Isayas 16 - Hanunuu

¹ Ti manga taga Muab nagpalagiw sa Sila, usa ka banwa sa pangawakawaan, nagpadara manga anak karanidu bilang pamakaun sa hari Hirusalim.

² Ti manga babayi taga Muab ati sa may diripayan Arnun ga manga manuk pinurisaw sa kanda manga pugad.

³ Magkun ti manga taga Muab sa manga taga Huda, “Paanyui niyu kami nu hintay kanmi buwatun. Alagai niyu kami, parihu sa hamuy pag-ipakaun puun kayu sa karaw-an sirang. Nagpinalagiw kami ginan sa kanmi banwa, taynguna udyi may sadili ulian. Sagpuna mana niyu kami danga pagpabay-ani.

⁴ Paistara mana niyu kami ti manga taga Muab sa kanyu daga. Baliwahi niyu kami sa manga magkaibug mumatay sa kanmi.” Umapas ti manga mag-api hanggan ti magruris. Ag madura yi ti magpan-api sa daga Israil.

⁵ Ag humari ti usa sa manga linahi ni Dabid matinupadun ag may pagmahal. Ipalantap niya ti katadlungan sa kay magpihu. Sigidas siya sa pagbuwat matadlung.

⁶ Nabaritaan nimi masyadu marapadayaw ti manga taga Muab. Ti pagpalabaw ag kayabangan nida unman may pulus.

⁷ Nakan lumian manga taga Muab kanda nasyun. Manlumi sida tanan dahil sa pagkadura manga masarap nida karan-unun sa Kir Harisit.

⁸ Nadaut ti manga tanman sa Hisbun hanggan ti manga ubasan sa Sibma. Winayak manga takinan manga nasyun ti manga ubasan tugka sa Hasir atabug sa tigangan ag inmaput waya tugka sa Dagat Namatay.

⁹ Nakan maglumi aku parihu sa manga taga Hasir, dahil sa ubasan Sibma. Paglumian niku ti Hisbun hanggan ti Ilali dahil udyi madnugan ti manga masulung nida pag huruyawan dahil sa abunda pag-ani.

¹⁰ Naparaw ti kabayaan hanggan ti kasulungan sa kanda manga tanman. Udyi may magkarantahan ag maghuruyawan sa manga ubasan. Udyi diman may magpigis ubas hampay buwatun intus. Pinaapas yi Panginuun kanda maghuruyawan.

¹¹ Nakan magkaruku aku sa nadangtan manga taga Muab parihu sa maruku pag tunug alpa. Magkaruku diman aku sa nadangtan Kir Harisit.

¹² Gasaun lang ti manga taga Muab magpakabalik sa kanda manga simbahan sa abwat pag rugar. Ag unman diman may pulus kanda mag-atag sa Balay Diyus hampay mandarangin.

¹³ Tida ti pagsabihun kaybi Panginuun tungkul sa Muab.

¹⁴ Ag taynguna, inda kay pagsabihun, “Sa sulud tulu ka timpu, madura ti kayamanan Muab ag miuli sa kakay-ahan kay manga nasakupan. Pira-pira lang ti masawad buhi sa manga nasakupan niya ag manga malumuy waya.”