Isayas 21 - Hanunuu

Ti Pagsabihun tungkul sa Babilunya

¹ Inda ti pagsabihun tungkul sa Babilunya, pangawakawaan arani sa saruy dagat: Gumira ti manga kalaban parihu sa buhawi. Lumakaw sa Nigib ginan sa pangawakawaan, sa pagkadalaan pag daga.

² Nakitan niku ti usa ka madala pag pangakakitun tungkul sa pagkamaradaya ag kadamhakan. Kamu manga taga Ilam ag taga Midya, sangputa niyu ti Babilunya ag giraha. Tapusun yi Diyus kay magpakuri sa iba pag manga nasyun.

³ Ti nakitan ag nasaydan niku sa kang pangakakitun nakapakaun gid masyadu pag kadalaan sa kangku. Nanarakit kang bilug, ga babayi magkakurian sa magpanganak.

⁴ Pagkulbaan aku ag pagtakigan sa dala. Mana makapahari aku sa pagsangday init, dapat balaw mahimu, dahil magkadala aku sa mahimu mangyari.

⁵ Mag-alistu karan-an ti manga takinan. Magpauli sida manga suhi hampay tukawan. Magkaun sida ag mag-inum, bag-u kadaka may nanringgit, “Pag-apura kamu! Pag-alistu kamu sa girahan.”

⁶ Magkun sa kangku ti Panginuun, “Pagpauli kawu manugbantay sa banwa imaw ti manugbarita sa kay makitan.

⁷ Kailangan pagbantay siya mayad ag ipaalam rargu nu nakakit siya manga kalisa pagguyudun duwa ka kabayu, ag manga sundalu masakyan sa manga asnu hanggan sa manga kamilyu.”

⁸ Nanringgit ti manugbantay, “Maisturu sirang yabi magtanud duy aku sa bantayaw.

⁹ Taynguna, bantayi niyu! May magras-ug manga kalisa guyud-guyud duwa ka kabayu.” Ag magkun waya ti manugbantay, “Nawayak yi ti Babilunya! Ti tanan niya manga histuda diyus-diyusan nag-iridugsak sa daga ag nagkarawayak tanan.”

¹⁰ Bag-u magkun aku, “Manga kaparihu niku manga Israilita, ga manga giniuk tirigu, pagsabihun niku sa kanyu kang nasaydan sa Panginuun Makamaskihan, ti Diyus Israil.”

Ti Pagsabihun tungkul sa Idum

¹¹ Inda ti pagsabihun tungkul sa Idum: May tawu ginan sa Idum pirmi magpaingana sa kangku, “Manugbantay, dugay aw waya ti surip?”

¹² Sinmagut aku, “Magkasurip yi pat-ay magras-ug yi maan ti yabi. Nu gustu nimu mamaingana utru pagbalik yi lang kawu.”

Ti Pagsabihun tungkul sa Arabya

¹³ Inda ti pagsabihun tungkul sa Arabya: Kamu manga nasakupan Didan, magbaklay kamu ag magkampu sa pangawakawaan Arabya,

¹⁴ pakan-i niyu danum ti manga magka-uwaw. Kamu manga mag-uli sa Tima, pakan-i niyu karan-unun ti manga naglinayas ginan sa kanda-kanda manga rugar.

¹⁵ Naglinayas sida ginan sa mahigpit pag labanan ag paglagsun sida nida manga kalaban may baladaw ag manga ugyung.

¹⁶ Magkun ti Panginuun sa kangku, “Sa sulud usa ka timpu, matapus ti kapangyarihan Kidar.

¹⁷ Pira-pira ti masawad sa kay manga maraisug pag sundalu maggamit ugyung.” Matupad ngani inda dahil binagaw Panginuun, ti Diyus Israil.