Isayas 20 - Hanunuu

Ti Pagsabihun tungkul sa Ihiptu ag sa Itiyupya

¹ Angay sa sugu ni Hari Sargun taga Asirya, ginira kumandir manga sundalu Asirya ti Asdud, ag kanda naagaw inda.

² Bag-u inda nangyari, magkun ti Panginuun sa kan Isayas kay anak ni Amus, “Ubaha nimu kanmu rutay panruku hanggan lapak.” Binwat ngani inda ni Isayas, bag-u palakaw-lakaw siya uba ag unman may lapak.

³ Magkun ti Panginuun, “Kang manugsirbi si Isayas palakaw-lakaw uba ag unman may lapak sa sulud tulu ka timpu. Inda usa ka pasandam sa Ihiptu ag sa Itiyupya.

⁴ Dahil bihagun hari Asirya ti manga taga Ihiptu hanggan ti taga Itiyupya, anak man ngatay gurangun. Bihagun sida uba ag unman may lapak. Makitan kanda manga buli, ungud ngani mangay-a gid ti Ihiptu.

⁵ Manlubay ag mangay-a ti manga magsarig sa Itiyupya hanggan ti Ihiptu.

⁶ Sa sirang mangyari tida, sabihun manga Pilistiyu, ‘Bantayi niyu ti nangyari sa kanta pagsarigan pag manga nasyun ag paghagadan awat hampay kita makaribri sa hari Asirya. Kabitay wadi kita makaribri?’ ”