Isayas 26 - Hanunuu

Kanta Pagdayaw sa Diyus

¹ Sa ati katpung pag sirang inda pag kanta kantahun sa Huda: Marig-un yi kanta banwa! Ti manugribri pag Diyus ga alad batu masangputan sa kanta.

² Bukasan ti manga puwirtahan banwa hampay makaslud ti nasyun matadlung, matinupadun sa Panginuun.

³ Panginuun, pakan-i nimu lubus pag kahusayan ti tawu kawu pirmi ti pag-isipun dahil magsarig siya sa kanmu.

⁴ Pagsarig kamu pirmi sa Panginuun, dahil siya kanta palalan-iban pag batu hanggan aban.

⁵ Sa ungud, pag-ipakababa niya ti manga marapadayaw. Pagrup-agun niya kanda manga banwa tugka sa marunut sa daga.

⁶ Ag inda pagtatatataan manga pugri kanda inapi.

⁷ Maratag ti dalan tawu matadlung, kawu, Panginuun matadlung, ti nagratag inda.

⁸ Panginuun, kanmi sinunud kanmu manga sugu ag nagsarig kami sa kanmu. Hingbut nimi kawu kanmi madayaw.

⁹ Buu tagipusuun kawu paghanap-hanapun nu yabi. Nu sintinsiyahan nimu ti manga tawu sa kalibutan, dumunung sida mangabuhi matadlung.

¹⁰ Una pagkaawaan nimu ti daut, unman diman sida magdunung mangabuhi matadlung. Una waya sida nangulian kaibahan manga matadlung, parargu di gid sida sa kanda buruwatun daut, ag balaw nida pagkilalan-un kanmu kamaskihan.

¹¹ Panginuun, alistu yi duy kawu pumarusa sa kanda, pat-ay balaw nida alam. Paandami nimu sida, Panginuun. Pakay-aha sida. Ipakakit nimu sa kanda nu kabitay nimu kamahal kanmu manga nasakupan. Rurisun nimu sa panab-anan apuy kanmu manga kalaban.

¹² Panginuun, pakan-i duy nimu kami mayad pag kahamtangan, dahil ti tanan nimi magkabuwat, magkabuwat nimi dahil sa awat nimu.

¹³ Panginuun nimi Diyus, pagdumarahan kami tuhay pag panginuun, dapat kawu lang kanmi pagsambahun.

¹⁴ Tigbak yi sida taynguna, balaw yi mabuhi waya. Pinarusahan niyu sida ag minatay hampay malimtan sa balaw yi maimatun-an.

¹⁵ Panginuun pinadaka nimu kanmi nasyun. Pinaluang nimu kanmi tab-anan, ag inda ti nakapakaun kagalangan sa kanmu.

¹⁶ Panginuun, pinarusahan nimu kanmu manga nasakupan, sa kanda manga kakurian nandangup ag nanawag sida sa kanmu.

¹⁷ Panginuun, mag-akitan gid nimu kanmi kakurian. Parihu kami sa usa ka babayi magpanganak, magpanringgit sa masyadu pag sakit.

¹⁸ Nagtawag kami dahil sa kakurian, dapat unman diman kami may ilinusad. Unman kami may nabwat hampay iribri ti daga nimi, ag dapat unman diman kami may nabuwat una hintay.

¹⁹ Dapat utru mabuhi kanmu manga nasakupan namatay. Bumangun kanda manga bangkay ag kumanta sa kabayaan. Nu kabitay ti tun-ug magparamig sa daga, kawu diman Panginuun ti utru bumuhi sa manga namatay.

²⁰ Manga kasimanwa, pagsulud kamu sa kanyu manga balay ag talakpan niyu kanyu sabian. Pagpatagu dapu kamu tugka sa madura ti pangagalit Panginuun.

²¹ Dahil rumas-ug yi siya ginan sa kay ulian hampay parusahan ti manga tawu sa kalibutan dahil sa kanda kasalanan. Ipalwang daga ti manga tawu minatay, ag balaw yi niya itagu waya.