Isayas 15 - Hanunuu

Ti Pagsabihun tungkul sa Muab

¹ Inda ti pagsabihun tungkul sa Muab: Sa sulud lang usa ka yabi nawayak ti banwa Ar hanggan ti Kir sakup Muab.

² Tinmukad ti manga taga Dibun sa kanda Balay Diyus hanggan sa kanda manga simbahan sa abwat pag rugar hampay manlumi. Paglumian manga taga Muab ti Nibu hanggan ti Midiba. Ti kada usa sa kanda napakidkid kay buhuk ag napauguy kay bungut.

³ Nakarutay sida saku habang maglakaw sa baklayan. Magnguynguy sida sa atup nida manga balay hanggan sa manga buruybuyahan.

⁴ Maglumi ti manga taga Hisbun hanggan ti manga taga Ilali mag-adnugan di inda tugka sa Yahas. Nakan ti manga sundalu Muab magpanhuyaw sa dala.

⁵ Nanruku gid aku dahil sa nangyari sa Muab. Nagpinalagiw kay manga nasakupan atabug sa Suar tugka sa Iglat Silisya. Maglulumian sida habang magtukad atabug sa Luhit. Ti iba sa kanda magnguynguy atabug sa Hurunaim, dahil sa kanda nadangtan.

⁶ Nak-at ti manga laad Nimrim ag narubay ti manga ilamnun. Udyi may malangba manga tanum,

⁷ nakan dinara nida sa dipay Luung Arabim kanda manga natipun kasiyunan hanggan kayamanan.

⁸ Kanda lulumian mag-asaydan di tugka sa Muab, ginan sa Iglaim tugka sa Biir Ilim.

⁹ Nagbaliw maragang sa dugu ti danum Dibun, dapat balaw lang katunda kang buwatun: Mamadara aku manga liyun mankub sa manga nakapalagiw ginan sa Muab hanggan sa manga natayak.