Isayas 24 - Hanunuu

Parusahan Diyus ti Kalibutan

¹ Pagpatingi kamu! Gubaun Panginuun ti kalibutan tugka sa udyi inda makinabangan ag kalatun niya kay manga nasakupan inda.

² Usa lang ti ras-ugan tanan: manughandug man ngatay nasakupan, amu ngatay suruguun, manugtinda ngatay manugpabili, manugpautang ngatay manug-utang.

³ Lubus yi gid mawayak ti kalibutan ag unman may masawad siyun. Matupad ngani inda dahil binagaw Panginuun.

⁴ Mauga ag mangganit ti daga. Manlumuy ti buu kalibutan hanggan ti manga pagkilalan-un ag makapangyarihan pag tawu.

⁵ Ti kalibutan inuringan niya manga nasakupan, dahil balaw nida sinunud ti Kasuguan Diyus hanggan kay manga surundanun. Linabag nida ti unman may katapusan pag taratu Diyus sa kanda.

⁶ Nakan sinaadan Diyus ti kalibutan, nakan may saragtun ti manga nasakupan dahil sa kanda manga kasalanan. Sunugun sida ag pira-pira wadi ti masawad.

⁷ Malayung ti manga ubas, ag matabu ti irinmun ubas. Ti manga magbaya manruku,

⁸ udyi madnugan ti manga mararinu pag tunug manga pamakaransing ag alpa, hanggan ti huruyawan manga tawu magbarayaan.

⁹ Madura ti manga magkarantahan sa kanda mag-irinuman, ti irinmun bumaliw mapait.

¹⁰ Mawayak ti banwa ag udyi mapakinabangan. Talakpan ti manga sabian kada balay hampay balaw may makasulud.

¹¹ Manringgit ti manga tawu sa baklayan, magligaw intus. Kanda kasulungan balyuhan karukuan. Udyi may kasulungan sa kalibutan.

¹² Ti banwa madaut yi lang gid, hanggan kay manga sabian.

¹³ Pira-pira wadi ti masawad tawu sa tanan nasyun sa kalibutan, parihu sa ulibu ngatay ubas pagkalawuy tigpuruti.

¹⁴ Ti manga masawad pag tawu manringgit sa kasulungan. Ti manga sa isalpan tumultul tungkul sa kamaskihan Panginuun.

¹⁵ Nakan kailangan diman dayawun manga tawu sa butlakan hanggan manga rugar arani sa dagat ti Panginuun, ti Diyus Israil.

¹⁶ Madnugan ti karantahan una naan katpung sa kalibutan, “Dayawun ti matadlung pag Diyus.” Dapat kaawaawa aku. Magpanlumuy aku! Dahil parargu ti magpandaya manga tawu maradaya.

¹⁷ Kamu pag manga nasakupan manga nasyun sa kalibutan, mag-alagad sa kanyu ti kadalaan hanggan ti kali, ag suduk.

¹⁸ Ti lumayas dahil sa kadalaan malagpak sa kali, ag masduk ti manga lumuwang siyun. Umuran mabaskug ag matandug kay paratukawan kalibutan.

¹⁹ Gumitlak ti kalibutan ag mabka.

²⁰ Mandaplahay inda ga langu ag ga payag magkahalu-halu sa bagyu. Ti kalibutan magkabyatan dahil sa kasalanan, ag mawayak inda udyi utru bumangun.

²¹ Sa ati pag sirang, parusahan Panginuun ti manga makapangyarihan pag linalang sa langit, hanggan ti manga hari sitay sa kalibutan.

²² Mirinsanan sida ilagpak sa kali parihu sa manga pirisu. Pirisuhun sida bag-u parusahan.

²³ Mandulum ti init ag ti bulan dahil humari ti Panginuun Makamaskihan sa Bantud Siun, sa Hirusalim. Ag ati pag miburayhaw kay kadayawan sa atubangan manga takinan niya manga nasakupan.