Isayas 22 - Hanunuu

Ti Pagsabihun tungkul sa Hirusalim

¹ Inda ti pagsabihun tungkul sa luung pangakakitun. Hintay ti magpangyari? Hayga kamu magdayik sa manga atup?

² Magkalaguluhan ag magriringgitan ti manga tawu sa banwa. Ti manga namatay sa kanyu balaw man sa gira pag namatay.

³ Ti tanan niyu manga takinan naglinayas ag nadakup ud may laban. Ti iba sa kanyu naggayak malagiw, dapat nadakup diman.

⁴ Pabay-ani niyu aku manlumi para sa kang manga kasimanwa namatay. Danga niyu aku paglibanga.

⁵ Dahil itinagka Panginuun Diyus Makamaskihan inda pag sirang magkalaguluhan, mamalalagiwan, ag magkalalitu ti manga tawu sa luung pangakakitun. Ti manga alad batu magkarapugdak ag ti riringgitan manga tawu mag-asaydan di tugka sa kabantudan.

⁶ Maggira ti manga sundalu taga Ilam masakyan sa manga kabayu ag may manga ugyung. Hanggan ti manga sundalu taga Kir maggira diman may hiyaput kanda panangga.

⁷ Pagsangputan nida kanyu manga karatagan abunda nu magtubas, ag magturumpukan sida sa kanyu sabian banwa.

⁸ Naagaw yi nida ti manga panangga Huda. Nagbuul kamu manga armas sa burutangan.

⁹ Binantayan niyu ti manga alad batu sa Banwa ni Dabid hampay maalaman niyu nu naan inda ti nadaut. Nanipun kamu danum sa tipunan sa lawud.

¹⁰ Binantayan niyu ti manga balay sa Hirusalim bag-u dinaut kay iba hampay gamitun kay manga batu sa paghiwat nadaut alad batu banwa.

¹¹ Namuwat kamu tipunan danum sa tab-anan duwa ka alad batu, bag-u pinunu niyu inda danum ginan sa daan tipunan. Dapat balaw niyu naisip ti Diyus ti may gayak inda kaybi di waya ag pinahintulutan niya inda mangyari.

¹² Nagpatalahap sa kanyu ti Panginuun Diyus Makamaskihan kuntay kamu pagpanrukuan, paglumi, pagpakidkid ag pagsulung rutay panruku bilang tanda sa kanyu mag-ampu.

¹³ Bagkus ngap nanhandaan kamu ag nagbarayaan. Nangiyaw kamu manga baka ag karanidu, bag-u nangaran-an ag nanginuman. Magkun kamu, “Pagmasulung kita, mangaun ag manginum, dahil aldaw barang mamatay yi kita.”

¹⁴ Magkun sa kangku ti Panginuun Diyus Makamaskihan, “Balaw niya kamu patawadun sa kanyu manga kasalanan tugka sa magkabuhi waya kamu.”

Ti Pagsabihun tungkul sa kan Sibna

¹⁵ Sinugu aku Panginuun Diyus Makamaskihan kuntay atihi niku si Sibna imaw ti piniyaran sa balay hari, ag sabihun sa kanya,

¹⁶ “Si unu kawu hampay mangali sa habig bantud hampay magbuwat lulubngan kaibahan ti manga pagkilalan-un? Si unu ti nagpakaun sa kanmu karampatan kuntay buwatun inda?

¹⁷ Pag-aman kawu! Una waya kawu makapangyarihan, dakpun kawu ag iyamut Panginuun.

¹⁸ Linginun niya kawu ga bula ag iyamut sa maluang pag daga. Ati kawu pag mamatay ag ati diman pagmawayak kanmu pag ipadayaw pag manga kalisa. Nakapakaun kawu kakay-ahan sa magtal-anakan nimu amu.

¹⁹ Magkun waya ti Panginuun sa kanmu, ‘Paighitun niku kawu sa kanmu katungkulan.

²⁰ Sa ati pag sirang, tawagun niku kang manugsirbi si Ilyakim kay anak ni Hilkiyas.

²¹ Ipasulung niku sa kanya kanmu rutay hanggan kanmu huragkus, ag iayaw niku sa kanya kanmu kapangyarihan. Siya ti pinagka-ama manga taga Hirusalim hanggan taga Huda.

²² Iayaw niku sa kanya ti susi sa kaharian ni Dabid. Nu bukasan niya ti sabian, balaw may makasiradu, nu kay talakpan unman may makabukas.

²³ Pabisugun niku siya sa kay katungkulan ga mapag-un pag sad-angan sa lingub, ag mamakaun siya kagalangan sa kay magtal-anakan.

²⁴ Ti buu niya magtal-anakan hanggan manga katawuhan sumarig sa kanya. Siya ga sad-angan pagsad-angan manga tuhay-tuhay pag dariit palaulian ginan sa tasa tugka sa anglit.

²⁵ Sa ati pag sirang, nu mayamu yi ti nakasad-ang sa kanya, malagpak siya ag magkarawayak ti tanan nakasad-ang sa kanya. Matupad ngani inda dahil aku, ti Panginuun, ti magsabi inda.’ ”