray ti manga manughandug hanggan ti manga purupita dahil sa kanda kalanguhan, balaw yi sa kang-ud kanda naisipan. Salan yi ti pagkaintindi manga purupita sa pangakakitun, balaw kang-ud ti manga pasya manga manughandug.

⁸ Ti manga lamisa nida punu suka ud may bahagi malumpiyu.

⁹ Magriklamu sida ag magkun, “Hintay nguna kay isip niya sa kanta, manga anak aw di waya bag-u lang bul-iw sa susu? Hayga katida kay pag-itudlu sa kanta?

¹⁰ Bantayi nimu nu magtudlu siya; pausa-usa ka litra, pausa-usa ka linya, ag pausa-usa ka aradalun.”

¹¹ Dahil sa dayu sida mamatingi, manpakihampang ti Panginuun sa inda pag manga tawu sa panab-anan manga day-uhan tuhay kay pamagaw.

¹² Kaindaay kay sabihun, “Malakawan niyu ti kapaharihan sa kanyu daga. Dapat balaw diman gid sida mamatingi.”

¹³ Nakan ngani, tudluan sida Panginuun pausa-usa ka litra, pausa-usa ka linya, ag pausa-usa ka aradalun. Sa kanda maglakaw magpu sida, mabiyagan, masduk, ag madakup.

¹⁴ Nakan kamu pag manga magpuya pag manga takinan nasakupan Hirusalim, patingihi niyu ti Panginuun!

¹⁵ Dahil magpadayaw kamu ag magkumun, “Nagbuwat kami kasunduan sa kamatayan hampay balaw kami mamatay, ag nagkasundu kami sa rugar manga namatay hampay balaw kami madara ati. Nakan ngani, balaw kami mipadamhak una waya rumas-ug ti manga kadautan ga baha, dahil kami magsarig maribri sa panab-anan nimi pamudil ag pagdaya.”

¹⁶ Nakan inda ti pagsabihun Panginuun Diyus, “Bantayi niyu! Ipakana niku sa banwa Siun ti batu pag pundasyun, batu masarigan, mapag-un ag mahalaga. Ti manga magsarig sa kanya balaw harus-harus sa kanda manga pagbuwatun.

¹⁷ Buwatun niku panukat ti katadlungan. Ipapalid niku sa bagyu hanggan sa baha ti kapudilan pagsarigan niyu rumibri sa kanyu.

¹⁸ Bumaliw unman may pulus kanyu kasunduan sa kamatayan hanggan kanyu kinasunduan sa rugar manga namatay. Dahil midamhak kamu nu rumas-ug ti manga kadautan ga baha.

¹⁹ Pirmi inda rumas-ug sa kanyu, sirang-sirang, sa surip ag sa yabi, pihu midamhak kamu.” Dalaun kamu nu masalman niyu inda ti pagsabihun.

²⁰ Dahil kamu miparihu sa tawu dag-ud kay igyaan, masiput kay kumut.

²¹ Kay tutuu, gumira ti Panginuun parihu sa binwat niya sa Bantud Pirasim ag sa Luung Gibyun. Buwatun niya ti balaw pagsarigan niya manga nasakupan.

²² Nakan taynguna, danga yi kamu magpuya, barang dugangan waya niya ti parusa sa kanyu. Dahil nadnugan gid ngapu niku ti sugu Panginuun Diyus Makamaskihan wayakun niya kanyu buu daga.

²³ Patingihi niyu kaayad ti sabihun niku.

²⁴ Ti manugtanman lugud pirmi yi lang aw mangaradu; balaw yi lang aw mananum?

²⁵ Unman aw lugud nu alistu yi ti daga, pagsabugan niya inda tuhay-tuhay pag binhi ti kada tanman, parihu abi sa pamalasa, tirigu, sibada ag ispalta?

²⁶ Alam niya ti kailangan niya buwatun dahil pagtudluan siya Diyus.

²⁷ Balaw niya paggamitan marabuyat pag panggiuk ti manga inani pamalasa, nu ud pagpagpagun lang ngatay paghampakun lang bitlag.

²⁸ Ti tirigu pagbuwatun tinapay madali magkarunut, nakan balaw niya inda masyadu paggiukun. Paggamitan niya inda karitun panggiuk, dapat pagpihuun niya balaw marunut.

²⁹ Inda pag kinaalman ginan sa Panginuun Makamaskihan. Mayad kay manga paanyu, makadululaw kay kinaalman.