Isayas 2 - Hanunuu

Kahusayan sa Kalibutan

¹ Inda ti ipinaburayhaw Diyus sa kan Isayas kay anak ni Amus tungkul sa Huda ag Hirusalim:

² Sa manga uryan pag sirang, ti bantud pagtindugan Balay Diyus Panginuun bumaliw pinakamahalaga sa tanan pag bantud. Rumas-ug siyun ti manga tawu ginan sa tuhay-tuhay pag nasyun.

³ Sabihun nida, “Atag yi kita sa bantud Panginuun, sa Balay Diyus, Diyus ni Hakub. Tudluan niya kita ati angay sa kay kagustuhan hampay sundun nita.” Dahil ti Kasuguan Panginuun ginan sa Siun, ag ti bagaw Panginuun ginan sa banwa Hirusalim.

⁴ Sa panab-anan manga kasuguan niya, pagkarausahun niya ti mayamu nasyun. Nakan balaw yi man-girirahan ti manga nasyun, ag balaw yi waydi sida mamaanad kanda sundalu para sa girahan. Buwatun wadi nida sudsud aradu kanda manga baladaw ag sanggut panabas kanda manga bangkaw.

⁵ Abala kamu, manga linahi ni Hakub, mangabuhi kita sa katutuuhanan ipinakaun Panginuun sa kanta.

Ti Sirang Pagsintinsiya Diyus

⁶ Ungud duy ipinurya nimu, Panginuun, kanmu manga nasakupan, ti linahi ni Hakub, dahil nagpaniwala sida sa manga turun-anun ginan sa butlakan hanggan sa manga manughula, parihu sa manga Pilistiyu. Pagsundun nida ti ugali manga day-uhan.

⁷ Abunda sa pilak ag gintu ti daga Israil, balaw magkatabu kanda kayamanan. Mayamu kanda kabayu, ag balaw mabilang kanda manga kalisa.

⁸ Mayamu sida diyus-diyusan, pagsambahun nida inda madi sida diman waydi ti nagbuwat.

⁹ Nakan Panginuun, ipaababa nimu ti kada usa sa kanda, hampay mangay-a sida. Danga nimu sida pagpatawada.

¹⁰ Manga taga Israil, pagpalagiw kamu atag sa manga lukib ag manga kali hampay patagu sa pangagalit Panginuun hanggan sa kay kamaskihan.

¹¹ Rumas-ug ti sirang ti Panginuun lang ti dayawun. Ipaababa niya ti palabi-labihun hanggan ti marapadayaw.

¹² Dahil nagtagka sirang ti Panginuun Makamaskihan nu kapira niya ipakababa ti manga marayabang hanggan ti marapadayaw, ag ti manga maghantup sida makapangyarihan.

¹³ Pamukanun niya ti tanan arabwat pag puun kayu sidru sa Libanun hanggan ti tanan puun kayu insina sa Basan.

¹⁴ Ratagun niya ti tanan arabwat pag bantud hanggan tagudtud,

¹⁵ rup-agun ti tanan arabwat pag bantayaw hanggan alad batu.

¹⁶ Ilimus niya ti tanan barku Tarsis hanggan ti mararinu pag sarakyan sa dagat.

¹⁷ Ipakababa ngani niya ti manga marapayabang hanggan ti marapadayaw. Ti Panginuun lang ti maipaabwat sa ati pag sirang.

¹⁸ Madura yi ti manga diyus-diyusan.

¹⁹ Malagiw ti manga tawu atabug sa manga lukib sa dirigun hanggan sa manga ukang daga, hampay patagu sa pangagalit Panginuun hanggan sa kay kamaskihan nu tandugun yi niya ti kalibutan.

²⁰ Sa ati pag sirang, ipanyamut nida tag sa manga angbu hanggan banug ti manga tawu-tawu pilak ag gintu kanda binwat hampay sambahun.

²¹ Malagiw ngani sida atabug sa manga lukib sa dirigun hanggan sa daraka batu hampay patagu sa pangagalit Panginuun hanggan sa kay kamaskihan nu tandugun yi niya ti kalibutan.

²² Danga kamu magpiyar sa tawu. Mamatay diman waydi sida. Hintay waydi ti mabuwat nida?