Isayas 23 - Hanunuu

Ti Pagsabihun tungkul sa Tiru ag Sidun

¹ Inda pagsabihun tungkul sa Tiru: Paglumi kamu manga tawuhan barku Tarsis. Dahil nawayak yi kanyu duungan sa Tiru. Itinultul yi tunda sa kanyu manga ginan sa Sipru.

² Dag-ingay kamu pag manga mag-ulian sa saruy dagat hanggan kamu pag manga manugnigusyu sa Sidun. Kanyu manga biyahiru ti magpayaman sa kanyu magbiyahi

³ sa kadagatan para bumili ag magpabili manga ani sa Sihur, kay kabaliw sapa Nilu. Ag magnigusyu sa kanyu ti manga nasyun.

⁴ Pagkay-a kawu, pag banwa Sidun, kawu ti palalan-iban manga tawu mag-uli sa saruy dagat. Pagbugyahan yi kawu kadagatan. Magkun siya, “Unman aku may anak; unman aku may pag-alagaan anak, babayi ngatay lalaki.”

⁵ Subra damdamun manga taga Ihiptu nu nabaritaan nida ti nangyari sa Tiru.

⁶ Panlumi kamu, kamu pag manga mag-uli sa saruy dagat. Pagdipay kamu sa Tarsis.

⁷ Kaybi, masulung ti banwa Tiru, ti ipinatindug kaybi sa un-an pag panahun. Nakaras-ug kay manga nasakupan inda sa ararayu pag daga ag sinakup nida ati pag manga daga. Dapat unu ti nangyari sa kanya taynguna?

⁸ Si unu ti naggayak katida sa Tiru? Inda pag banwa nagsakup sa manga rugar. Kay manga galalangun pag manugnigusyu nibantug sa buu kalibutan.

⁹ Ti Panginuun Makamaskihan ti may gayak inda hampay iababa ti magpadayaw sa kay kapangyarihan hanggan ti manga pagkilalan-un bantug sa buu kalibutan.

¹⁰ Kamu manga taga Tarsis mahimu yi lumawuy sa Tiru, parihu sa Sapa Nilu una naan tag pag magbulus, dahil udyi may umampara sa kanyu.

¹¹ Ihinunat Panginuun kay kamang sa dagat, hinalu niya ti manga kaharian. Isinugu niya wayakun ti manga kampu Pinisya.

¹² Magkun ti Panginuun, “Manga nasakupan Sidun, tapus yi kanyu manga masulung pag sirang. Midamhak yi kamu! Una waya lumayas kamu atag sa Sipru, unman diman waydi kamu makapahari ati.”

¹³ Bantayi niyu ti daga manga taga Babilunya. Naan yi inda kay manga nasakupan? Ginira tunda taga Asirya ag dinaut ti manga mapag-un pag bahagi. Pinabay-anan nida tunda guba ag nagbaliw ulian wadi manga maila hayup.

¹⁴ Paglumi kamu, kamu manga magbiyahi sa Tarsis, dahil nawayak yi ti banwa kanyu pag-atagan.

¹⁵ Ti Tiru malimtan sa sulud pitumpulu ka timpu, parihu kay kadugay sa buhi usa ka hari. Dapat nu makalawuy tunda pag manga panahun, miparihu siya sa usa ka babayi baraydan sa inda pagkarantahun: “Babayi baraydan, kawu nalimtan yi.

¹⁶ Nakan bul-a yi kanmu alpa ag patnuga nimu kaayad habang magpalibut kawu sa banwa. Pagkanta kawu dag-apas hampay maalaala kawu.”

¹⁷ Pagkalawuy 70 ka timpu, alalahanun Panginuun ti Tiru. Dapat utru di maan buwatun Tiru kay binwat niya kaybi, parihu sa pagbuwatun babayi baraydan. Mamuwat siya kadautan sa tanan pag manga kaharian sa kalibutan hampay makakuwarta.

¹⁸ Dapat aban sa uryan, kay kitaun balaw yi niya ibutang. Ihandug yi niya inda sa Panginuun hampay panbili mayamu karan-unun ag manga marinu pag kalasi rutay para sa manga magsirbi sa Panginuun.