Isayas 27 - Hanunuu

¹ Sa ati pag sirang, gamitun Panginuun kay matarum ag makamaskihan pag baladaw hampay matyun ti Libyatan, ti maliksi ag magyapang pag daragun sa kalalawdan.

² Sa ati pag sirang, manganta kamu tungkul sa ubasan magtubas abunda, histuda niku banwa.

³ Aku ti Panginuun ti mag-alaga sa ubasan. Pagbunyagan niku inda ag pagbantayan sirang yabi hampay balaw madaut.

⁴ Balaw yi aku magkagalit sa inda pag ubasan. Dapat sa udas may makitan aku manga halaman may dugi, bul-un niku tida ag sunugun.

⁵ Dapat maribri siya nu pumakarani ag manhagad awat sa kangku.

⁶ Rumas-ug ti sirang ti nasakupan Israil kay lahi ni Hakub manggamut parihu sa halaman. Mansanga inda, mamusang, hanggan mamurak mayamu ag pun-un ti buu kalibutan.

⁷ Balaw pagparusahan Diyus ti Israil parihu sa pagparusa niya ag pagmatay sa manga kalaban nida.

⁸ Ipinabihag Panginuun kay manga nasakupan bilang parusa sa kanda. Ipinalid niya sida sa pinakamabisug pag durus ginan sa butlakan.

⁹ Patawadun lang sida nu dautun nida kanda manga harandugan batu ag nu runutun ka pinu ag iyamut ti manga tulduk tanda diyusa si Asira, hanggan ti manga harandugan pagsunugan nida kamangyan.

¹⁰ Nawayak yi ti inaladan batu pag banwa. Ga pangawakawaan yi inda. Nagbaliw pasturan wadi inda ag paraharyan manga baka. Tinabu hinarab manga baka ti manga labung sa manga sanga.

¹¹ Pagka nabari ag nalayung ti manga sanga, tinipun inda manga babayi ag binwat pamagba. Dahil sa unman may intindi inda pag manga tawu. Balaw sida kaawaan Diyus imaw ti naglalang sa kanda.

¹² Sa ati pag sirang, panipunun tig-usa-usa Panginuun ti manga Israilita ginan sa Sapa Iyupratis tugka sa bululusan danum Ihiptu ga magtipun manga butir sa girik-an.

¹³ Nu tumunug ti budyung mabisug, magbinalik sa Hirusalim ti magkakurian pag manga Israilita nabihag Asirya ag Ihiptu. Sambahun nida ti Panginuun sa banal pag bantud Hirusalim.