Isayas 19 - Hanunuu

Ti Pagsabihun tungkul sa Ihiptu

¹ Inda ti pagsabihun tungkul sa Ihiptu: Pagpatingi kamu! Ti Panginuun masakyan sa rurum ag mabisug inmatag sa Ihiptu. Pagtakigan sa dala ti manga diyus-diyusan Ihiptu, ag pagkulbaan ti manga Ihipsiyu.

² Magkun ti Panginuun, “Palabanun niku ti manga taga Ihiptu: Patar-ari laban sa patar-ari, kamalay laban sa kamalay, banwa laban sa banwa, ag kaharian laban sa kaharian.

³ Mabul-an pagsarig ti manga taga Ihiptu, ag guluhun niku kanda manga gayak. Mamaingana sida sa manga diyus-diyusan, sa karadwa manga namatay, sa manga panhirian ag manga pandaniwan.

⁴ Ipasakup niku sida sa usa ka mahigpit pag hari.” Tunda ngani ti pagsabihun Panginuun Makamaskihan.

⁵ Mak-at ti Sapa Nilu.

⁶ Ti manga pagbulusan bulbugan mamawu ag mak-at. Marubay ti manga anyamu, ti manga tigbaw,

⁷ hanggan ti tanan tanum sa pangpang sapa. Malayung ag mangganit ti daga arani sa Sapa Nilu ag magkaramatay kay manga halaman siyun.

⁸ Manlumi, manrukuan, ag manlumuy ti manga manug-isda sa Sapa Nilu,

⁹ ag manruku ti manga manugbuwat pisahan linu.

¹⁰ Maduraan pag-asa ti manga manughabul hanggan ti iba waya manga manugtarabahu.

¹¹ Ud may namuangan ti manga takinan sa Suan! Pagkilalan-un sida pinakamatinudukun pag manugpaanyu hari Ihiptu, dapat kanda manga paanyu unman may pulus. Kabitay nida masabi sa hari Ihiptu kuntay, “Linahi kami manga matinudukun hanggan manga hari kaybi sa un-an pag panahun.”

¹² Hari Ihiptu, naan yi taynguna ti manga matinudukun nimu pag tawu? Nu ungud matinudukun sida, ipaingana nimu nu hintay ti gayak Panginuun Makamaskihan para sa Ihiptu.

¹³ Ungud unman may intindi ti manga takinan Suan ag Mimpis. Madali sida magkadaya. Sida pag manga takinan imaw mana ti kailangan manguna sa manga nasakupan Ihiptu, dapat sida waya ti magpandaya sa kanda.

¹⁴ Pagguluhun Panginuun ti isip manga Ihipsiyu. Pasalan-salan kanda pagbuwatun pag manga tiklang. Sida ga manga langu magdampiray magsuruka waya.

¹⁵ Unman may una si unu sa bilug daga Ihiptu, mayaman ngatay pugri, garalangun aw ngatay karabsun, ti makaawat sa kay nasyun.

¹⁶ Sa ati pag sirang, ti manga taga Ihiptu bumaliw malumuy ga babayi. Takigan sida sa dala sa iparusa pag sintinsiya Panginuun Makamaskihan sa kanda.

¹⁷ Madala sida sa Huda, una lang masaydan kay ngaran inda. Matupad inda sa kanda dahil sa ginayak Panginuun Makamaskihan laban sa kanda.

¹⁸ Sa ati pag sirang, lima ka banwa Ihiptu ti sumunud sa Panginuun Makamaskihan, mamagaw sida sa bagaw Hibriyu. Usa sa tunda pag manga banwa ti ingarnan, Banwa Init.

¹⁹ Sa ati pag sirang, ipatindug ti usa ka harandugan para sa Panginuun sa daga Ihiptu, ag ipatindug diman ti usa ka paraamirawan pag batu siyun sa tab-anan.

²⁰ Bumaliw tanda inda ag puruyba kuntay ati ti Panginuun Makamaskihan sa daga Ihiptu. Nu ti manga taga Ihiptu manhagad awat sa Panginuun sa kadahilanan pagpakurian sida manga nag-api sa kanda, padarahan sida manugribri hanggan mangalaga sa kanda.

²¹ Ipakilala Panginuun kay sadili sa kanda, ag sa ati pag sirang kilalan-un nida ti Panginuun. Sambahun nida siya sa panab-anan tuhay-tuhay pag manga handug. Manaratu sida sa Panginuun, ag tupadun nida tida.

²² Parusahan Panginuun sarut ti manga taga Ihiptu, dapat paayadun di waydi niya. Mamakarani sida sa Panginuun, ag dungugun niya kanda manga darangin bag-u paayadun sida.

²³ Sa ati pag sirang, magkaimaw daka pag dalan ginan sa Ihiptu atabug sa Asirya. Ti manga taga Ihiptu hanggan ti manga taga Asirya pabalik-balik sa Ihiptu ag sa Asirya, bag-u mirinsan sida mansamba.

²⁴ Sa ati pag sirang, magkaraminsan ti Israil, ti Ihiptu, hanggan ti Asirya. Inda pag tulu ka nasyun bumaliw papalad sa buu kalibutan.

²⁵ Papaladan sida Panginuun Makamaskihan magkumun, “Pagpapaladan niku ti manga taga Ihiptu kang manga nasakupan, ti manga taga Asirya kang linalang, hanggan ti manga taga Israil kang magkaapu.”