Isayas 17 - Hanunuu

Ti Pagsabihun tungkul sa Damasku

¹ Inda ti pagsabihun tungkul sa Damasku: “Pagpatingi kamu! Ti Damasku balaw yi bumaliw banwa dahil mawayak inda.

² Udyi may mangulian sa banwa Aruwir. Bumaliw pasturan wadi inda manga hayup, ag balaw may mamalag sa kanda ati.

³ Mawayak ti manga inaladan batu pag manga banwa Israil, ag madura ti kapangyarihan Damasku. Ti madangtan manga masawad sa Aram parihu sa nadangtan manga taga Israil. Aku, ti Panginuun Makamaskihan, ti magsabi inda.

⁴ “Pagras-ug ati pag sirang, madura yi ti kapangyarihan Israil, ag kay manga kayamanan matulsan kakurian.

⁵ Miparihu siya sa taranuman manga butir ginarab yi manga manug-ani, parihu sa taranuman sa Karatagan Ripaim igu natapus ti tig-arani.

⁶ Pira-pira lang ti masawad sa kay manga nasakupan. Miparihu siya sa puun ulibu igu naputi kay manga burak. Mahimu duwa aw ngatay tulu lang ka burak ti masawad sa pinakaabwat pag manga sanga, ag upat ngatay lima ka burak sa iba pag manga sanga. Aku, ti Panginuun Diyus Israil, ti magsabi inda.”

⁷ Sa ati pag sirang, pumakarani yi ti tawu sa naglalang sa kanda, sa Banal pag Diyus Israil.

⁸ Balaw yi nida adwingun kanda manga binwat harandugan. Balaw diman nida adwingun ti manga tulduk tanda diyusa si Asira, hanggan ti manga harandugan pagsunugan nida kamangyan binwat diman waydi nida manga kamang.

⁹ Sa ati pag sirang, ti mapag-un nida pag manga banwa mawayak ag tayakan yi nida, parihu sa manga banwa manga Amuriyu ag Hibiyu tinayakan lang pagka rinmas-ug ti manga Israilita.

¹⁰ Kinalimtan niyu ti Diyus kanyu Manugribri ag batu palalan-iban. Nakan una magtanum kamu manga mararinu pag kalasi tanum, parihu sa ubas ginan sa iba rugar,

¹¹ una waya tumubu ag mamusang sa sirang katpung niyu itinanum, unman kamu may mab-ul kay burak. Nagbudlay lang kamu ag nakurian.

¹² Bantayi niyu! Magkagulu ti kayamuan tawu ginan sa manga nasyun. Kanda ingay ga tunug daraka pag humbak.

¹³ Dapat una sida parihu sa daraka humbak magtunug, malagiw di sida nu tamyawun sida Diyus. Miparihu sida sa upa sa tagudtud pagpayagun durus ag dayami pagpayagun buhawi.

¹⁴ Sa yabi magpamgas sida kadalaan, dapat igu surip rinuris sida. Tunda ti mangyari sa manga maggira sa kanta ag magbuul kasiyunan nita.