Isayas 14 - Hanunuu

Bumalik ti manga Israilita ginan sa Pagkabihag

¹ Kaawaan Panginuun ti Israil ag utru niya piliun bilang kay nasakupan. Utru pauliun niya sida sa kanda sadili daga, ag may manga day-uhan kumuyug mangulian kaibahan sa nasyun Israil.

² Awatan iba nasyun ti Israil hampay makabalik sida sa daga ipinakaun Panginuun sa kanda. Bumaliw suruguun nida ti manga day-uhan. Bihagun nida ti nagbihag sa kanda kaybi, ag sakupun nida ti manga nangapi sa kanda.

Mamatay ti Hari Babilunya

³ Manga Israilita, sa sirang paharyun kamu Panginuun sa kanyu manga kakurian, pag-agwanta ag pagkasuruguun,

⁴ puyaan niyu kaindaay ti hari Babilunya: “Ipinakababa yi ti manug-api pag hari. Natapus yi kay magpamakuri.

⁵ Tinapus yi Panginuun ti kapangyarihan manga daut pag manga takinan.

⁶ Sa kanda pangagalit balaw may apas kanda magpakuri sa manga tawu, masyadu nu mag-unuunu sa manga nasyun.

⁷ Sa uryan bumaliw diman may kahusayan ti kalibutan. Ag mangarantahan ti manga tawu sa kabayaan.

⁸ Masulung una ti manga puun sipris hanggan sidru sa Libanun dahil sa nangyari sa hari. Ga manga tawu sida magkun, ‘Taynguna udyi kawu, udyi may mamukan sa kanmi.’

⁹ “Magkalaguluhan ti manga namatay sa kanmu pagras-ug ag alistu yi sida sulangun kawu. Ti manga karadwa daan makapangyarihan sa kalibutan magkalaguluhan sa pagkamusta sa kanmu. Magtindug sa kanda turukawan ti karadwa manga hari para sulangun kawu.

¹⁰ Sabihun nida tanan sa kanmu, ‘Linmumuy diman maaw kawu parihu sa kanmi. Pararihu yi kita.

¹¹ Taynguna tigbak yi kawu, udyi kawu may kapangyarihan, udyi diman waydi ti giritarahan manga alpa hampay dayawun kawu. Kanmu igyaan hanggan kumut sapat yi.’

¹² “Nalagpak kawu ginan sa langit, imaw ti pag-ingarnan Kuramnag sa Surip, Anak Magbutlak-init. Ipinakababa kawu sa daga, kawu ti nagpaampu sa manga nasyun.

¹³ Magkun kawu sa kanmu sadili, ‘Dumayik aku sa langit, ipauli niku kang turukawan sa tungud manga pamgasan Diyus. Tumukaw aku sa tungud bantud pagtipunan manga diyus baliwa sa kanaway.

¹⁴ Dumayik aku sa tungud manga rurum, ag bumaliw parihu sa Kaabwat-abwatan pag Diyus.’

¹⁵ “Dapat hintay ti nangyari sa kanmu? Dinara kawu sa rugar manga namatay, sa pinaka-abasad pag kali.

¹⁶ Turunun kawu kaayad manga namatay ag sabihun nida, ‘Bukun aw inda pag tawu ti pagkadalaan manga tawu sa kalibutan ag ti nagtandug sa manga kaharian?

¹⁷ Bukun aw siya ti nanwayak manga banwa, binuwat ga pangawakawaan ti kalibutan, ag unman pinalpasan kay manga binihag?’

¹⁸ “Ti tanan hari sa kalibutan mahuwayan may kadayawan sa kanda marinu gid pag kalubngan.

¹⁹ Dapat kawu, iyamut kanmu bangkay parihu sa sanga unman may pulus. Balaw kawu ilbung sa kanmu lulubngan, nu unman ilagpak kawu sa mabatu pag ukang bag-u tap-ukan kaibahan manga bangkay manga sundalu namatay sa girahan. Miparihu kawu sa bangkay pagtatatataan manga tawu.

²⁰ Balaw kawu ilbung parihu sa iba pag hari, dahil winayak nimu kanmu sadili nasyun ag minatay nimu kanmu manga nasakupan. Unman may masawad sa kanmu daut pag linahi.”

²¹ Ialistu yi ti rugar nu naan pag matyun kay manga anak dahil sa kasalanan nida manga ginurang. Balaw yi sida pahintulutan makasakup waya manga daga aw ngatay mamatindug manga banwa sa buu kalibutan.

²² Magkun ti Panginuun Makamaskihan, “Girahun niku ag wayakun ti Babilunya. Unman aku may sawadan buhi sa inda pag rugar. Balaw may masawad sa kanda manga linahi.

²³ Buwatun niku inda pangawakawaan, may mayamu lasaan, ag gub-un niku ga pinarisan. Aku, ti Panginuun Makamaskihan, ti magsabi inda.”

Ti Pagsabihun tungkul sa Asirya

²⁴ Nanumpa ti Panginuun Makamaskihan magkun, “Matupad kang manga gayak, mangyari gid kang manga pasya.

²⁵ Rurisun niku ti manga taga Asirya sa daga Israil. Runutun niku sida sa manga kabantudan niku. Balaw yi nida mahimu panawuhun ti manga nasakupan niku.

²⁶ Katunda ngani ti paggayakun niku buwatun sa buu kalibutan. Katunda ngani pag parusa ti ipakakit niku sa tanan nasyun.”

²⁷ Si unu ti makauman sa gayak Panginuun Makamaskihan? Si unu ti makaampara sa kay magparusa?

Ti Pagsabihun tungkul sa manga Pilistiyu

²⁸ Inda ti pagsabihun Diyus katpung namatay si Hari Akas:

²⁹ Manga Pilistiyu, danga dapu kamu magbaya sa pagkamatay hari naggira sa kanyu. Dahil kay anak ti umilis sa kanya imaw ti humari mahigpit man sa kanya, ga usa ka ulay namatay dapat nanganak mas madalit man ag harus maglayang.

³⁰ Ti manga pugri niku pag nasakupan pakaunun niku ag pakan-an pahari balaw may pagkadalaan. Dapat pabay-anan niku mamatay sa lun-us kanmu manga linahi, ag ti masawad sa kanda matyun diman gid niku.

³¹ Panlumi kamu matnug, kamu pag manga nasakupan manga banwa Pilistiya. Dahil girahun kamu niyu manga kalaban ga anus ginan sa kanaway. Sida lunsay yi manga maraisug.

³² Hintay ti isagut nita sa manga sinugu tunda pag nasyun? Sabihun nita sa kanda ti Panginuun ti nagpatindug Siun, siyun pag palan-ib ti manga magkakurian niya pag manga nasakupan.