Isayas 25 - Hanunuu

Dayawun ti Diyus

¹ Panginuun, kawu kang Diyus! Dayawun niku kawu ag kilalahun dahil makadululaw kanmu manga binwat. Tinupad nimu kanmu manga gayak ginan waya kaybi pag panahun.

² Winayak nimu ti manga banwa taga iba nasyun hanggan ti may manga alad batu. Winayak diman nimu ti manga mapag-un pag bahagi nida banwa, udyi nida maipatindug utru.

³ Nakan dayawun kawu manga tawu may kapangyarihan ag galangun manga mahigpit pag manga nasyun.

⁴ Kawu ti darangpan manga pugri hanggan manga magpangailangan sa udas kakurian. Kawu ti darangpan sa udas may bagyu hanggan tig-irinit. Dahil ti paggira manga mahigpit pag tawu ga bagyu maghampak sa alad batu,

⁵ ag ga init sa tigangan. Dapat inampara nimu ti riringgitan manga day-uhan. Inampara nimu ti karantahan marahigpit pag manga tawu, ga init nadura dahil natakluban rurum.

⁶ Sitaay sa Bantud Siun, ti Panginuun Makamaskihan mangalistu usa ka karan-an para sa tanan. Manga masarap pag karan-unun hanggan manga irinmun kay ialistu.

⁷ Sa inda diman pag bantud, duraun niya ti karukuan manga tawu sa tanan nasyun.

⁸ Bul-un diman Panginuun Diyus ti kamatayan ag payidun niya ti manga luwa tanan tawu. Bul-un niya ti kakay-ahan niya manga nasakupan sa buu kalibutan. Mangyari gid inda dahil binagaw Panginuun.

⁹ Nu inda mangyari yi, sabihun manga tawu, “Siya kanta Diyus! Nagsarig kita sa kanya, irinibri niya kita. Siya ti Panginuun kanta pagsarigan. Pagbaya kita ag mandaus dahil irinibri niya kita.”

¹⁰ Ungud awatan Panginuun ti Bantud Siun, dapat parusahan niya ti Muab. Tat-an niya inda ga dayami sa rayamtan paruk.

¹¹ Paghingabtun nida makaribri sa tunda pag kahamtangan ga usa ka tawu magkipay-kipay sa danum. Dapat una madunung sida maglanguy, italnud diman sida Panginuun. Ipaababa sida dahil sa kanda magpadayaw.

¹² Gubaun niya kanda abwat ag mapag-un pag alad batu tugka sa marunut ag mawayak sa babaw daga.