Isayas 18 - Hanunuu

Ti Pagsabihun tungkul sa Itiyupya

¹ Kaawaawa ti manga rugar arani sa manga sapa Itiyupya, may manga hagabur pakpak manga iyay mag-adnugan.

² Siyun ginan pag rugar may manga manugbarita masakyan sa sarakyan buwat sa anyamu ag maglakaw sa Sapa Nilu. Kamu pag manga maraliksi pag manugbarita, pagbalik yi kamu sa kanyu daga tinunga manga sapa. Pagbalik yi kamu sa kanyu manga nasakupan arabwat ag malitis kay lukub, manga tawu makapangyarihan ag pagkadalaan una naan.

³ Kamu tanan mag-ulian sa kalibutan, bantayi niyu ti pag-abwat bandira sa babaw bantud, ag patingihi niyu ti tunug budyung.

⁴ Dahil inda ti pagsabihun sa kangku Panginuun, “Ginan sa kang tukawan, maariwaya aku magbantay ga magrayaw init sa karaw-an sirang, ga sa magkabuu anitay sa maaringahut panahun tig-arani.”

⁵ Bag-u waya rumas-ug ti udas tig-arani, sa udas di waya tigburusang manga ubas ag amat-amat magkalutu kay manga burak, puldun yi Diyus kay manga sanga inda.

⁶ Rurisun Diyus ti manga taga Itiyupya, ag kanda manga bangkay pabay-anan sa manga manuk manugdagit ag maraisug hayup. Bumaliw karan-unun sida manga manuk sa tungud sa udas tig-irinit ag maraisug pag hayup sa udas tigraramig.

⁷ Dapat rumas-ug ti sirang tumanggap ti Panginuun Makamaskihan manga handug ginan sa inda pag daga tinunga manga sapa. Kay manga nasakupan inda arabwat ag malitis kay lukub, makapangyarihan, ag pagkadalaan una naan. Daran-un nida kanda manga pamakaun sa Bantud Siun, nu naan pagsambahun ti Panginuun Makamaskihan.